Hini satang ly tengpang sahawi prichira y awm nai, kaichi i paleung ka-echi my thai nai khala ly mymychi tahm anem bo, nanai apany u bo. Ati mana nai mo na baly hini kalop amcheang vui nai ly Tameuh my sabawm nai saho y ne, nanai khumi luteng pany nai deaungkho y ne.
Mymy i aju hawi ahawichi teng y my i avum nai leaungsai bawibawichi amti pi. Huna nai khala y aju hawi mymy i ahawi kachengchi my, “Nang ly Modekai teng y sum amteaung bo; ni ly Juda cheng ne khyp lawh baly nang ly ni ai pajau y leang; ni ly nang i tlang tleaung y pajau takengkei ai,” napi u bo.
Hunai deaungkho y Juda chengchi ly paleung ka-echi i tlang tleaung y ngai nai kamta sa pajau; huna nai y nichi ly paleung ka-echi ai haisau hawi tleh u bo.
Na i py Areng my, “Kai ly Zion mawi hawi Jerusalem mary y sa ai awm nai kalop sa pajau bo nabaly, Asuria empara samrang teng y my i amlyh nai hawi paleung len nai molam y kamngo pajeng ai,” napi.
Jerusalem mary y tiu u nai khumi cheng cheaungkhangchi ly amang mang y teicha teineichi cha ai nai nga iy, anglaw nai neng khala y kajeu alam kari alam veangveang nai kamta py, amang mang y tui nei iy i anglaw nai neng khala tui ahai nai ly tui ahai veangveang nai khumi hawi py atawm ai.
Khumi cheng neangneangchi ly nangchi ai tiu ai nai, jeu achu u bo. Nichi my, “Jerusalem mary taphra u sina! Achi ly mary kaphra niu nai deaungkho y amo theu u ai!,” nanai thui u bo.
Na i py huni neng khala y kai ly Jerusalem mary ai, ji parai nai lengseaung pui kamta lawm hai ai. Huni lengseaung pui ai atho sa iy kateang nai khumichi ly no nga u ai. Khaileaung pri y awm nai khumi cheaungkhangchi ly huni mary ai katanmeuh iy tiu u ai.
“Naibaly kai ly Juda nupaichi ai, kangmaru mai kamta py, choh myn jawn nai hlau y kang nai mai kamta py lawm hai ai. Nichi ly mychi tengpang sahawi i awm nai khumi cheng bawibawichi ai tamyh u pawn ai. Jerusalem mary i khumichi ly mychi i mary theung y chymme naimy awm u ai.