THEU NAI 17:7 - Khumi Common Language Bible

⁷ Israela chengchi my, “Areng ly achi hawi vanrei awm a?” nanai deng naimy Mosi ai josei iy Areng ai cham u nai deaungkho y, huni meingtym ai,” Massah” nanai py, “Meriba” nanai py pathi u nai ne.

THEU NAI 17:7 ပူးပေါင်းရင်းမြစ်များ

SAM 106:32

Nichi ly Meriba micheaung peang y, Areng ai kado theu hai bo; nichi molam y Mosi ly rai naira avum.

SAM 78:18

Mychi my, cha ai ngai nai teicha teineichi hnei u iy, atyhtyh naimy Tameuh ai cham u ta-li nai ne.

SAM 81:7

Nangchi patang naira avum nai thym khala y kai ai palau i, kai ly nangchi ai atleu pi bo. Alipui khupui theung i niu pajau y naira dengdairei, nangchi ai kang pathang pi bo. Meriba micheaung sahawi y, nangchi ai kaimy cham bo.

SAM 81:8

Kai i khumichi awi, kai i pany hai nai ly tangai u cham; Israela chengchi awi, nangchi ly kai i leu tangai u!

SAM 95:8

Mymy ly “Meriba meingtym y tym nai nangchi i amsi pajochi kamta, nangchi ly paleung tang u moh; daichi ka-vymra i Massah meingtym y tym nai amsi pajochi kamta, paleung tang u moh.

THEU NAI 17:2

Huna nai khala nichi ly Mosi teng y, “Kaichi ai tui nei ai nai pei,” nanai josei u bo. Mosi my, “Ati mana nai josei u lawh mo? Ati mana nai Areng ai cham u lawh mo?” napi.

THEU NAI 34:9

“Aw Areng, nang ly kai ai paleung no baly, kaichi hawi vanrei chei ai nai kang takeng. Hini khumichi ly paleung tang nai cheng ne; na i py kaichi i sa tamang nai hawi kamngo naichi pahen pi kyh ly kaichi ai nang i khumichi ne, nanai palawn teang kyh ba,” napi.

ISAIA 12:6

Zion i khumi bawibawichi ai palo nai khulym thui hai u! Israela chengchi i chai parai nai Tameuh ly nang parai nai ne iy, mymy i khumichi theung y awm nai ne.”

MIKHA 3:11

Mary y peang nai khumichi ly un tangka cha iy, peang u. Pathyp pi nai keungchi ly vang nga ai nai i vui y reita leuchi patiu pi. Amochi ly tangka la iy amteng hai nai leu thui pachai u. Nichi bawibawi my Areng ly nichi hawi vanrei awm, nanai thui u. Nichi my, “Kaichi teng y patang naira tym pajau y, Areng ly kaichi hawi vanrei awm nai ne,” nanai thui u bo.

Kati Nai 14:22

hini khumichi theung i amimi py huni pri y kun ai nai ngo y; nichi ly kai i nang parai nai kangvang sangso py, Aikupta pri hawi daichi ka-vym theung y kai i sa nai rengrang tlai naichi niu teu i py, nichi ly kai ai tahm khai y jojo iy, kai i leu py tangai u y.

Kati Nai 20:13

Hini ly Meriba meingtym y avum nai saichi ne; Israela chengchi ly Areng ai josei nai hawi, mymy ly kachai ne, nanai nichi teng y amteng hai nai meingtym ne.

Kati Nai 20:24

“Aron ly dei ai; ni ly Israela chengchi teng y pei ai nai kaimy adeu nai pri y kun ai nai nga ai ny y; ati mana nai mo na baly nangni leaung nyhrei ly Meriba meingtym y kai i leu pei nai tangai hawi y nai deaungkho y ne.

Kati Nai 27:14

ati mana nai mo na baly nangni leaung nyhrei ly Zin daichi ka-vym y kai i leu ai ei hawi nai deaungkho y ne. Meriba meingtym y khumi mipuichi my kai ai hawi y nai thui iy josei u nai khala, nangni ly nichi i mo y kai i sa thai naira ai tahm khai hawi y bo,” napi. (Meriba ly Zin daichi ka-vymra i Kadesa meingtym y awm nai tuino ai thui nai ne.)

JOHAN 1:14

Naibaly Leu ly ngan lawn i, pahen naira hawi leu meitang hawi kawi iy, achi teng y awm bo: Ampo i Chapo leaungrei awm khyh nai nang parai nai sai kamta, achi ly mymy i nang parai nai sai niu bo.

Leu Thui Nai 31:17

Huna nai khala kai ly kado theu iy nichi ai khai su ai, naibaly nichi ly tama u ai. Nichi ly ka-jei awm nai patangrachi avum u ai. Huna nai khala nichi i Tameuh kai ly nichi hawi vanrei awm pi y nai deaungkho y, hina nai ka-jeirachi avum nai ne, nanai nichi pany u ai.

Leu Thui Nai 33:8

Levi theaung ai patyp iy thui nai ly: “Aw Areng, nang i kangai ly nang ai ka-ym awm nai Levi theaung dengdairei, Urim hawi Thummim saho y nangmy i kangai amteng hai bo; nang ly Massah meingtym y nichi ai ka-ym awm mo, by y mo cham iy, Meriba micheaung y nichi ka-ym awm, nanai pany bo.

Leu Thui Nai 6:16

Nangchi ly Massah meingtym y sa nai kamta ly nangchi i Areng Tameuh ai ly cham u moh.

Leu Thui Nai 9:22

“Nangchi py Tabera meingtym, Massah meingtym, Kibroth Hatava meingtym y awm nai thym khala py, Areng Tameuh ai kado theu hai u bo.

JOSUA 22:31

Huna nai khala pathyp pi nai keung Elaza i chapo Phineha my, “Areng ly kaichi hawi vanrei awm, nanai kaichi vai, kapany u bo. Mymy ai tiu y nai deaungkho y, Israela chengchi ly Areng my pajeng naira i nai lawi naira nga u bo,” nanai nichi teng y thui pi.