JEREMIA 29:14 - Khumi Common Language Bible

¹⁴ Nangchi ly kai ai avum angchi khyp ai i, kai py nangchi ai nangmychi i pri y kang pahawi ali teang ai. Kai ly nangchi ai ahei hai nai pri neangneangchira i nai pangym ali teang ai. Hunaibaly nangchi ai langheng y hawi ai nai patiu nai pri y, kang pahawi ali teang ai. Hini ly kai Areng i thui nai leu ne,’ napi.

JEREMIA 29:14 ပူးပေါင်းရင်းမြစ်များ

1 NENG SATANG 28:9

Naibaly Solomon teng y, “Deang awi, nang ly nangmy i ampo chiu nai Tameuh ai pany hai iy, ym thai y nai by y naimy paleung apanem nai hawi chiu ai nai kai ly nang ai kalop kang pei nai bo. Mymy ly achi i dawn tau naichi hawi aly ngai nai ngiereichi ai pany pi nai ne. Nang ly mymy teng y ahihawi baly, mymy ly kawn ai. Na i py nang ly mymy ai nithun thun lawh baly, mymy ly nang ai deungtasa ang khai su ai.

SAM 126:1

Achi ai Jerusalem mary y ang pahawi ali teang nai ly amang kamta ne!

SAM 126:4

Aw Areng, kanitui ly tui kang nai tavo micheaungchi ai tui kawi hai teang nai kamta, kaichi ai nang chawn ai nai pei ali teang kyh ba.

SAM 32:6

Hunai deaungkho y nang ai ka-ym awm nai khumichi ly aly aeang nai khala, nang teng y chiu sa hnei takeng ai nai avo nai ne. Khrikhri pa-rei ho nai tui ly nichi teng y tym ai ny y.

SAM 46:1

Tameuh ly achi i abyhra, achi i atho ne; patang naira avum nai khala y, achi ai sabawm ai nai angveirym jojo.

ISAIA 14:1

Areng ly mymy i khumi Israela chengchi ai pahen ali teang nai ne. Mymy i khumichi palawn ai nai vawi takhra ai. Mymy ly nichi ai mychi i saleaung khutengra y awm u ali teang ai nai pei ai. Cheng takhra khumichi ly jeu iy nichi hawi vanrei awm u ai.

ISAIA 43:5

Jei u moh, kai ly nangchi hawi vanrei awm! Kamlo parai nai nisi hawi nidym mang, kangtem keh meingtym dengdairei, nangchi ai nangmychi pri y, kaimy kang hawi ai.

ISAIA 43:6

Nichi theu u ai nai tosyh mang py, nichi ai paka y ai nai tokalawi mang py, kaimy thuipi ai. Khaileaung pri meingtym tleirei y awm nai pri kamlora i, kai i khumichi vawi u ali teang ai.

ISAIA 45:19

Kai ly kangviu kam-ai y kathui y; kaimy i dawn pasym nai py apha vai y. Kai ly Israela chengchi ai khumi angso by y nai meingtym y hau hai nai ny y. Kai ly Areng ne; kai ly ka-ym awm nai leu katheu iy kateng lam kapatei pi reng nai ne,” nanai leu pei nai keung ne.

ISAIA 55:6

Areng ly vai, nangchi sahawi y awm; mymy mang y hi iy hnei takeng u.

JEREMIA 12:15

Na i py kai ly nichi ai huna nai atleu chum baly, kapahen ai. Huni khumi cheng bawibawichi ai, mychi i khu ka-peang mang y hawi, mychi i pri y kapahawi teang ai.

JEREMIA 3:14

“Ka-ym by y nai khumichi awi, jeu u ali teang jau; kai ly nang i juvo ne. Nangchi ai mary harei y leaungrei, nupai harei y leaung nyhrei vawi takhra iy, Zion mawi mang y kang pahawi ali teang ai.

JEREMIA 30:10

“Kai i khumichi awi, jei u moh; Israela khumichi awi, jei nai kaso theu u moh. Langheng y hawi iy nangchi awm u nai pri, huni pri kamlo dengdairei, nangchi ai kaimy atleu ai. Nangchi ly vawi teang iy tlamsa naimy awm u ai. Ami my py nichi ai pajei ai nai nga ai ny y.

JEREMIA 30:18

Areng my, “Kai ly kaimy i khumichi ai nang chawn hai teang iy, kapahawi ali teang ai. Jerusalem mary ai palum teang iy samrang yhm py palum teang ai.

JEREMIA 30:3

Ati mana nai mo nabaly kai i khumi Israela chengchi hawi Juda chengchi ai, kaimy palum teang ai nai neng tym ai nai deaungkho y ne. Kai ly nichi ai, mychi i amsi pajochi teng y pei nai pri y pahawi ali teang ai i, nichi ly huni pri amtym u ali teang ai. Hini ly kai, Areng i thui nai leu ne,” napi.

JEREMIA 31:16

Nang ly vo nai anawn iy nangmy i mei katuichi py tamui. Chanauchi i vui y nang i sa nai bawibawichi ly jawm sum ai ny y. Huni khumichi ly paleung ka-echi pri i nai ang vawi u ali teang ai,” napi.

JEREMIA 31:17

Nang ly mo mang i vui athang khai naira awm; Nang i cho chanauchi ly yhm y vawi u ali teang ai. Hini ly kai, Areng i thui nai leu ne.

JEREMIA 31:23

Israela chengchi i ati cheaungkhang sa thai nai keung Areng Tameuh my, “Hini khumichi ai mychi i pri y kaimy pahawi ali teang nai khala, ‘Areng ly mymy i awm nai meingtym kachai,napi nai Jerusalem mawi kachai ai amtheaung hai sy,’ nanai nichi ly Juda pri marychira y thui u taleang bi ai.

JEREMIA 51:10

Areng ly “Kai i khumichi my, ‘Achi ly hawi, nanai Areng my patei bo. Achi ly Jerusalem mary i khumichi teng y chei iy achi i Areng Tameuh my sa nai atitichi thui u sina,’ nanai aeu u bo,” napi.

JEREMIA 8:3

Kaimy ahei hai phro nai meingtymchira i dei kamthumchi, hini hawi y nai khumi chengchi ly mychi heng jo ai nai tleaung y dei ai nai ngai u keh alam ai. Hini ly ati cheaungkhang sa thai nai keung Areng i thui nai leu ne,” napi.

Ezekiela 37:21

Hunaibaly sa thai naira angym nai kai Areng ly Israela chengchi ai, nichi tym nai khumi cheng cheaungkhangchi theung i nai pangym achu chum baly, mymychi i saleaung khuteng pri y kapahawi ai, nanai nichi teng y thui pi.

Ezekiela 39:25

Sa thai naira angym nai Areng my, “Na i py vai kai ly Jakob i katu chanau ne nai Israela chengchi ai pahen iy, nang chawn hai ali teang ai. Kai i amyn kachai ai ama hai ai.

AMOS 9:14

Kai ly kaimy i khumichi ai, mychi i pri y kapahawi ali teang ai. Nichi ly phra nai marychi sa teang iy, huni marychira y awm ai nai nga u teang ai. Kreip akhochi sa iy kreip hang nei ai nai nga u ai. Akho baichi sa u iy amy i pati nai amti amjangchi ai amychi my cha ai nai nga u ai.

MIKHA 4:12

Na i py Areng i dawn yb nai ly mana mo, nanai huni prichi ly pany u y. Choh ati ai nai talangra y kachu nai kamta, mymy ly nichi ai pajeng ai nai pangym achu hai nai nichi pany u y.

ZEPHANIAH 3:20

Ahei dan nai nangchi i chengchi ai mychi i pri mang y hawi ali teang nai neng tym ai! Kai ly nangchi ai khaileaung pri verei y amthang hai ai. Nangchi ai nang chawn hai teang ai,” napi. Hini ly Areng my thui pi nai leu ne.

ROM AVANGCHI TENG Y PAWLA I CHA PA NAI 10:20

Naibaly Isaia ly vam parai pa-rei my, “Kai ai hau y naichi my kai ai avum bo,’ Kai ai palau y naichi teng y kamteng hai nai awm,” napi.

Leu Thui Nai 30:1

Kai ly vai nangchi ai amtheaung naira hawi taham si naira, hini nyhrei theung y ha harei vawi takhra ai nai kang pei. Nangchi i Areng Tameuh ly nangchi ai pri tleirei y ahei hai iy, huni prichira awm u nai thym khala, vai nangchi ly kaimy kang thui pi nai ngiereichi ai pany u chum baly,

Leu Thui Nai 30:3

nangchi i Areng Tameuh ly nangchi ai ang pahen ai. Huni bo y mymy ly pri tleirei y ahei nai nangchi ai ang pahawi ali teang ai, naibaly mymy ly nangchi ai amtheaung hai ali teang ai.

Leu Thui Nai 30:5

nangchi i amsi pajochi awm reng nai pri y peang ali teang pajau ai nai ang pahawi ali teang ai. Huni bo y nangchi ai nangchi i amsi pajochi tleaung y nang chawn hai ai i, khumi vuikanai py nawi tleaung nawi hai ra ai.

Leu Thui Nai 4:7

“Achi i Areng Tameuh ly achi kasabawmra ngai nai khala, achi i sahawi y awm. Hina nai Tameuh ai chiu nai khumi cheng kalen ly niu vai y.