JEREMIA 16:19 - Khumi Common Language Bible

¹⁹ Aw Areng, nang ly kai ai kry iy atho pei bo. Patang naira avum nai khala sabawm bo. Khaileaung pri katemra i dengdairei khumi cheng cheaungkhangchi ly nang teng y jeu iy, “Kaichi i amsi pajochi chiu nai tameuhchi ly tameuh ka-chawi ne, atyhtyh teu. Hawi naira pei pajau y nai mynchi ne.

JEREMIA 16:19 ပူးပေါင်းရင်းမြစ်များ

1 ARENG KEH 20:23

Samrang Benhada i bangtangchi my, “Israela chengchi i tameuhchi ly mawi peang nai tameuhchi ne nai deaungkho y, Israela chengchi my achi ai pajau nai ne; achi ly nichi hawi adym y atiu ai nai tla lawh teu i khyly, nichi ai pajau takengkei ai.

SAM 18:3

Kai ly Areng teng y kahnei nai khala, mymy ly kai ai paleung ka-echi kiu i nai atleu bo. Areng ai ly palo u!

SAM 19:14

Kai i abyhra ne iy kai ai atleu nai keung, aw Areng, kai i katheu nai leuchi hawi, paleung ka-dawnchi ly nang i kangai ne sy!

SAM 27:5

Patang naira tym nai neng khala y, mymy ly kai ai ang kry ai. Achura yhm y chymme naimy ang khai ai. Patang naira avum y ai nai lengseaung pui saleung y ang khai ai.

SAM 46:1

Tameuh ly achi i abyhra, achi i atho ne; patang naira avum nai khala y, achi ai sabawm ai nai angveirym jojo.

SAM 46:11

Ati cheaungkhang sa thai nai Areng ly achi hawi vanrei awm; Jakob i Tameuh ly achi i abyhra ne.

SAM 46:7

Ati cheaungkhang sa thai nai Areng ly achi hawi vanrei awm; Jakob i Tameuh ly achi i abyhra ne.

SAM 62:2

Mymy naini kai i abyhra lengseaung, kai ai atleu nai keung ne; mymy ly kai i khengsi apai lawm bo; kai ly mana khala py sum ai ny y.

SAM 62:7

Kai i atleu naira hawi nang parai naira ly Tameuh teng i nga nai ne; mymy naini sa thai naira len iy, ama hai nai lengseaung pui ne; kai i abyhra ly Tameuh ne.

SAM 65:3

Kaichi i tamang nairachi ly khri pa-rei nawi i py, nang ly kaichi i kamngo palawi pi nai ne.

SAM 68:31

Aikupta pri i savaichi ly nang teng y ang jeu u ai; Ethiopia pri khumichi ly kiu pheu iy, Tameuh teng y chiu sa hnei takeng u ai.

SAM 86:9

Nangmy sa nai khumi cheng cheaungkhangchi ly jeu iy, nang i mo y lu meung u ai; nichi ly nang i nang parai nai sai palo u ai.

LEU KACHENG 18:10

Areng ly khumi kahawichi i abyhra, khaw parai nai lengseaung yhm pui atawm. Hu y khumi kahawichi ly chymme naira nga ai nai chei u pajau nai ne.

ISAIA 25:4

Khumi kamawnchi hawi jeaungmang nai khumichi ly nangmy teng y abyh u nai deaungkho y, patang naira tym nai neng khala y chymme naira nga u nai ne. Nang ly nichi ai alipui khupuira i nai ama hai nai py, khri pa-rei kabi ango naira i abyh ai nai ka-khui ka-ji py pei bo. Pahyp y naimy ana nai khumichi i tiu naira y kaseih ali kaho hawi py,

ISAIA 32:2

Nichi bawibawi py ali hawi alipui khupuira i nai abyh nai meingtym kamta lawm ai. Nichi ly khutaha meingtymra y leaung nai tavo micheaungchi hawi py, ati sai py prau y nai kani kabira y awm nai lengseaung pui ka-khui hawi py atawm ai.

ISAIA 44:10

Tameuh palawn iy chiu ai nai molam y myn sa nai ly kamran by y!

ISAIA 44:20

Ni i sa nai ly maidym cha nai kamta, ati sai py ny y. My i akhum nai ka-dawn ly mymy ai lam tamang hai. Hunai deaungkho y ni ai sabawm ai nai avo pajau y bo. Ni ly my i kiu y syn nai myn ly tameuh pipi ny y, nanai pany y.

ISAIA 45:14

Areng my Israela chengchi teng y leu pei nai ly “Aikupta pri hawi Ethiopia pri i yhmtheaung katuichi ly nangchi nga u ai. Seba pri i khumi len ka-sangchi ly nangchi teng y miseaung achei u ai. Nichi ly sengkry hawi pakheng naimy, nangchi nithun abang u ai. Nichi ly nangchi i mo y lu meung naimy, hina nai thui pi u ai; ‘Tameuh ly nangchi hawi vanrei awm bo; mymy leaungrei naini Tameuh ne.

ISAIA 49:6

Areng my kai ai, “Kai i miseaung, kai ly nang ai kalop kalenra y sa hai ai. Dei kamthum Israela chengchi sa thai naira haiho nga u ali teang nai khyh chang y i, khaileaung pri verei malawn py atleu naira nga ai nai, kai ly nang ai khumi cheng cheaungkhangchi i kangvang lawm hai ai,” napi.

ISAIA 62:2

Aw Jerusalem mary, khumi cheng cheaungkhangchi ly nang i eaung naira niu u ai! Samrang bawibawichi py, nang i nang parai nai niu u ai. Nang ly Areng mymy kypkyp my pei nai amyn kangtha loh ai.

JEREMIA 10:3

Huni khumichi i reita ly ati sai py ny y leang. Daichi theung y dengkeaung paliu iy, myn-o kawp nai keung ly seuchi hawi myn-o iy,

JEREMIA 10:5

Hina nai mynchi ly pajawi baira i tavo pajei nai mynchi hawi atawm iy, leu py katheu kawp y. Nichi ly tako thai y nai deaungkho y, nichi ai kajeaung pi ai nai tla. Mynchi ly nangchi ai hawi nai py, hawi y nai py so pi thai y. Nangchi ly hunichi ai jei u moh,” napi.

JEREMIA 12:16

Nichi ly kai i chengchi i reita leu ngai iy, vaichi khala Bala tameuh teng y vaineng abeu nai saichi ai nichi ly kai i khumichi teng y patiu pi nai kamta vai ly ‘Areng i heng nai kamta,’ nanai kai i amyn y vaineng abeu u lawh baly, nichi ly kai i khumichi theung y abawi iy nang chawn u ai.

JEREMIA 14:8

Nang naini Israela chengchi i vui athang khai naira ne. Kaichi ka-jeira avum nai khala y, atleu pi nai keung ne. Ati mana nai y nang ly kaichi i pri angvyn kamta, dymreichy jei khyh nai khuleaung angvyn amlawn lawh mo?

JEREMIA 17:17

Nang ly kai ai kaso tahyn theu hai moh. Patang naira tym nai khala, nang ly kai i abyhra ne.

JEREMIA 2:11

Mymychi i tameuhchi ly tameuh tatang ny y teu i py, mani cheng ly tameuhchi ai chiu takhra vui mo? Na i py kai i khumichi ly mychi ai tahm awm hai nai Tameuh, napi nai kai ai ly nichi ai sabawm thai y nai tameuhchi hawi katheung u veng bo.

JEREMIA 2:8

Pathyp pi nai keungchi my, ‘Areng ly ma mang y awm mo?’ nanai deng u. Kai i pathyp pi nai keungchi ly kai ai pany u y. Peang nai keungchi ly kai ai tiu u bo. Amochi ly Bala tameuh i amyn y tau iy, vang teng y nai mynchi teng y chiu u nai ne.

JEREMIA 3:23

Mawi saleungchira chiu sa nai molam y, kaichi kasabawmra ngo u y. Israela chengchi i vui sabawm naira ly kaichi i Areng Tameuh teng i naini nga pajau khyh.

JEREMIA 33:9

Jerusalem mary ly kai i amo theu naira, tahm asang naira hawi amlyh naira lawm ai. Khaileaung pri i khumi cheng cheaungkhangchi ly huni mary ai kaimy peang nai hawi nairachi py, huni mary y kaimy tym hai nai nang chawn nairachi py, thai u nai khala ly kaso theu u ai,” napi.

JEREMIA 4:2

kai i amyn y tau iy vaineng abeu nai ly kataw kateng lawm ai. Huna nai khala y khumi cheng cheaungkhangchi ly mymychi amtheaung naira nga ai nai hnei takeng u ai. Kai ai py palo u ai,” napi.

Ezekiela 11:16

Naibaly kai Areng my leu pei nai ly “Nichi ai kamlora i cheng takhrachi hawi vanrei awm ai nai pato iy pri takhra y ahei hai teu i py, kani tanarei sala nichi awm naira y nichi hawi vanrei kai kaawm ai.

JOELA 3:16

Areng ly Zion mawi salo y aeu bo. Jerusalem mary i dengdairei aeu. Khaileaung hawi kani khusang py amchyh u bo. Na i py mymy ly mymy i khumichi ai ama hai ai.

AMOS 2:4

Areng my, “Juda pri khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly kai i leu pei naichi niu ngai y iy, kai i pei nai reita leuchi patawm u y. Mychi i amsi pajochi ahihawi iy, chiu nai teng y nai tameuhchi mang y mychi naimy abang i, lam tamang u bo.

NAHUM 1:7

Areng ly hawi, mymy i khumichi patang naira avum nai khala, ama hai bo. Mymy teng y abyh nai khumichi ai kry.

HABAKKUK 3:19

Ati cheaungkhang sa thai nai keung Areng ly kai ai atho pei bo. Nang ly kai ai sitha kamta kheu khaw hai iy, mawichira y chymme naimy khai bo.

ZEKHARIAH 2:11

Huni neng khala y khumi cheng cheaungkhangchi ly Areng teng y ahihawi u iy, mymy i khumichi lawm u ai. Mymy ly nangchi theung y awm ai. Kai ai mymy pato nai ne, nanai py, nangchi pany u ai.

MALAKHI 1:11

Khaileaung katemra y khrairei, khumichi ly kai ai tahm khai nai palo u bo. Nichi ly meingtym tleirei y mui katuichi patawi iy, paleung ka-nora hawi nai kapathyprachi kai teng y talam u. Nichi bawibawi py kai i amyn palo u bo!

ROM AVANGCHI TENG Y PAWLA I CHA PA NAI 1:25

nichi ly Tameuh i leu meitang ai ly ka-chawi hawi katheung iy, Sa Nai Keung ai chiu nai tleaung y ly mymy i sa nai ai chiu iy huni i kalop sa u lawh. Sa Nai Keung ai ly deungtasarei palo nai ne. Amen.

I PETERA 1:18

nangchi i amsi sangumchi i pei pateang nai, nangchi i ati sai py ny y nai reita i dengdairei ly atiti mawn thai nai amjychi, tangka hawi muku y ny y naimy,

AMTENG HAI NAI 11:15

Naibaly kani pri i amtaw thau nai saryh i nai ly eng i, “Khaileaung pri y peang naira ly achi i Tameuh hawi mymy i Krista i peang naira lawn bo; mymy ly deungtasarei peang jojo ai,” nanai kani mang y ly raawi pajeng parai naichi theu tamangtang bo.