7 Hunaibaly ui nai keung py ati sai py ny y leang, tui lei hai nai keung py ati sai py ny y leang, na i py veang hai nai keung Tameuh my leaungrei khyh.
Aw Areng, nang i khaw parai nai tamen naira hawi ka-ym awm nai molam y, nang teng y naini nang parai naira awm khyh; kaichi teng y nang parai naira by y.
Mymy ly khaileaung pri i khumichi ai, ati sai py ny y nai niu; mymy ly kani pri amtaw thauchi ai py, khaileaung pri i khumichi ai py, peang nai ne. Ami py mymy i kangai ei vui pajau y, mymy ati mana sa mo nanai py, deng vam y nai ne.
Kai ly kreip angjyn pakeung ne, nangchi ly changpi ne; ami py kaimy teng y awm jo iy, kai py mymy teng y awm jo nai ly huni kypkyp ly neangneang athai; nangchi ly kai hawi ny y baly ati sai py so thai y leang.
Naibaly kai ly leu thui thai ai naira awm iy, leu kathiu bawibawi hawi pany naira bawibawi pany bebe iy, mawi asyh vui pajau ai nai pa-rei ym naira kangym awm iy py, kai ly tamen naira by y pui baly kai ly ati sai py ny y leang.
Kai ly pathu nai bo he: na i py nangchi my kai ai sa hai nai teu; kai ai ly nangmychi my palo ai nai chy bo; ati mana nai mo nabaly kai ly ati sai py ny y nai teu i py, ati mo ra y py huni amtaw thau nai len keh naichi ai kapho y nai ny y leang.
Naibaly mymy ly kai teng y, “Kai i pahenra ly nang i vui hawi khyp bo; ham y naira y ly kai i atiti sa thai naira ly angym bo,” napi. Hunaibaly Krista i atiti sa thai naira ly kai i tlang tleaung y awm thai ai nai, khrikhri pa-rei kakawn naimy kai i ham y naichi ra y ly kamlyh lawh ai.