Areng i leu ly angym be pa-rei hawi nai deaungkho y, paleung hawi phailo ai kangtha lawm hai reng nai ne. Areng i patiu pi nai saichi ly ym ai hawi parai nai ne i, pany thai y naichi ai pany hai bo.
“Khumi ka-khumchi awi!, nangchi ly mana tanrei akhum naimy awm ai nai ngai u nai mo? Nangchi ly cheng naira ai mana tanrei mei aniu y nai sa iy, amo theu u ai mo? Nangchi ly mana khala py, ka-dawn pany u vau nai by y na mo?
Pany nai sai angym y nai khumichi ly cheng naira ai khai u su nai deaungkho y dei u ai. Khumi hawi y naichi ly ati sai py dawndan y naimy heng u rumrang nai y tama u nai ne.
Angjeng atyp parai nai hlau sa nai khumi ly choh bai palo neangneang nga; na i py khumi hawi y nai ly ati sai py ny y nai kalopchira y neng pasum reng.
Paleung len nai khumi ai ly khyh pakhau iy parip ba. Huna khala naini, tau padi nai khumi ly pany thai ai. Tau cheng nai khumi ly parip naira avum nai khala, cheng naira nga ai.
Tau cheng naira awm nai khumichi ly mychi patang naira avum ai nai niu yb veng nai deaungkho y, asyn vui thai nai ne. Tau cheng naira by y nai khumichi ly patang naira hawi apadawi-ra i, uikheih u bo.
Tau cheng nai khumi ly ka-jeira avum ai nai pany yb i, asyn vui thai. Na i py tau cheng naira by y nai khumi ly ka-jeira hawi apadawi-ra naimy avum i, huni bo y uikheih naira nga nai ne.
Areng my, “Kai i khumichi ly akhum parai; nichi ly kai ai pany u y. Nichi ly hawi y nai deaungdichi hawi atawm; nichi teng y pany thai naira by y. Nichi ly hawi y sa naira y kyh chawn u teu i py, kahawi sa ai nai ly kawp u y,” napi.