KOLOSA 1:10 - Khumi Common Language Bible

¹⁰ nangchi ly atiti kahawi sa nai cheaungkhangra y athai iy, Tameuh ai pany naira y py chawn ryh chawn ryh iy, ati cheaungkhangra y mymy i paleung i kangai sa ai nai, Areng teng y abang ai ataing nai lawn u thai ai nai, chiu kang sa pi nai hawi kang hnei pi nai py anawn y leang.

KOLOSA 1:10 ပူးပေါင်းရင်းမြစ်များ

LEU KACHENG 16:7

Areng my kawn hai ai nai asa nai khumi ly my i paleung ka-e ai malawn py, ahawi ka-dawi lawm hai pajau ai.

ISAIA 53:11

Ni ly no patangra i nai amo theu naira nga ali teang ai. Mymy i patang nai ly jawm ny y, nanai pany ai. Ni ly kai i miseaung kahawi ne iy, mymy i tlang tleaung y kawn parai. Khumi neangneangchi i kamngo mynji pho iy, huna nai sa nai molam y, huni khumichi i kamngo kaimy pahen ai.

DANIELA 12:4

Ni my kai teng y, “Aw Daniela awi, nang ly huni cha-iu pakhym vui ly khaileaung pri tem nai neng ryrei, huni salo y pajawp typ nai ka-ma-ra nip typ ba. Hina nai thym khala y khumi neangneangchi malawn py, huni leaungsaichi tym nai pany thai ai nai, atho sa u atyhtyh ai,” napi.

MIKHA 4:5

Khumi cheng bawibawichi ly mymychi i tameuhchi ai chiu u akyhkyh iy leu tangai u teu i py, achi ly achi i Areng Tameuh ai deungtasa khrairei chiu iy leu tangai ai.

HABAKKUK 2:14

Panglichi ly tui my kawi nai kamta, khaileaung py Areng i nang parai nai ai pany nai hawi kawi naimy awm ai.

JOHAN 15:16

Nangchi my kai ai vawi nai ny y leang, kaimy nangchi ai vawi nai teu; nangchi ly kai i amyn y Ampo teng y ati cheaungkhang hnei nai ngierei ly ang pei ai nai, nangchi ly chei iy athai ai nai hawi, nangchi i athai awm jo ai nai py kaimy kang khai takhra bo.

JOHAN 15:8

Nangchi neangneang athai baly Ngaai ai ly palo u nai ne; hunaibaly nangchi ly kai teng y abangnaichi lawn u khyp ai.

JOHAN 17:3

Nang, Tameuh meitang leaungrei awm khyh nai ai hawi, nang i pato nai Isu Krista ai pany nai ly deungtasarei hengra ne.

ROM AVANGCHI TENG Y PAWLA I CHA PA NAI 1:13

Naibaly amjo amnauchi awi, Cheng Takhra takhrachi theung y kai i athai kanga nai kamta ly, nangchi theung y py athai kanga thai ai nai kai ly nangchi teng y tlen neangneang kang jeu ai nai tau bo, nanai nangchi pany y ai nai kangai y leang; na i py vai khrairei kai ai ang paka jojo.

ROM AVANGCHI TENG Y PAWLA I CHA PA NAI 4:12

Naibaly lengkhym takip nai harei khyh ny y naimy, achi i amsi pajo Abraham ly lengkhym takip y rai kha i ym nai kamta tako teang nai lengkhym takip naichi i ampo lawn thai ai nai py sa nai ne.

ROM AVANGCHI TENG Y PAWLA I CHA PA NAI 6:4

Hunaibaly Ampo i nang parai naira my Krista ai kadeichi theung i nai pathau nai kamta, achi py heng naira kangtha y tako thai ai nai, achi ly baptisma nga naira y mymy teng y up teang nai bo.

II KORINTH 2:14

Na i py Tameuh teng y kawn nai leu tym sy; mymy ly Krista hawi vanrei pajau naira y ang pahawi jojo nai keung hawi, kaimychi ai ang teaung nai meingtym tleirei y mymy ai pany naira i mui amteng hai nai keung py ne.

II KORINTH 4:6

Isu Krista i meimai y ly Tameuh i nang parai nai sai pany naira kangvang kaichi ai ang pei ai nai, “Kangveng i dengdairei kangvang theu ai,” napi nai keung Tameuh ly kaichi i paleung y kangvang ang ko hai veng bo.

II KORINTH 5:9

Hunai deaungkho y kaichi ly awm iy py, awm y iy py mymy i kawn nai khumi lawn ai nai tau cheng nai ne.

II KORINTH 9:8

Naibaly nangchi ly ati cheaungkhangra y hawi khyp naimy awm u jojo iy, kalop kahawi cheaungkhang i vui sa naira bawn u thai ai nai, Tameuh ly nangchi i tlang tleaung y pahenra cheaungkhang ang bawn hai pajau.

EPHESI 1:17

mymy ai pany naira y cheng nai hawi, hawihai pany nai phailo ang pei thai ai nai, kai i chiu sa naira y ly nangchi ai chiu sa hai iy, nangchi i tlang tleaung y kawn nai leu thui nai ly ka-nawn y leang;

EPHESI 2:10

Achi ly mymy i kiu i theu nai ne i, achi ai atiti kahawi sa ai nai vui Krista Isu y ly sa nai ne, huni atiti sa naira y achi i tako ai nai Tameuh my sa rym nai ne. nai

EPHESI 4:1

Hunaibaly kai, Areng y theaung tla nai khumi my ly nangchi ly apanem nai hawi leu anui naira bawibawi hawi, tamen naira akham leungtang nai tarawi y amnym naira hawi,

EPHESI 4:13

Krista i tlang amcheang hai ai nai py, phyreichi ai ly amtaw thau naichi lawn ai nai py, phyreichi ai ly leu thui nai keungchi lawn ai nai py, phyreichi ai ly Satang Kahawi thui ai nai keung lawn ai nai py, phyreichi ai ly Pastor hawi patiu ai nai keung lawn ai nai py pei bo;

EPHESI 5:10

ati mana nai mo nabaly kangvang i athai ly hawi naira hawi atiti kahawi sa naira hawi, leu meitang bawi bawi y py awm.

EPHESI 5:15

Hunaibaly nangchi ly khumi cheng y naichi kamta awm u y naimy, khumi kachengchi kamta awm u iy, nangchi i tako nai sai amkym u;

EPHESI 5:2

Naibaly Krista my ang tamen nai hawi, Tameuh teng y miu katui lawn ai nai atiti talam naira hawi apathyp naira y achi i jeng y ang pei nai kamta ly tamen naira y tako u.

PHILIPI 1:11

Tameuh ai tahm pasang ai nai hawi palo ai nai py, Isu Krista i saho y hawi naira athai nai ly kawi nai awm u.

PHILIPI 1:27

Ati py ne sy nangchi i amhi amtlau nai sai ly Krista i Satang Kahawi hawi amlau sy; hunaibaly kai ly nangchi ai kang de iy py, nangchi teng y kang awm y teu iy py, nangchi ly phailo y vanrei kakhaw angdo u iy, paleung vanrei my Satang Kahawi ym nai leu y sa ahawi nai, tiu nai keungchi ai ly ati ra y py jei y naimy awm u, nanai nangchi i satang kapany pajau ai;

PHILIPI 4:18

Na i py kai ly ati cheaungkhang awm i, awm mamang bo; Epaphrodita i kiu y kai ai nangchi i atiti pa naichi ly kanga i, angym bo. Huni ly atiti mui katui, apathyp naira kawn ai ataing nai, Tameuh i ka-kawn ne.

KOLOSA 2:19

huni Lu i saho y ly tlang bom verei ly lenglawchi hawi kananchi deaungkho y pacho nai amtawm achu nai awm iy, Tameuh i veang naira y veang lawh veng.

KOLOSA 2:6

Hunai deaungkho y nangchi ly Areng Krista Isu ai kawn u nai kamta ly, mymy y tangjyn pala nai hawi adyh kalau ryhryh nai awm iy,

KOLOSA 3:20

Deaungdichi awi, cheaungkhangra y nangchi i ngamhm ngampo i leu tangai u, huni ly Areng y ly kawn ai awm nai ne.

KOLOSA 4:5

Ka-vo sa pi nai ly pasum u y iy, angam mang i khumichi teng y ly cheng parai naimy awm u.

I THESALONIKA 2:12

nangchi leaung leaungrei ai pachei py kang pachei, awm py kang awm hai nem, leu py hawihai palai kang pany hai, nanai nangchi ly pany u veng bo.

I THESALONIKA 4:1

Hunaibaly amjo amnauchi awi, kangkhym i naira y ly nangchi i awm ai avo nai sai hawi, Tameuh ai kawn hai ai avo nai sai ly kaichi teng i dengdairei nga u nai kamta ly (ne mang ly nangchi ly hunai kamta awm nai bo) awm ra awm ra ai nai, kaichi ly Areng Isu y takeng nai kang pachei nai ne.

II TIMOTHEI 2:4

Tavai mi ami py ni ai tavaimi y awm ai nai vawi nai keung ai ly kawn hai ai nai, atiu nai thym khala y ly vai i heng nai sala kani tleirei i sa nai sai amymy ai paka ai nai pei y.

TITA 3:1

Pri peang naichi hawi, aly peang nai keungchi i kangai awm ai nai hawi, leu tangai ai nai hawi, atiti kahawi sa ai nai ngai nai paleung awm ai nai hawi,

TITA 3:14

Naibaly achi i khumichi ly athai y naimy awm y ai nai, avaw iy aeang nai ka-vo takhra takhra i vui y atiti kahawi sa jojo ai nai amtiu u sy.

HEBRAI 11:5

Ym naira deaungkho y Enoka ai ly dei naira pany y ai nai la vui bo; naibaly ni ai ly Tameuh my la vui nai deaungkho y mymy ai niu pajau y bo; naibaly lo vui y rai khala y my ni ly Tameuh i mei kangai awm nai khumi ne, nanai pany hai angchi yb nai bo.

HEBRAI 13:16

Na i py atiti kahawi sa ai nai hawi, atiti paawh y naimy tami u moh, hunai kamta apathyp naira y ly Tameuh ly khrikhri paleung hawi na.

HEBRAI 13:21

mymy i mei ka-niu y mymy i kawn nai ngierei Isu Krista i saho y achi ai sa hai iy, mymy i kangai sa ai nai atiti kahawi cheaungkhangra y nangchi ai angym hai sy; mymy teng y nang parai naira deungtasarei awm sy. Amen.

II PETERA 1:8

Hunichi ly nangchi i ne iy peung dudu lawh baly, achi i Areng Isu Krista ai pany naira ly nangchi ai atho si y nai hawi, athai y nai ny y nai py ang sa hai reng nai ne.

II PETERA 3:18

Huni ny y naimy achi i Areng hawi Paheng Keung Isu Krista i pahenra y hawi pany naira y py veang u. Vai hawi deungtasa tym pa-rei py mymy teng y nang parai naira awm sy. Amen.

I JOHAN 3:22

hunaibaly achi ly mymy i leu pei naichi patawm iy, mymy i mei ka-niu y atiti kawn ai awm naichi sa reng nai deaungkho y, achi i hnei nai ngierei ly mymy teng i dengdairei nga jojo.

I JOHAN 5:20

Naibaly achi ly meitang khyp nai keung pany i, mymy i Chapo Isu Krista meitang khyp nai keung y achi awm, nanai ly Tameuh i Chapo ly ang jeu iy achi ai pany thai naira ang nga hai bo. Huni ly Tameuh meitang khyp nai hawi, deungtasarei hengra py ne.

III JOHAN 1:6

nichi ly palau takhra kamkawmchi i mo y nang i tamen nai sai pany hai bo; nang ly nichi ai mymychi i khuleaung chei naira y Tameuh ai tahm khai nai kamta sabawm baly hawi ai;