1 Kɔrɛnti 9:24 - ALLALA KUMƐ

²⁴ Wo ya a lɔn serr, ko hali buri-kɛlɛ siyaman si anu buri kɔnɔ mɔgɛ kelen pe le si sarɛ wo sɔrɔn. Nba, wo ni wo buri wo nya alako wo ni wota sarɛ sɔrɔn.

1 Kɔrɛnti 9:24 ပူးပေါင်းရင်းမြစ်များ

Yaburi 19:5

A sewanɛ si bɔ sɔgɔma iko musu-kura-tigi, ni wo ma, iko buri-sɔgɛ ye buri-kɛla-nyana min na.

Makawandili Kumɛnu 9:11

N ya ko-gbɛrɛkɛ yen nna ko-lakɔrɔsiyi rɔ tun duninya kɛ rɔ. Buri-kɛla-wɛ ti to nɔ-ko sɔrɔnna tuma-wo-tuma. Kerinte ti to nɔ-ko sɔrɔnna kɛlɛ rɔ tuma-wo-tuma. Hɛnkilimɛ fanan ti ma-a-la, hali ka to a beli-fan sɔrɔnna tolon! Min bɛnta kun-tigiyɛ la, wo ti sɔ-tina-nyima sɔrɔn tuma-wo-tuma. Bɛɛ ti a harayɛgɛ sɔrɔn nya-kun-kelen.

Yɛrɛmaya 12:5

Mari ya a fɔ nde, Yɛrɛmaya ye ko, “Ni i ye bandanna i burila mɔgɛnu fɛ, ile si ke i burila soeenu fɛ kama? Ni i ye i kian latugula gbɛ-kole ma, ile wa ke wɔnɔ-firɛ rɔ Yorodan bɛ dala, wo si ma i bolo kama?

Hoseya 12:10

“N kumara nɛbinu ye nun ka ko-rayirɛ kɛ anu ye. N ya wole nta mɔgɛnu makawandili-kumɛnu don nɛbinu kara tɔ.

Romu 6:16

Ado nfan, wole ya a lɔn ko wo wa wo nyɛrɛ lasɔnnaya iko yɔɔn ka mɔgɛ dola kumɛ bira, wo ara ma yɔɔn la kun-tigi wo ye. Ni wo tora hakɛ kɛla, wo si ma yɔɔn la hakɛ kɔrɔ, min si a laban sayɛ ma, ni wo ma, wo si ma Allala yɔɔn la ala kuma-birɛla ko la, min si a laban ko-latelennɛ ma Alla ye.

1 Kɔrɛnti 9:13

Wo ya a lɔn serr, ko minnu bi wɔlila Alla-Bato-Bɔn la, wonu si anu niyi sɔrɔn Alla-Bato-Bɔn wo le la, ado minnu bi sarakɛnu bɔla saraka mintan tinɛ kuma, wonu si anutɛ sɔrɔn sarakɛ wonu denu tɔ.

1 Kɔrɛnti 9:23

N bi wo bɛɛ kɛla kibara-nyimɛ lela ko la alako mabɛ wonu ni barayi sɔrɔn ma nyɔgɔn fɛ.

1 Kɔrɛnti 9:26

Wo le ya a to, n bi n burila ha n ni ke n dan ma. N manɛ iko kei minnu bi anu nyɔgɔn tugula minnu ti foo anu ta-nyɔgɛ la.

Kalesiya 2:2

N tara bawo Alla le ya a lagbɛ n ye ko n ni ta. Mabɛ chɔchi-mɔgɔ-banu ya ma kun nayigi. N ya kibara-nyimɛ-kawandili bɔ sibolo-gbɛrɛnu ye nya min, n ya wo faranfasi anu ye ladɛn wo rɔ. N bara wɔlɛ min kɛ fɔlɔ-nun wo, n bi min kɛla kaka wo, n sa a fɛ, wo fenfen ni ma fuyi la.

Kalesiya 5:7

Wola dɛnkɛninyɛ ye tala yarɔ nun a kin na, ado ni min ya wo kunyɛ bɔ tonyɛ wo kɔrɔ, wo ma ko-nyimɛ kɛ.

Filipai 3:12

N ma a fɔ ko n kɔntɛ ara kɛ n ye. N da fani ma wɛ kɔnɔ n bi n tayala dɛɛ, ado Yisa ara ban nde rabirala ka n ma atɛ la.

Filipai 3:14

Alla wa n kele ko n ni yɛlɛ san ma ka habadan-nimayɛ kɛ Yisa Kirasiti baraka rɔ, nta barayi le wo la. Woletɔ n bi n burila ka n telen dan wo la, yɔ!

Kɔlɔsi 2:18

Wo kana sɔn, mɔgɔ-wo-mɔgɔ ni wo yiliki min bi a nyɛrɛ gbiliyala ko-rayen rɔ ka a famayigi foninyɛ rɔ. Wo kana don melika-bato-koe rɔ. Mɔgɔ sifa wo wasinɛ hadama-danta miriya le la fufafu!

Hiburunu 12:1

Nba, ma ara mɔgɛ min bɛɛla ko fɔ wo ye nun, ma lafoonɛ wonu na. Anu bara anuna dɛnkɛninyɛ lagbɛ ma ye. Woletɔ koe min bɛɛ si a ma, ma ni bui, ma ni wonu boloka. Hakɛ min bara ma bira gben, ma ni wo bɛɛ boloka! Nyɔgɔn-to-buri min bi ma yarɔ, ma ni ma tunadiya wo ma wona.

Yemesi 1:12

Mɔgɔ-sewanɛ le wo mɔgɛ la min si lanayɛ kɛ kɔrɔbɔlɛ rɔ bawo ala kɔrɔbɔlɛ wa ban tumɛ min, a si barayi min sɔrɔn, wo le a niyi-bɛrɛ la. Minnu bara Alla keni, Alla ara lanyiri kiri wonu ye ko a si barayi di anu ma.

Lankɛnimayɛ 3:11

N bi nala tiriya! Min bi wo bolo, wo ni wo mara gben! Woletɔ wo ara barayi min sɔrɔn ka a bɛn wola nɔlɛ ma, mɔgɔ-wo-mɔgɔ ti ke wo kankanna wo bolo.