Na i py nang ly patang naira avum naichi ai niu takengkei iy, sabawm ai nai avawrei angveirym nai ne. Jeaungmang nai khumichi ly amymy ai nang teng y a-au reng.
Aw Tameuh, nang ly pathang pi reng nai deaungkho y, kai ly nang teng y chiu kang sa; hunai deaungkho y kai mang y hi iy, kai i chiu sa nai raawichi tangai pi kyh ba.
Kai i hnei takeng nai tangai pi kyh ba! vaimy kai ai atleu kyh ba! Kai ai ama hai ai nai, kai i abyhra lengseaung ne. Ang sabawm ai nai kai i lengseaung yhm ne.
Aw Areng, kai ly atho di iy, jeaungmang nai khumi ne i py, nang ly kai ai pany pi jo nai ne. Nang ly kai i atleu keung, kai i Tameuh ne; kai ai sabawm ai nai jeu kaliki ba!
Aw Areng, vai kaichi i hnei nai tangai pi kyh ly kaichi ai khen ba. Tameuh kangheng napi nai nang ai thui tamawn nai keung Senakheri i thui nai ngiereichi tangai cham.
Kai ly khusang deaungdu verei sa nai ne. Paleung apanem iy uikheih naichi hawi, kai ai jei hyn naimy kai i leu tangai nai khumichi ai kai ly khrei nai ne.
Aw Tameuh, kaichi i hnei takeng nai tangai pi kyh ba. Kaichi ai khen ly nang i amyn hawi sa nai huni mary i patang nai ai, pany pi kyh ba. Kaichi ly kaimychi i hawi nai, kateng sa nai molam y ny y naimy, nang i pahen naira len parai nai saho y chiu kang sa.
“Khumi kamawnchi teng y Satang Kahawi thui ai nai ang khai takhra nai deaungkho y, Areng i Phailo ly kai i tlang tleaung y awm; Miseaungchi teng y alaw hai ai nai leu hawi, Mei kamjuchi teng y mei angvang teang ai nai leu thui ai nai py, Ana patang naichi ai patheu ai nai py,
Amjo amnau ngai parai naichi awi, khen u cham; Tameuh my hini khaileaung pri i khumi kamawnchi ai ly ym naira y nang ai nai hawi, mymy ai tamen nai keungchi teng y pri adeu nai ly amtym ai nai py vawi nai ny y a?