Huni pri y khumi chungphy horei vi awm ai khyh na lawh teu i py, huni khumichi ly myh kang u ai nai ne. Huni khumichi ly paliu vui nai ngopraibiu keungchi i miukhiuchi hawi atawm ai,” napi. (Dengkeaung miukhiuchi ly Tameuh i khumichi deung kangtha amteaung nai sai pany hai nai ne.)
Hunaibaly sa thai naira angym nai kai Areng ly Israela chengchi ai, nichi tym nai khumi cheng cheaungkhangchi theung i nai pangym achu chum baly, mymychi i saleaung khuteng pri y kapahawi ai, nanai nichi teng y thui pi.
Nichi ly mychi i amsi pajochi awm reng nai pri, kai i miseaung Jakob teng y kaimy pei nai pri y awm u ai. Nichi kamta nichi i cho chanauchi hawi, nichi i kangpreang bawibawichi py, huni pri y awm u jojo ai. Kai i miseaung Davida kamta samrang ly nichi ai peang jojo ai.
Huna nai khala kai i khumichi ly kai ai, mychi i Areng Tameuh ne, nanai pany u ai. Ati mana nai mo na baly kai ly vaichi khala, nichi langheng hawi vui nai avum hai teu i py, vai ly leaungrei py takhawi y na pa-rei pangym iy, mymychi i pri y tha teang nai deaungkho y ne.
Ni i kreip akhochi py hawi hai teang iy, Akhaw, napi nai kamtang leaung hawi ai, athang khai naira katheu lawm hai ai. Ni ly saneng theang nai neng, Aikupta pri i dengdairei theu nai khala i kamta, kai ai tamen ali teang ai.
Na i py Israela khumichi ly nichi i Areng Tameuh teng y py, nichi i samrang Davida i kangpreangchi teng y py, vawi ali teang nai neng tym ai. Huna nai khala nichi ly Areng ai jei kaji naimy tahm khai u ai. Mymy py nichi ai amtheaung naira pei ai.
Nangchi pri pala naira avum nai khumichi awi, vawi u ali teang; athang khai naira awm u bo. Nangchi ly phrumai by y nai meingtym y vawi u teang. Nangchi i avum nai ngari kamtang tleaung y amtheaung naira phy nyhrei nangchi teng y kang pei ai, nanai vai, kaimy kang thui pi bo.