Sa ta-li nai kamngochira i nai py chai hai kyh ba. Huni sa tamang naichi ly kai ai peang moh sy. Huna nai khala naini kai ly kamngo by y ai i, kamngo so bi y ai.
“Leu meitang pany nai khumichi awi, kai i patiu pi nai leu ai dawn thleng nai khumichi awi, kai i thui nai leu tangai u. Nangchi ai kangji kangai pei iy, khumichi my thui tamawn nai khala jei u mo?
Nangmy leu pei nai khala y kai ly hawihai palai tangai nai ne. Nang i leu pei naichi ly kai i paleung ai kawn hai nai hawi amo theu hai naira ne. Ati cheaungkhang sa thai nai Areng Tameuh, kai ly nang i amyn apu nai ne.
Hunaibaly mymy ly nini hawi chei kathiu i, Nazaret avang y tym iy, nini i leu tangai jojo. Naibaly amhm my ly huni atiti bawibawi ly mymy i paleung theung y pateung me jo.
Krista i leu ly cheng naira bawibawi y nangmychi y awm mamang sy; samchi hawi, khulymchi hawi, phailo ai kawn hai nai khulymchi py teaung nai apatiu u iy, mang mang aparip u leungtang ly, paleung y pahenra awm u iy Tameuh ai ly khulym thui pi u.