Parip nai leu 2:14 - Khumi Common Language Bible

¹⁴ Khumi kachengchi ly mymychi i chei ai nai lam niu u teu i py, khumi ka-khumchi ly niu u y,” napi. Na i py khym taham ly achi bawibawi i vui y ajeng jo nai ne, nanai kapany.

Parip nai leu 2:14 ပူးပေါင်းရင်းမြစ်များ

SAM 19:10

Hunichi ly muku tleaung y hawi, hawi keh nai muku tleaung y py khrei ai nai hawi parai. Hunichi ly hawi keh nai khawi hang tleaung y py tui keh.

SAM 49:10

Khumi kachengchi py, akhum iy katau by y naichi py, dei nai lam y en vui pajau y, nanai ami mi py pany pajau nai ne. Nichi bawibawi ly mychi i yhmtheaung katuichi ai katu chanauchi i vui khai pi ai tla nai ne.

SAM 49:11

Vaichi khala nichi ly khaileaung peang nai keungchi ne lawh teu i py, vai i neng y ly tapreaung angawmchira naini, huni khumichi awm jojo ai nai deungtasarei yhmchi lawm bo.

LEU KACHENG 14:8

Lulip pany nai khumi ly ati mana nai y khumi kacheng lawm mo? Ati mana nai mo nabaly ni ly mymy i sa ai avo nai sai pany nai deaung kho y ne. Cheng naira by y nai khumi ly ati mana nai y khumi ka-khum lawm mo? Ati mana nai mo nabaly ni ly mymy pany y pui naimy, pany ka-awi sa nai deaungkho y ne.

LEU KACHENG 17:24

Tau cheng naira awm nai khumi ly cheng naira ai mo patheung reng; na i py khumi ka-khum i mei ly meingtym tleirei y khen aki prei reng nai ne.

Parip nai leu 2:16

Khumi kachengchi ai ami my py pany jo y, khumi ka-khumchi ai py ami my py pany jo y leang. Mo mang i neng y achi bawibawi ai py tami pawn veng ai. Khumi kacheng, khumi ka-khum, nanai patleh takhra y naimy achi bawibawi ly dei u ai.

Parip nai leu 3:19

Khumichi hawi amso tawnbawichi ai patleh takhra y naimy, khym taham my ly ajeng rym nai ne. Khumi ly amso tawnbawi kamta dei ai; huni amjy nyhrei ly Tameuh my sa nai heng nai amjy ne. Khumi i heng nai ly amso tawnbawi tleaung y hawi keh nai ny y leang. Ati mana nai mo nabaly huni heng nai amjy nyhrei ly ati sai py ny y nai deaungkho y ne.

Parip nai leu 6:6

Saneng sang nyhrei heng teu i py, amo theu naira ngo y naimy heng nai khumi tleaung y, huni pahaw nai deaungdi ly awmnem naimy anawnra nga lawh bo. Kangkhym y nini ly meingtym harei mang y chei ai tla nai ny y a?

Parip nai leu 6:8

Khumi kacheng ly khumi ka-khum tleaung y ati katlen nai awm mo? Khumi kamawn ly heng nai deung y avum thai nai ly ati kamranra nga mo?

Parip nai leu 7:2

Sih tlaiveu keung y chei nai ly cha nai pawira chei nai tleaung y hawi keh; ati mana nai mo nabaly dei naira my achi bawibawi ai ajeng yb jo, nanai heng nai khumichi ly pany jo ai avo nai ne.

Parip nai leu 8:1

Khumi kacheng naini khaileaung pri i atiti awm nai sai pany nai ne. Tau cheng naira ly huni khumi i meimai y panuiyhm nai amteng hai iy, meimai takhuisui nai tama hai bo.

Parip nai leu 9:11

Kai i pany nai takhra leaungsai harei nai ly hini ne he: hini khaileaung pri y angpreng rang parai nai khumi ly ampreng acham naira tleirei y eaung jojo ai, nanai thui pajau y; sorai paleung awm nai khumi ly tavai atiu naira y eaung jojo ai, nanai thui pajau y; khumi kachengchi ly teicha teinei avaw vai y ai, nanai thui pajau y; tau cheng nai khumi ly nang jojo ai, nanai thui pajau y; sa thai naira awm nai khumi ly kalop kalenra y atheng jojo ai, nanai thui pajau y nai ne. Khumi luteng ly taham si naira avum reng.

Parip nai leu 9:16

Tau cheng naira ly tlang atho tleaung y hawi keh, nanai kai ly avawrei thui nai ne. Na i py huni khumi kamawn ly tau cheng naira awm, nanai ami py athang khai y, ni i thui nai leu ai py tahm khai u y.

I JOHAN 2:11

Na i py amy i amjo amnau ai niu ngai y nai khumi ly kaveng y awm iy, kaveng y tako nai py ne teang; kaveng my ly mymy i mei ai paju hai nai deaungkho y mymy ly amy i tako ai nai lam py pany y.