JEREMIA 7:6 - Khumi Common Language Bible

⁶ Pri takhra chochi, nuro nukai chochi hawi neampachy lumaichi tlang tleaung y kho sa iy, kamran hau u moh jau. Hini kachai meingtymra y khumi kahawichi ai tleh u moh jau. Tameuh takhrachi ai chiu nai ly nangchi ai phra hai nai deaungkho y, huni chiu nai ly anawn u.

JEREMIA 7:6 ပူးပေါင်းရင်းမြစ်များ

2 ARENG KEH 21:6

Ni ly my i chapo ai py leng patlum nai katalamra palawn iy apathyp nai ne. Dawi kawp naichi hawi mo mang i satang thui kawp naichi amtiu iy, leung sarachi, vawinam pakun kawp naichi hawi amkawm. Ni ly Areng i tlang tleaung y khri pa-rei kamngo sa i, kado patheu nai ne.

2 ARENG KEH 24:4

mymy mei ka-niu i dengdairei, patheu pawn ai ngai nai deaungkho y, hina nai kamta sa nai ne. Huni kamngo molam y Areng ly Manase ai kamngo pahen pi y bo.

SAM 106:38

Nichi ly kamngo by y nai mychi i cho chanauchi kypkyp ai tleh iy, Kanan pri mynchi teng y talam u i, mychi i pri y chai hai y bo.

LEU KACHENG 23:10

Mana khala py khaileaung khujyh kangngym ly kasyh vui moh. Nurochochi i khaileaung ly lo pi veng moh.

ISAIA 59:7

Nangchi ly hawi y nai sai sairei dawn jojo naimy, kamngo sa ai nai ajeng u keaung na. Kamngo by y nai khumi ai padei ai nai kiu patyh y. Nangchi tym nai meingtym tleirei y, phra nairachi naini awm jo nai ne.

JEREMIA 13:10

Huni khumi hawi y naichi ly kai i leu tangai y; paleung tang ra i tameuh takhrachi ai chiu iy kalop sa pi u nai ne. Hunai deaungkho y teaung ai ngo y nai akeng kawm nina kamta lawm u ai.

JEREMIA 19:4

Ati mana nai mo nabaly khumichi ly kai ai khai su iy, Mymychi naimy mychi i amsi pajochi hawi, Juda samrangchi pany vai y nai tameuh takhrachi teng y apathyp nai molam y, hini meingtym y chai nem hai y nai deaungkho y ne. Nichi ly hini meingtym y kamngo by y nai khumichi i thi kawi hai iy,

JEREMIA 2:30

Kai ly nangchi ai kang parip i py, kamran by y. Nangchi ly thui rip nai ai ngai u y. Khri pa-rei kado theu nai khrangsi kamta, nangchi ly nangmychi i amochi ai padei u bo.

JEREMIA 2:34

Yhm ateng vau iy paviu nai molam y nangchi my patiu ai nai ngo y i py, huni khumi kamawnchi, kamngo by y nai khumichi i thi hawi, nangchi i ateaungchira y abawi hai u nai ne.

JEREMIA 26:15

Na i py kai ai padei ai nai tau u lawh baly, nangchi hawi hini mary i khumi bawibawichi ly kamngo by y nai khumi ai padei nai molam y kamngo tla u ai, nanai hawihai palai apany u. Ati mana nai mo nabaly kai ai pato iy nangchi teng y hini leu thui hai nai keung ly Areng ne nai deaungkho y ne,” napi.

JEREMIA 26:23

Nichi ly Uriah ai Aikupta pri i dengdairei samrang Jehojakim teng y pahawi ali teang i, samrang ly ni ai padei iy ni i veu ai ly khumichi i tapreaung y aphi hai su bo.)

JEREMIA 35:15

Kai ly kaimy i miseaung amochi ai kang pato pi veangveang bo. Nichi my py nangchi ai nangmychi i hawi y naichi khai su iy, kahawi sa u ai nai ang thui pi bo. Nangchi ly nangmychi i amsi pajochi teng y kaimy pei nai pri y awm u jojo ai nai deaungkho y, tameuh takhrachi ai chiu u y ai nai, nangchi ai kang pany hai nai ne. Na i py nangchi ly kai i leu tangai u y, kai ai py tahm khai u y.

JEREMIA 5:28

Bym pa-rei cha ai nai nga iy veung py hawi u bo. Nichi ly hawi y naichi ai tem-ma by y pa-rei sa u nai ne. Nuro nukaichochi ai nichi i nga ai avo nai phychi py pei pi y. Pahyp y naimy ana naira avum naichi ai py, adyh adawi hai y.

JEREMIA 7:5

“Nangchi i amhi amtlau nai sai takhra hai u; vai i sa nai kamta ly so u bi moh. Nangmychi tengtawi amkawm naira y, adyh adawi naimy awm u.

JEREMIA 7:9

Nangchi ly paviu nai, khumi ai padei nai, ami i aju ai taphra nai, ka-chawi naimy vaineng abeu nai, Bala tameuh teng y apathyp nai hawi nangmychi pany vai y nai tameuhchi ai chiu u bo.

TANGAM NAI LEU 4:13

Na i py huna nai tiu naimy kun nai ly tym chum veng bo. Ati mana nai mo na baly mary i amochi hawi pathyp pi nai keungchi ly kamngo sa tamang u iy, kamngo by y naichi dei u nai deaungkho y ne.

Ezekiela 18:6

huni khumi ly Israela chengchi chiu nai mynchi ai chiu y, mawi saleung i chiu nai meingtymra y apathyp nai mawi py cho y. Ami i aju chanau ai py taphra y, tlangchai awm nai neampachy hawi py apho y.

Ezekiela 22:7

Nang teng y awm nai mary theung i amimi py, amhm ampo ai tahm khai nai by y. Nang teng y awm nai cheng takhra khumichi ai nang ly li-tapawp iy, neampachy lumaichi hawi nurochochi ai ana bo.

Levi 19:33

“Nangchi i pri y awm nai cheng takhrachi ai ano u moh.

Levi 25:17

Nangchi ly nangmychi cheng tengtawi atapawp moh; na i py nangchi i Areng Tameuh ai tahm khai ai nai tla.

MALAKHI 3:5

Ati cheaungkhang sa thai nai Areng my, “Kai ly tara chih ai nai nangchi teng kang jeu iy, dawi sa kawp naichi, ami i aju chanau ai taphra naichi, teng y nai pany hai nai keungchi, amy i kalop sa pi naichi tlang tleaung y sa vang kateng pei y nai khumichi, neampachy lumai, nuro nukaicho hawi cheng takhra khumichi ai kamjau kamteang ana nai khumichi hawi kai ai tahm khai y nai khumi ngiereichi ai, vaimy pany hai ai.

MATTHAI 27:25

Naibaly khumi humchi bawibawi ly, “Ni i thi ly kaimychi i tlang tleaung y hawi, kaichi i chanauchi i tlang tleaung y py awm sy,” napi nai pathang.

MATTHAI 27:4

“Kamngo by y nai khumi ai patiu hai nai ly kamngo sa bo kai ly,” napi. Na i py nichi my ly, “Kaichi i vui ly ati mawn naira awm mo? Nangmy ngaingai so,” napi lawh veng.

Leu Thui Nai 11:28

Na i py nangchi ly hini reitachi patawm y naimy, jangni y nangchi chiu vai y nai tameuh takhrachi ai chiu u lawh baly amsawi lawi ai.

Leu Thui Nai 24:17

“Nangchi ly cheng takhra khumichi hawi nurochochi i nga ai avo nai ly pei pi ai nai tla. Naibaly lumai nu i baichu ateaungchi ka-peaung vawn palawn iy talam pi moh.

Leu Thui Nai 27:19

“Cheng takhrachi, nurochochi, lumai nuchi i nga ai avo naichi sum hai nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

Leu Thui Nai 8:19

Nangchi i Areng Tameuh ai tami vui iy, tameuh takhrachi ai chiu u moh. Huna nai sa lawh baly nangchi ly phra takengkei ai, nanai nangchi teng y vaini kang pany hai nai bo.

JAKOB 1:27

Achi i Tameuh hawi Ampo i mei ka-niu y reita kachai hawi kamngo abawi y nai ly hini he: nurochi hawi neampachy lumaichi ngari patang khala y ly de ai nai hawi, khaileaung pri y kamngo akau y pa-rei akry ai nai py ne.