1 Kɔrɛnti 1:27 - ALLALA KUMƐ

²⁷ Duninya si min lɔn yuwaya-koe la, Alla ya a lawuli a ma serr, ka wo le yabɔ alako a ni hɛnkilimɛnu namiliya wonu fɛ. Duninya ye a mirila min ma ko sɛnbɛ sa a bolo, Alla ya wo le yabɔ alako a ni mɔgɔ-sɛnbɛmɛnu namiliya.

1 Kɔrɛnti 1:27 ပူးပေါင်းရင်းမြစ်များ

Yaburi 8:2

Hali dennɛnu, wonu bi i matɔgɔ-siginu sala. Ile ye kan min, i yogenu ti ke i yakɔrɔ-mamɔla nyɔ. Min ba a ma ko a ye a sɔla i la, i si wo kasara.

Aiseya 29:14

Woletɔ a ko a si to anu mabanna fitina-gbesili la. Minnu hɛnkili kolo, a ko wonu si ma kun-takolɔn la. Anuna kɛwuyɛ bɛɛ si ma fufafuyi la.

Aiseya 29:19

Isirɛlata Mari Alla-sɛnimɛ ye sewɛ min dila mɔgɛnu ma, bolo-kolɔn anubɛ mɔgɔ-famayiginɛnu si wo sɔrɔn tun.

Aiseya 44:25

A ko a ara yi-kɔrɔ-fɛlɛnnɛnu ma kun-takolɔnnu na. Lole-lakɔrɔsilɛnu bi ko-natoe minnu fɔla, a ara wonu ma ko fuyi la. A ko minnu bi anu hɛnkili mayirala, a ara wonu sɔsɔ feu, woletɔ anu si a lɔn ko ko-fuyi le anuna hɛnkilimayɛ la.

Yɛrɛmaya 8:9

Wola hɛnkilimɛnu na si yarabi. Anu kunyɛ ni don gbaran rɔ bawo anu bara anu ban anu tole-masɔ-koe ma Marita kumɛ la. Woletɔ Mari ko kun-takolɔn le anu na filili!

Sɛfanaya 3:12

A ko fɔ mɔgɔ-famayiginɛnu dɔrɔn si to anu niyi la. Wonu denu si ta a wara anu dɛnbɛn-koe la.

Yilan-Yilan Koe 22:30

Sofɛlɛ ya a fɔ a ye ko, “Ila sofɛlɛ le ma nde le la? I sa i sigila nde la tuma-wo-tuma? Ha bi, n bara kɛ nyɔgɔn ma i la nun?” Belam ya a fɔ ko, “Ade.”

Matiyu 11:25

Wo wati ya a taran, Yisa ya a fɔ ko, “E, n Fa, san-kole anubɛ dugu-kole Mari! N bi baraka birala i ye bawo i wara koe min dogon hɛnkilimɛnu anubɛ mɔgɔ-karannɛnu ma, i wara wo yira karanbɛlɛnu na.

Matiyu 21:16

Anu ya a fɔ Yisa ye ko, “Anu bi min fɔla, i sa wo lamɔɛnna?” Yisa ya anu yabi ko, “N bi a lamɔɛnna, yɔ! A sɛbɛnɛ Allata kitabu rɔ ko, ‘Dennɛnu bi tantoli-siginu sala a kilɛ fɛ.’ Wo ma wo karan bɛ, wa?”

Matiyu 9:9

Nba, Yisa bɔra nyɔ tumɛ min, a ya duti-makelelɛ do yen. A tɔgɛ Matiyu. A siginɛ ala wɔli-kɛ-tinɛ. Yisa ya a fɔ a ye ko, “Bila n fɛ.” Matiyu ya a lasɔ ka bila a fɛ.

Luka 21:15

bawo n si kumɛnu don wo da rɔ ka hɛnkili di wo ma. Wo si min fɔ, hali wo yogo kelen ti ke wo sɔsɔla ka wo nɔ.

Kɛwɔlɛnu 17:18

Ɛpikuriyannu anubɛ Sitowikanuna karan-mɔgɛ donu ya a sɔsɔ. Donu ko, “Karanbɛlɛ nyɛrɛ-mayiralɛ kɛ ye a rayala ka nfen fɔ?” Donu ko fanan, “A manɛ iko a ye kumala mɔgɔ-gbɛrɛnuna allanuna ko la.” Anu ya kɛ fɔ bawo Pɔli ye kawandili bɔla Yisala ko la nun anubɛ mɔgɔ-lawuli-koe ka bɔ furinu tɛma.

Kɛwɔlɛnu 7:35

“Ado nfan, Musa wo le kɛ la, Isirɛla mɔgɛnu ya anu ban min na ka a fɔ a ma ko, ‘Yon ya ile ma kun-tigi anubɛ kiti-tɛgɛlɛ la ma kuma?’ Alla ya ale le sɔ ka a ma kun-tigi anubɛ kisilɛ la, yɔ! A ya melika min yen ta-mɛlan rɔ kɔlɔma-nɛ rɔ, melika wo le ye a dɛnbɛna mɔgɔ-kisi-koe la.

Kɛwɔlɛnu 7:54

Yahudiyanuna kun-tigi wonu ya kumɛ wo lamɔɛn tumɛ min, anu yisi bɔra Sitifen kan ma dɔgɔma-ma-de! Diminyɛ wo ya a ma, anu ya anu nyin makin.

1 Kɔrɛnti 1:20

Nba, hɛnkilimɛnu anubɛ tɔn-karan-mɔgɛnu anubɛ sɔsɔli-sala-wɛnu, wonu bi kama? Alla ara a lagbɛ ko duninya kɛ hɛnkilimayɛ, yuwaya-koe le wo la!

1 Kɔrɛnti 1:21

Alla ya a hɛnkili-wɛ lawɔli. A ya a ma, mɔgɛnu ti ke a lɔnna hadama-danta hɛnkilimayɛ rɔ. Kɔnɔ Alla-lɔnbɛlɛnu bi min kelela yuwaya-kumɛ, male ye wo le kawandili bɔla, ado Alla le ya a latɛgɛ ko minnu si na dɛnkɛninya Yisa ma, wonu denu si kisi yuwaya-kumɛ wonu fɛ.

1 Kɔrɛnti 2:12

ado Alla ya tonyɛ min bɛɛ di ma ma, ma ya wo nya-yen bawo Alla ya a nyɛrɛta Niyi di ma ma. A ma duninya kɛ niyi di ma ma.

2 Kɔrɛnti 10:10

Do si a fɔ ko, “Min sɛbɛnɛ Pɔlita kɛdinu tɔ, wo gbɛlɛ ma wara la kɔnɔ ni ale nyɛrɛ ye ma fɛ, a ma gbɛlɛ wo nya. Fen ma ala kumɛnu na!”

2 Kɔrɛnti 4:7

Nba, wodi ti ke kibara-nyimɛ min sanna, wo ye male min bolo, ma mani de dɔrɔn iko bɔnku-dagɛnu. Wo si a yira ko Allata sɛnbɛ ye fan bɛɛ marala. Atɛ le, mata ma.

Yemesi 2:5

N diyana na-kelen-nyɔgɛnu, wo ni wo tole masɔ! Alla ara bolo-kolɔnnu yabɔ duninya kɛ rɔ ka anu nama-a-la dɛnkɛninyɛ rɔ. Alla di minnu ye, wonu si mansayɛ sɔrɔn iko a ara lanyiri kiri anu ye nya min.