Kai i miseaung neampacho neampachy ly kai i tlang tleaung y paleung angai y nai sai thui nai khala, kai ly tangai iy nichi i tlang tleaung y kahawi sa pi nai ne.
Bym pa-rei cha ai nai nga iy veung py hawi u bo. Nichi ly hawi y naichi ai tem-ma by y pa-rei sa u nai ne. Nuro nukaichochi ai nichi i nga ai avo nai phychi py pei pi y. Pahyp y naimy ana naira avum naichi ai py, adyh adawi hai y.
Nang teng y awm nai mary theung i amimi py, amhm ampo ai tahm khai nai by y. Nang teng y awm nai cheng takhra khumichi ai nang ly li-tapawp iy, neampachy lumaichi hawi nurochochi ai ana bo.
Amjo amnauchi awi, ami my kamngo ati py sa nai thym khala y theaugma nai awm khyly nangchi phailo mang y, asa naichi awi, “Kai py parawi naira avum teang lawh na,” nanai hawihai atyp u nai tarawi y huna nai khumi ai ly leu kanem chy y my angdo hai u.
Vang teng y nai khumi, Nabala i leu ai ly dawndan pi moh ba. Ni ly my i amyn hawi kamlau khumi ka-khumne! Aw areng, nang i miseaungchi jeu nai neng khala y, kai ly yhm y by y.