1 Kɔrɛnti 1:20 - ALLALA KUMƐ

²⁰ Nba, hɛnkilimɛnu anubɛ tɔn-karan-mɔgɛnu anubɛ sɔsɔli-sala-wɛnu, wonu bi kama? Alla ara a lagbɛ ko duninya kɛ hɛnkilimayɛ, yuwaya-koe le wo la!

1 Kɔrɛnti 1:20 ပူးပေါင်းရင်းမြစ်များ

2 Samuwɛli 15:31

Mansa Dawuda ya a lamɔɛn tumɛ min ko Ahitafɛli ara kofu Abasalɔm ma murutiya tinɛ, mansɛ ya madiyali kɛ. A ko, “Mari, i yandi, alamɛ ko kana bɔ Ahitafɛlita makawandili-kan rɔ.”

2 Samuwɛli 16:23

Ahitafɛli ya Abasalɔm makawandi ko-wo-ko la, a si wo bira iko Alla nyɛrɛta kumɛ. Mansa Dawuda anubɛ Abasalɔm mɔgɔ filɛ bɛɛ lara le ala makawandili-kumɛ la nun.

2 Samuwɛli 17:14

Abasalɔm anubɛ Isirɛla mɔgɔ-banu lara Husayita kumɛ wo la ka tenbi Ahitafɛlitɛ la. Mari ara ban a latɛgɛla ko anu kana Ahitafɛlita makawandili nyimɛ wo bira alako a si Abasalɔm halaki nya min.

2 Samuwɛli 17:23

Ahitafɛli ya a yen min kɛ ko anu sa ata kawandili-kan birala tun, a ya kirikɛ sa ala sofɛlɛ kuma. A sigira a la ka a warɛ-kilɛ bira. A ke a warɛ-soe burɔ, a ya a kɛɛ ratala. A ban wo la, a tara a dun kɔlɔma la ka a nyɛrɛ faga. Anu ya a furi bi ka ta a togon anuta kebila kaburu-soe la.

Yobu 12:17

A si kun-tiginuna hɛnkilimayɛ bi anu bolo. A si a ma, kiti-tɛgɛlɛnu ni to kun-takolonya-koenu nadanna.

Yobu 12:20

Alla si yili kiri mansɛnuna makawandilɛnuna kumɛ-dan la. A si kinanu ma kinan-yungurɔn la.

Yobu 12:24

A si a ma, duninya-mansɛnu ni ma yuwɛ la. A si a ma, anu ni to-a-rɔ ka to yilan-yilanna.

Aiseya 33:18

Wo kilannɛ sibolo-gbɛrɛ duti-makelelɛ anubɛ ko-lakɔrɔsilɛ minnu na nun, wo si to wo hɛnkili ma dɔrɔn!

Aiseya 44:25

A ko a ara yi-kɔrɔ-fɛlɛnnɛnu ma kun-takolɔnnu na. Lole-lakɔrɔsilɛnu bi ko-natoe minnu fɔla, a ara wonu ma ko fuyi la. A ko minnu bi anu hɛnkili mayirala, a ara wonu sɔsɔ feu, woletɔ anu si a lɔn ko ko-fuyi le anuna hɛnkilimayɛ la.

Aiseya 53:1

Mɔgɛnu bi a fɔla ko, “Ma ara min namɔɛn Alla bolo kɛ la, yon bi lala wo la? Yon bara Marita fanka yen koe kɛnu tɔ?”

Yɛrɛmaya 10:7

Ile min bi duninya mumɛ kun na, a bɛnta, mɔgɛ bɛɛ ni ile le gbiliya. A bɛnta, anu ni i gbiliya yati! Hɛnkilima-siyaman bi nyɔ kɔnɔ mɔgɔ-wo-mɔgɔ hɛnkili ma gbɛrɛn itɛ rɔ.

Matiyu 13:22

Sugi min buira wɔnɛnu tɛma, wo mani de iko mɔgɛ min bi kumɛ lamɔɛnna kɔnɔ duninya-hɔn-koe anubɛ nɔnfulu-keni ya a ma, kumɛ wo fagara a yisi rɔ feu! A ti gbɔ hali!

Yɔni 12:31

“Duninya-mɔgɛnu kiti-tɛgɛ-tumɛ ara ke. Dɛnkɛninyabɛlɛnuna kun-tigi gben-tumɛ ara ke.

Kɛwɔlɛnu 17:18

Ɛpikuriyannu anubɛ Sitowikanuna karan-mɔgɛ donu ya a sɔsɔ. Donu ko, “Karanbɛlɛ nyɛrɛ-mayiralɛ kɛ ye a rayala ka nfen fɔ?” Donu ko fanan, “A manɛ iko a ye kumala mɔgɔ-gbɛrɛnuna allanuna ko la.” Anu ya kɛ fɔ bawo Pɔli ye kawandili bɔla Yisala ko la nun anubɛ mɔgɔ-lawuli-koe ka bɔ furinu tɛma.

Romu 1:20

Allata habadan-sɛnbɛ anubɛ ata Allayɛ, wonu ti yen. Kɔnɔ kebi Alla ya duninya dan tumɛ min, a ara ban wonu bɔla gbɛ ma wo ye feu! Mɔgɛ si wonu yen ata dali-fannu denu fɛ. Woletɔ mɔgɔ-wo-mɔgɔ ti ke a fɔla ko, “Ka a fɔ ko n bi ko-yogomɛ le mala nun, n ma wo lɔn!”

Romu 1:22

Anu ko hɛnkilimɛ le anu na kɔnɔ kun-takolɔn le anu na.

1 Kɔrɛnti 1:19

ado a sɛbɛnɛ Allala kitabu rɔ ko, “N si hɛnkilimɛla hɛnkili tinya ka mɔgɔ-karannɛnuta lɔnnɛ ma fuyi la.”

1 Kɔrɛnti 1:26

N na-kelen-nyɔgɛnu, Alla ya wo kele tumɛ min, wo ye nya min nun, wo ni wo yili to wo ko. Iko hadama-dan si fan dan nya min, a hɛnkilima wo, a mɔgɔ-ba wo, a kun-tigi wo, wonu ma siya wo tɛma nun.

1 Kɔrɛnti 1:27

Duninya si min lɔn yuwaya-koe la, Alla ya a lawuli a ma serr, ka wo le yabɔ alako a ni hɛnkilimɛnu namiliya wonu fɛ. Duninya ye a mirila min ma ko sɛnbɛ sa a bolo, Alla ya wo le yabɔ alako a ni mɔgɔ-sɛnbɛmɛnu namiliya.

1 Kɔrɛnti 1:28

Duninya ye yoola min ma ka a bɔrɔbɔ ko fen ma, Alla ya wo le yabɔ. A ya wo yabɔ alako duninya ya min lɔn ko-wɛ la, a ni wo ma fuyi la.

1 Kɔrɛnti 11:32

Mari ye ma kitila ka ma tɔrɔ kaka alako mabɛ dɛnkɛninyabɛlɛnu kana halaki ma nyɔgɔn fɛ kiti-tɛgɛ-lunyɛ.

1 Kɔrɛnti 2:6

Hali wo, wole minnu lanɛ Yisa la gben, n bi hɛnkili-su-do labɔla wo ye, duninya-hɛnkili ma min na. Duninya kɛ kun-tigi minnu bi nala tenbila, hɛnkili kɛ sa iko anutɛ ye nya min.

1 Kɔrɛnti 2:8

Duninya kɛ kun-tigi-fenfen ma hɛnkili wo nya-yen. Gbiliyɛ ye Mari min bolo, ni anu ya wo lɔn nun, anu ti wo gbangban kɔlɔma ma nun.

1 Kɔrɛnti 3:18

Mɔgɔ-wo-mɔgɔ kana a nyɛrɛ yanfa. Ni min mirinɛ ko hɛnkilimɛ le ale la duninya kɛ rɔ, a fisa, duninya ni a lɔn kuntan la alako a si hɛnkili-bɛrɛ sɔrɔn nya-min.

1 Kɔrɛnti 3:19

Duninya kɛ ya min lɔn hɛnkilimayɛ la, kuntanyɛ le wo la Alla yala. Iko a sɛbɛnɛ Allala kitabu rɔ nya min ko, “Alla si hɛnkilimɛnu bira anu nyɛrɛta halliyɛ rɔ.”

1 Kɔrɛnti 6:2

Wo ma a lɔn ba, ko Allata mɔgɛnu si duninya kiti? Nba, ni wole si na duninya kiti, wo ti ke kiti dɔgɔmɛ kɛnu tɛgɛla, wa?

Yemesi 4:4

Wole lanayabɛlɛnu, ka a fɔ ko ni duninya kɛ diyara mɔgɔ-wo-mɔgɔ ye, Alla yoge le wo tigi la, wo ma wo lɔn, wa? N ni a fɔ tun, mɔgɛ min bi mala duninya kɛ diyana-mɔgɛ la, wo si a nyɛrɛ ma Alla yoge la.