1 Ko-Kɔrɔta-Karan 17:27 - ALLALA KUMƐ

²⁷ N bi i matarala, i ni ita duwɛ layigi n kegeyɛnu kuma. Wo si a ma, anu ni to ila duwɛ kɔrɔ tuma-wo-tuma. Ile Mari Alla ara sarama-kan kɛ kiri, ado n kegeyɛnu ti foo ila sarama-kan kɛ la mumɛ!”

1 Ko-Kɔrɔta-Karan 17:27 ပူးပေါင်းရင်းမြစ်များ

Ko-Dabirɛnu 27:33

A fa yɛrɛyɛrɛnta, a ko, “Mɔgɔ yon ya soge nyini ka na a la n ye? N bara ban wota soge dɔnna, ado n bara ban duwala wo ye fanan. Ila duwɛ wo ara to wo bolo habadan!”

1 Mansɛnu 2:33

Woletɔ dunɛ wo si to sigila Yohabu anubɛ ala kebilɛ kuma habadan! Kɔnɔ Mansa Dawuda anubɛ ata kebilɛ minnu bi sigila a gbɛ rɔ, wonu si to yisi-kimɛ sɔrɔnna Mari bolo habadan!”

1 Mansɛnu 2:45

Kɔnɔ Alla si duwa nde, Silamɛni ye. Mari si to n fa Dawudala mansaya-bɔn lasabatila burubukai!”

1 Ko-Kɔrɔta-Karan 17:26

Ile Mari le nta Alla la. I wara sarama-kan-nyimɛ kiri n ye.

1 Ko-Kɔrɔta-Karan 18:1

Wati tenbinɛ, Mansa Dawuda tara bui Filisitinu ma tun. A ya anu nɔ ka anuna so-karantan bi anu bolo min tɔgɛ Kati anubɛ so-mɛsɛ-nɛ minnu bi wola foolɛ rɔ.

1 Ko-Kɔrɔta-Karan 28:4

Isirɛlata Mari Alla, wo le ya Yuda bɔnsɔn yabɔ bɔnsɔn doinu tɛma. Wo kɔma, a ya n fala denbayɛ yabɔ Yuda bɔnsɔn-mɔgɛnu tɛma. Wo kɔma fanan, a ya nde, Dawuda yabɔ n fata denbayɛnu tɛma ka n ma mansɛ la Isirɛla mɔgɛnu kun na. A ya den-kei-siyaman di n ma. A ya Silamɛni yabɔ nna dan wonu tɛma ka wo ma mansɛ la Marita nyamanɛ kɛ kun na. Ale Mari le wara nde yabɔ ka mabɛ n kegeyɛnu ma mansɛ la wo kun na tɛban!

Yaburi 21:6

Ila duwɛ ye a fɛ burubukai! A sewanɛ bawo i ye a fɛ.

Yaburi 72:17

I ni a ma, mansɛ tɔgɛ kana tunu mumɛ! I ni a ma, a mankan ni to warala iko tele. Alamɛ sibole bɛɛ ya Alla madiya ko a ni ata duwɛ layigi anu kuma iko a ya duwɛ di mansɛ wo ma nya min. I ni a ma, anu ni to Alla matarala alako mansɛ wo sewanɛ ni to.

Yilan-Yilan Koe 23:20

A ya n sɔ ko n ni duwɛ kɛ. Ni Alla ya duwɛ minnu kɛ, nde ti ke wonu yɛlɛmana tun.

Romu 11:29

ado Alla ara minnu yatɔnbɔn ka ata duwɛ layigi min kuma, a miriya ti yɛlɛma wonuna ko la.

Ɛfɛsa 1:3

Ma ni baraka bira ma Mari Yisa Kirasiti, wo Fa Alla ye dɛɛ bawo duwɛ min bɛɛsi ye Arinyɛni tɔ, Alla ara wonu di ma ma. Ma ya wonu sɔrɔn Kirasiti baraka le tɔ.

Tɔn-Fɔɛ-Fila-Nyɔgɛ 15:6

Mari si ata duwɛ layigi wo kuma iko a ya lanyiri kiri wo ye nya min. Nyamani-gbɛrɛkɛ-mɔgɛnu si na dɔndɔlɛ sa wo ma kɔnɔ wole ti ta yili tɛgɛ nyamani-gbɛrɛkɛ-mɔgɛnu ma. Wole si ke anu marala ka to yili-yɔɔnyɛ kɔrɔ wo bolo kɔnɔ anu denu ti ke wole marala.