JEREMIA 5:7 - Khumi Common Language Bible

⁷ Areng my, “Kai ly kaimy i khumichi i kamngochi ati mana nai y kapahen ai mo? Nichi i cho chanauchi ly kai ai khai su iy, tameuh ka-chawichi i amyn y tau iy vaineng abeu u bo. Kai ly kaimy i khumichi ai kajeu kawi pa-rei kapacho teu i py, nichi ly ami i yhm hlau taphra iy, bimachi hawi tamang u bo.

JEREMIA 5:7 ပူးပေါင်းရင်းမြစ်များ

2 NENG SATANG 13:9

Nangchi ly Aron i kangpreang pathyp pi nai keungchi hawi Levi theaungchi ai patheu pawn iy, nichi i meingtym y cheng takhra khumichi i reita teaung iy, khumi takhrachi ai pathyp pi nai keung y khai u lawh bo. Ami py ne sy, si katai amairei, ti y baly beram amai saryhrei syn baly, nangchi i chiu nai tameuhchi i pathyp pi nai keung nga pajau lawh nai ne.

JOBA 31:12

Kai i kanang kachawn ngierei ai, kang hai ai nai mai hawi atawm.

SAM 50:18

Nang ly kangviu hawi avum baly ahawi ka-dawi asa reng; ami i aju chanau ai tamang nai khumichi hawi py, amkawm reng nai ne.

JEREMIA 12:16

Nichi ly kai i chengchi i reita leu ngai iy, vaichi khala Bala tameuh teng y vaineng abeu nai saichi ai nichi ly kai i khumichi teng y patiu pi nai kamta vai ly ‘Areng i heng nai kamta,’ nanai kai i amyn y vaineng abeu u lawh baly, nichi ly kai i khumichi theung y abawi iy nang chawn u ai.

JEREMIA 13:27

Areng ly mymy i amso ngai naichi ai nangchi sa nai niu. Nangchi ly yhm deaungpa i aju ai ngai tahau nai kamta, keaungngo nu ai keaungngo katai my po chiu nai kamta, mawi aheungchi hawi adym angdengra y kangji nang y naimy, bima kalop sa u bo. Jerusalem mary i khumichi awi, nangchi ly taham si! Nangchi ly mana khala y chai u ai mo?

JEREMIA 16:11

Naibaly nichi teng y Areng my, ‘Nangchi i amsi pajochi ly kai ai khai su iy tameuh takhrachi ai chiu u bo. Nichi ly kai ai khai su i, kai i leu py tangai u y bo.

JEREMIA 16:20

Khumi ly amymy chiu ai nai tameuh so thai na a? So thai y leang. Sa lawh teu i py hunichi ly tameuh tatang lawm ai ny y,” nanai Jeremia thui nai ne.

JEREMIA 2:11

Mymychi i tameuhchi ly tameuh tatang ny y teu i py, mani cheng ly tameuhchi ai chiu takhra vui mo? Na i py kai i khumichi ly mychi ai tahm awm hai nai Tameuh, napi nai kai ai ly nichi ai sabawm thai y nai tameuhchi hawi katheung u veng bo.

JEREMIA 2:31

Israela mipuichi awi, nangchi ly kai i thui nai leu tangai u. Kai ly nangchi i vui daichi ka-vym kamta py, kaveng my khiu nai pri kamta py lawm veng bo a? Ti y lawh baly nangchi ly ati mana nai y nangmychi ngai ngai sa naimy, kai teng y mana khala py ali teang y leang bo, nanai thui u lawh mo?

JEREMIA 23:10

Achi i pri ly Areng i tlang tleaung y ka-ym by y nai khumichi hawimy kawi na bo. Nichi ly teng y naichi sa iy, mychi i sa thai naira ai teaung u atyhtyh nai ne. Achi i pri ly Areng i amsawi lawi nai deaungkho y, vo tangam naimy tawnbawichi sui tlai naira py, jengha na veng bo.

JEREMIA 3:19

Areng my leu pei nai ly “Israela awi, kaimy chapo kang palawn iy amo theu ai hawi nai pri, khaileaung pri verei y apu keh nai pri kang pei ai nai ngai. Nang ly kai ai ampo palau iy mana khala py, kai ai nithun thun vui y ai nai, kai ly aly ngai.

JEREMIA 3:8

Israela ly kai ai khai su iy bima kalop sa nai deaungkho y, kaimy khai vui i, kapatheu praw bo. Na i py Israela i tuicho ka-ym by y nai tuicho ly jei y i, mymy naimy bima kalop sa iy,

JEREMIA 7:9

Nangchi ly paviu nai, khumi ai padei nai, ami i aju ai taphra nai, ka-chawi naimy vaineng abeu nai, Bala tameuh teng y apathyp nai hawi nangmychi pany vai y nai tameuhchi ai chiu u bo.

JEREMIA 9:1

Kai ly dei naira avum nai kai i chengchi i vui vum kanithun vo pajau ai nai kai i meichi ly meikatui ly tuino kamta py, kai i lu ly tuikan kamta py, lawm ai ngai parai na bo.

JEREMIA 9:2

Kai ly kaimy i chengchi ai khai su naimy, tui by y nai daichi ka-vym y chei iy awmra meingtym harei ngai parai lawh. Nichi bawibawi ly ka-ym by y iy, khrukhra hai nai khumichi lawm u bo.

TANGAM NAI LEU 3:42

“Kaichi ly kamngo sa tamang u bo; nang ai kang tiu u bo. Aw Areng, nangmy py, kaichi i kamngochi palawi pi y nai ne.

Ezekiela 22:11

Nang theung i phyrei khumichi ly ami i aju chanau ai taphra iy phyrei ly mymychi i lengngo ai py, ampo vanrei amhm takhra nai tuicho lengsangchi ai py parawi iy tamang u bo.

HOSEA 11:8

“Aw Israela, kai ly nang ai mana kang paleang su ai mo? Kai ly nang ai mana khai su thai ai mo? Kai ly Adamah mary ai taphra nai kamta py, Zeboim mary ai tamyh hai nai kamta py, nang ai mana taphra thai ai mo? Nangchi i tlang tleaung y kai i tamen naira ly len parai nai deaungkho y, kai i paleung ly huna nai kamta kaso vam y.

HOSEA 13:6

Na i py nangchi ly tlamsa naira angym nai pri y tym iy, teicha teinei kajeu kawi pa-rei cha ai nai nga nai deaungkho y, paleung tuinem nai khala, paleung len i, kai ai tami u bo.

HOSEA 4:2

Nichi ly leu meitang teaung y nai, ka-chawi thui nai, khumi ai padei nai, ami i yhmtheaung paviu nai, ami i aju chanau ai taphra nai, hunichi sa nai ne. Reita ai dawndan y nai awm ngaulau iy, khumichi ai avaw avawrei padei u bo.

HOSEA 7:4

Nichi bawibawi ly ka-ym by y naichi ne. Tako paawp nai khumi ly tako dei kangheang khai rym khala, mai katei y nai kamta, huni khumichi i niu ngai y nai paleung ly tako paawp nai takeangra i mai kamta bi-um jo nai ne.

Levi 20:10

Khumi neampacho leaungrei ly Israela cheng tengtawi i aju hawi tamang lawh baly, nini leaung nyhrei ai padei mei ai nai tla.

AMOS 8:14

Samari tameuh mynchi napi nai, ‘Dan tameuh’ ai py, ‘Beraseba mary i tameuh’ ai py, tau iy vaineng abeu reng nai khumichi ly ang thau teang pajau y na pa-rei atlym u ai,” napi.

ZEPHANIAH 1:5

Yhm amphu salo y lyn iy kanito, lo, ka-si taukichi ai chiu nai ngiereichi ai, kaimy taphra pawn ai. Kai ai chiu naimy ka-ym awm ai mang, nanai vaineng abeu chum iy Mole amyn y vaineng abeu nai khumichi ai py, katamyh pawn ai.

MALAKHI 3:5

Ati cheaungkhang sa thai nai Areng my, “Kai ly tara chih ai nai nangchi teng kang jeu iy, dawi sa kawp naichi, ami i aju chanau ai taphra naichi, teng y nai pany hai nai keungchi, amy i kalop sa pi naichi tlang tleaung y sa vang kateng pei y nai khumichi, neampachy lumai, nuro nukaicho hawi cheng takhra khumichi ai kamjau kamteang ana nai khumichi hawi kai ai tahm khai y nai khumi ngiereichi ai, vaimy pany hai ai.

I KORINTH 6:9

Naibaly khumi hawi y naichi ly Tameuh i pri amtym y leang, nanai pany u y nai sai a? Tapawp naira y awm u reng moh; angai naichi mo, myn y chiu naichi mo, pajang sa naichi mo, paleaung naichi mo, neampacho tengtawi paleaung naichi mo,

I KORINTH 8:4

Hunaibaly myn y apathyp nai atiti cha nai leu ly pathang si. Khaileaung pri y myn, nanai ly ati sai py ny y nai sai hawi, leaungrei ny y baly Tameuh takhra ha py by y nai sai ly achi pany.

KALATIA 4:8

Na i py nangchi ly huni neng khala y Tameuh ai pany u y nai thym khala y, nangchi ly nichi i awm nai sai y py tameuh ny y pui naichi i miseaung lawn u bo.

Leu Thui Nai 32:15

“Areng i khumichi ly nang ra nang ra nai ne, na i py tiu u lawh; nichi ly veung tlang hawi u, teicha teinei kajeu kawi pa-rei cha ai nai nga; mychi ai sa nai keung Tameuh ai khai su iy, sa thai naira awm nai keung ai hi u vui bo.

Leu Thui Nai 32:21

Nichi i tameuh mynchi hawimy kai ai kado ang theu hai bo; nichi i tameuh tatang ny y nai hawimy kai ai takho ang si hai. Hunai deaungkho y aso ami y nai khumi cheng lawm hai nai hawimy nichi ai kado theu hai ai. Cheng y nai khumi cheng lawm nai hawimy, nichi ai takhosi nai paleung tym hai ai.

HEBRAI 13:4

Khumi bawibawichi ly apom naira ai tahm khai u sy, i ra y py hawi y naira abawi moh sy; angai naichi ai hawi pajang sa naichi ai ly Tameuh my chih ai.

JAKOB 4:4

Nangchi pajang sa nai nuchi awi, khaileaung pri hawi amrawi nai sai ly Tameuh ai paleung ka-e sa nai ne, nanai ly pany u y nai sai a? Ami py khaileaung pri hawi amrawi nai ngierei ly Tameuh hawi paleung ka-e lawn bo.

JOSUA 23:7

Nangchi theung y awm asai nai khumi chengchi hawi amkawm y ai nai py, nichi i tameuh amynchi thui nai, huni tameuhchi i amyn tau nai, lu meung iy chiu naichi so u y ai nai py, adawn patyp ai nai tla.