SAM 20:7 - Khumi Common Language Bible

⁷ Phyrei khumichi ly mychi i tavai ka-ri hawi keaungngochi ai a-ym u. Na i py achi ly achi i Areng Tameuh ai a-ym u nai ne.

SAM 20:7 ပူးပေါင်းရင်းမြစ်များ

2 SAMUELA 10:18

Israela chengchi ly Suria khumichi ai neaung vui bo. Davida i khumichimy Suria tavai ka-ri lu sa nai leaung 700 reichi hawi, keaungngo atang nai risa leaung 40,000 reichi ai tamyh vui iy, paleung ka-e tavailu areng Sobach ai py tamo nga hai bo. Naibaly ni ly tavai keung y my dei nai ne.

2 SAMUELA 8:4

Davida my keaungngo risa leaung 1,700 rei hawi tavaimi leaung 20,000 reichi ai patiu nai ne. Samrang ly ka-ri chungvairei i vui y, keaungngo chungvairei patiu iy, huni bo i keaungngochi ai ly kheu tabai hai pawn bo.

2 NENG SATANG 13:16

Tameuh ly Juda chengchi teng y Israela chengchi ai pajau ai nai pei bo.

2 NENG SATANG 14:11

Asa ly Areng Tameuh teng y, “Aw Areng, nang ly atho awm nai tavaimi kamkawm ai sabawm nai kamta, atho di nai tavaimi kamkawm ai py sabawm pajau. Aw kaichi i Areng Tameuh, kaichi ly nang ai paleung pado naimy nang i amyn y a-ym iy, hini khri pa-rei nawi nanai tavaimi kamkawm ai tiu ai nai theu u nai ne. Aw Areng, nang ly kaichi i Tameuh ne. Nang ai ly ami my py tiu pajau y leang,” nanai chiu sa bo.

2 NENG SATANG 32:8

Ni mang y khumichi i sa thai naira naini awm khyh; achi mang y ly ang sabawm iy achi i tavai atiu naira y abawi nai achi i Areng Tameuh awm,” napi. Hina nai samrang i leu deaungkho y, khumichi ly atho nga u bo.

JOBA 39:11

Nang ly ni i atho len nai ai a-ym pajau a? Nang i kalop kalen ai ni teng y au pajau na a?

SAM 28:8

Areng ly mymy i khumichi ai ama hai iy kry bo. Mymy khai takhra pi nai samrang ai ama hai iy atleu nai ne.

SAM 45:17

Kai i khulym ly nang ai deungtasarei amtheaung hai ai; khumi bawibawichi my py, nang ai ang palo u jojo ai.

LEU KACHENG 21:31

Khumichi ly tavai atiu ai nai vui y, keaungngochi angveirym pajau. Na i py eaung naira pei nai keung ly Areng ne.

ISAIA 30:16

Huna nai tangai ai nai tleaung y ly rang parai nai keaungngochi atang iy, paleung ka-echi teng i dengdairei preang ai nai dawn pasym u nai ne. Nangchi i ka-dawn ly hawichy y! Ati mana nai mo nabaly nangchi ly preang u takengkei ai tla nai deaungkho y ne. Nangchi ly nangmychi i keaungngochi ai rang parai, nanai athang khai u teu i py, nangchi ai ang hui nai nichi i keaungngochi ly rang keh ai.

ISAIA 31:1

Aikupta pri mang y kasabawmra hnei ai nai chei naichi ly taham si! Nichi ly keaungngochi, tavai ka-richi hawi keaungngo atang nai risachi, napi nai Aikupta pri i tavai atho len nai ai ym u nai ne. Na i py Israela chengchi i chai parai nai Areng Tameuh ai ly ym u y. Kasabawmra nga ai nai mymy teng y py hnei u y.

JEREMIA 17:5

Areng my, “Khumi ai py, dei thai nai khumi i haiho ai py, ym iy kai ai nithun thun nai khumi ai py kaimy amsawi lawi hai ai.

1 SAMUELA 13:5

Philistia chengchi ly Israela chengchi ai tiu ai nai akachu u. Nichi teng y keaungngo ka-ri 30,000 rei, keaungngo atang nai risa leaung 6,000 reichi hawi, pangli peang i spryh kamta kati pajau y na pa-rei, nawi nanai tavaimi risachi awm. Nichi ly amsa u i, Bethavan nisi mang i Mikhama mary y tai u bo.

1 SAMUELA 2:10

Areng i paleung ka-echi ly tama naira avum ai; nichi i tlang tleaung y kani pajyh hai ai. Areng ly khaileaung pri verei y tara chih ai; mymy ly mymy i vawi takhra nai samrang ai sa thai naira angym hai iy, mymy i khai takhra nai khumi ai eaung naira pei ai,” nanai thui bo.