ZEKHARIAH 10:6 - Khumi Common Language Bible

⁶ “Kai ly Juda khumichi ai atho awm hai iy, Israela khumichi ai atleu ai. Kai ly nichi ai pahen iy, mychi i saleaung khuteng mang y pahawi teang ai. Nichi ly kaimy mana khala py khai su vai y nai khumichi kamta lawm ai. Kai ly nichi i Areng Tameuh ne iy, nichi i chiu sa nai pathang pi ai.

ZEKHARIAH 10:6 ပူးပေါင်းရင်းမြစ်များ

SAM 89:21

Ni ly kai teng i atho nga jojo ai; kai i sa thai naira saho y ni ai ham hai ai.

ISAIA 11:12

Mymy ly amprei phro nai Israela khumichi ai py, ahei phro nai Juda khumichi ai khaileaung taki palyh dengdairei kachu ali teang nai ai py, pany hai ai nai Areng my patei nai tamkhawn theaung ai.

ISAIA 14:1

Areng ly mymy i khumi Israela chengchi ai pahen ali teang nai ne. Mymy i khumichi palawn ai nai vawi takhra ai. Mymy ly nichi ai mychi i saleaung khutengra y awm u ali teang ai nai pei ai. Cheng takhra khumichi ly jeu iy nichi hawi vanrei awm u ai.

ISAIA 41:10

Jei u moh, kai ly nangchi hawi vanrei awm! Kai ly nangchi i Tameuh ne; ati mo ra py nangchi ai jei hyn hai ai ny y! Kai ly nangchi ai khaw hai iy sabawm ai. Nangchi ai ama hai iy atleu ai.

ISAIA 54:4

Jei moh, nang ly kangji ngo bi y leang bo. Cheh nai py avum ai ny y. Nang ly anglo deaungdi nai khala y, ka-ym by y nai aju lawm vai nai py, neampachy lumai kamta, jeaungmang nanai pa-rei avum nai py, tami veng ai.

ISAIA 54:8

Kai ly kado theu nai deaungkho y, tanareichy kang hi pi veng nai ne. Na i py tamen naira ly nangchi teng y kang patei pi jojo ai, nanai nangchi ai atleu nai keung Areng my leu pei bo.

JEREMIA 23:6

Huni samrang my peang nai thym khala y Juda khumichi ly chymme naira awm ai i, Israela khumichi ly tlamsa naimy awm u ai. Naibaly huni samrang i amyn ly ‘Kaichi ai atleu pi nai Areng,’ nanai palau u ai.

JEREMIA 3:18

Israela ly Juda hawi amkawm iy khumichi hawi vanrei, nangchi i amsi pajochi teng y kaimy pei nai pri y, tosyh mang dengdairei ang jeu u ai,” nanai thui hai bo.

JEREMIA 30:18

Areng my, “Kai ly kaimy i khumichi ai nang chawn hai teang iy, kapahawi ali teang ai. Jerusalem mary ai palum teang iy samrang yhm py palum teang ai.

JEREMIA 30:20

Kai ly hini pri ai jangni i sa thai naira kapei ali teang iy, hini sa thai naira ai py khaw hai jojo ai. Nichi ai ana nai khumi bawibawichi ai kapajeng ai.

JEREMIA 31:1

Areng my, “Kai ly Israela cheng bawibawichi i Tameuh lawm iy, nichi py kai i khumichi lawm u ai nai neng kani ly tym dudu bo.

JEREMIA 31:20

“Israela awi, nang ly kai i ngai keh nai chapo hawi, kai i tamen keh nai chapo py ne. Kai ly nang i amyn kathui nai tleirei, nang ai aawi jojo nai ne. Kai i paleung ly nang teng y apei keh nai ne i, kang pahen ai.

JEREMIA 31:31

Areng my, “Kai ly Israela khumichi, Juda khumichi hawi Leu Maikawm kangtha asa nai neng tym ai.

Ezekiela 36:11

Kai ly khumi hawi tawnbawichi peung hai ai. Nangchi ly cho chanauchi neangneang sa u ai. Jangni i kamta awm ai nai kang pei ai. Jangni tleaung y nang chawn hai ai. Huna nai khala kai ly Areng ne, nanai nangchi pany u ai.

Ezekiela 36:37

Sa thai naira angym nai Areng my, “Kai ly hini tleaung y malawn py sa ai. Israela chengchi ai kai teng y kasabawmra hnei bi ai nai pei ai. Beram kanghu kamta vuikanai peung hai ai.

Ezekiela 37:16

Mymy ly “Nang khumicho awi, thengbeang harei lo ly hunira y ‘Juda pri hawi my i ahawi Israela pri i vui,’ nanai tajiu ba. Hunaibaly takhra thengbeang harei lo bi ly hunira y ‘Israela pri hawi my i ahawi Josepha i vui Ephraim thengbeang,’ nanai tajiu ba.

Ezekiela 39:25

Sa thai naira angym nai Areng my, “Na i py vai kai ly Jakob i katu chanau ne nai Israela chengchi ai pahen iy, nang chawn hai ali teang ai. Kai i amyn kachai ai ama hai ai.

HOSEA 1:11

Juda pri khumichi hawi Israela pri khumichi ly amkawm u ali teang ai. Nichi ly mychi i vui lu sa nai keung leaungrei vawi takhra u ai. Nichi ly mychi i prira y nang chawn u ai. Jezarela i kani ly kani kalen lawm ai,” napi.

HOSEA 1:7

Na i py kai ly Juda pri khumichi ai tamen ai rai. Nichi i Tameuh kai Areng ly nichi ai atleu ai. Na i py tavai atiu nai hawi py, haisau, thailiho, thailiho chyn, keaungngo, keaungngo tavaimi kamkawm hawi py, nichi ai atleu ai ny y.

HOSEA 14:9

Tau cheng nai khumi hawi dawn pasym thai nai khumichi ly hini cha-iura tajiu nai ngiereichi ai dawn pany thai iy, paleung theung y pateung u me na sy. Areng my khai pi nai reitachi ly teng nai deaungkho y khumi kahawichi ly huni reita lamchi kamta tangai iy, heng u bo. Na i py kamngo sa nai khumichi ly huni reita lamchira y tako u y nai deaungkho y, athei thleaung iy atlym u nai ne.

HOSEA 2:23

Kai ly kaimy i khumichi ai pri theung y awm hai iy, nichi ai nang chawn hai ai. Kai ly “tamen y” nanai amyn angam nai khumichi ai tamen ai. “Kai i khumichi ny y” nanai amyn angam nai khumichi ai kaimy ‘Nichi ly kai i khumichi ne’ nanai thui iy, nichi my, “Mymy ly kaichi i Tameuh ne,” nanai thui u ali teang ai.

OBADIA 1:18

Jakob i kangpreangchi hawi Josepha i kangpreangchi ly mai hawi atawm ai. Mai ly anyn angso ai kang hai nai kamta, nichi ly Esaw i kangpreangchi ai taphra u ai. Esaw i katu chanau leaung leaungrei py, dei y naimy awm ai ny y. Hini ly kai, Areng my kang thui pi nai leu ne.

MIKHA 4:13

Areng my, “Jerusalem mary i khumichi awi, paleung ka-echi ai tiu ai nai chei u! Kai ly nangchi ai tamo taki hawi kheupaja muikenchi awm nai si katai kamta, atho awm hai ai. Nangchi ly pri neangneangchi ai ati piupa pajau nai deaungkho y, ta-li ta-pang hawimy nichi i nga nai yhmtheaung katuichi ai lawm vui iy, kani khaileaung peang nai keung kai, Areng teng y talam u,” napi.

MIKHA 4:6

Areng my, “Kaimy kapajeng nai, pri pala naira avum nai khumichi ai, kaimy kalym kalawi teang nai neng ly tym ai nai kasa bo.

MIKHA 5:3

Hunai deaungkho y Areng ly neampachy my chapo tapen nai neng tym pa-rei, mymy i khumichi ai paleung ka-echi teng y khai su ai. Naibaly pri palara avum nai khumichi ly mymychi i nupaichi hawi amkawm u teang ai.

MIKHA 5:8

Daichi mawi kanghu theung y tym nai khrangsi kamta py, beram kanghuchi theung y tym nai khrangsi kamta py, dei kamthum Israela chengchi ly cheng takhrachi theung y tym ai. Khrangsi ly beram kanghuchi theung y kun iy, beramchi ai kei piupa ai i, ami my py atleu pajau ai ny y.

MIKHA 7:16

Pri tleireichi ly atho awm i py, huni leaungsaichi niu i, jei u nai deaungkho y, mymychi i labeaung hawi kanochi tamym u ai.

ZEKHARIAH 1:16

Jerusalem mary ai pahen nai sai patei ai nai, kavawi ali teang nai ne. Kai i Achura yhm sa palum teang iy, Jerusalem mary pui ai py, sa palum u teang ai nai tla ai,” napi.

ZEKHARIAH 10:12

Kai ly kaimy i khumichi ai atho awm hai ai. Nichi ly kai ai chiu u iy kai i leu tangai u ai.” Hini ly Areng i pei nai leu ne.

ZEKHARIAH 13:9

Naibaly kai ly tangka ai mai hawi pachai nai kamta, dei kamthum phy thomrei y phyrei ai pachai ai. Nichi ai cham iy khen ai. Kai ly muku ai cham nai kamta, nichi ai cham ai. Naibaly nichi ly kai teng y chiu sa u ai, Kai py pathang pi ai. Nichi ly kai i khumichi ne, nanai nichi teng y thui pi ai. Nichi my py kai ly mychi i Tameuh ne, nanai pany u ai,” napi.

ZEKHARIAH 8:11

Na i py vai, kai ly hini khumi cheng awm rai naichi hawi, sai sairei amkawm ai.

ZEKHARIAH 9:16

Huni neng kani tym nai khala, beram typ keung ly beram kanghuchi ai ka-jeira i nai atleu nai kamta, nichi i Areng ly mymy i khumichi ai atleu ai. Nichi ly areng lukhymra i vang kateng lengseaungchi kamta, mymy i pri y kangvang sangso angvang ai.