ISAIA 60:3 - Khumi Common Language Bible

³ Khumi cheng cheaungkhangchi ly nang i kangvang awm naira mang py, samrangchi ly nang i khawn kani si ko nai sangso mang py ang jeu u ai.

ISAIA 60:3 ပူးပေါင်းရင်းမြစ်များ

ATITI AWM ANGCHEI NAI 49:10

Juda ly samrang i tivi syn ai; ni i kangpreangchi teng y peang naira haiho awm jojo ai. Cheng cheaungkhangchi ly ni teng y langseaung pei u ai. Ni i leu tangai u ai.

SAM 102:16

Areng my Zion mary palum teang nai khala ly mymy i nang parai nai sai amteng hai ai.

SAM 102:22

Zion mary salo y nang i amyn amthang hai ai; Jerusalem mary y nang i nang parai nai palo u ai.

SAM 138:4

Aw Areng, khaileaung pri y awm nai samrang bawibawichi ly nang i adeu nai leuchi thai u nai deaungkho y nang ai palo u ai.

SAM 2:10

Nangchi samrangchi awi, tau tleaung y awm u; nangchi samrang bawibawichi awi, dawn pany u.

SAM 22:27

Khumi cheng cheaungkhangchi ly Areng ai pany u jo ai. Khaileaung pri meingtym tleirei i khumi cheng bawibawichi ly paleung amtlau iy, nang ai chiu u ai.

SAM 68:29

Jerusalem mary Achura yhm i nai, kaichi i vui teaung ai nai sa thai naira patei pi kyh ba.

SAM 72:11

Samrang bawibawichi ly mymy i mo y ambeu u ai; khumi cheng cheaungkhangchi py, samrang i miseaung lawn u ai.

ISAIA 11:10

Samrang Davida kangpreang theung i amthawn nai samrang ly khumi cheng cheaungkhangchi i vui aly len nai ka-ma-ra harei lawm nai neng tym ai. Nichi ly ni i mary pui y jeu achu iy, ni ai tahm pasang ai.

ISAIA 42:6

“Kai, Areng ly nang ai palau iy, khaileaung pri y ka-dyh ka-dawi awm ai nai, sa thai naira pei bo. Nang deaungkho y kai ly khumi bawibawichi hawi leu maikawm asa iy, prichi salo y kangvang tym hai ai.

ISAIA 45:14

Areng my Israela chengchi teng y leu pei nai ly “Aikupta pri hawi Ethiopia pri i yhmtheaung katuichi ly nangchi nga u ai. Seba pri i khumi len ka-sangchi ly nangchi teng y miseaung achei u ai. Nichi ly sengkry hawi pakheng naimy, nangchi nithun abang u ai. Nichi ly nangchi i mo y lu meung naimy, hina nai thui pi u ai; ‘Tameuh ly nangchi hawi vanrei awm bo; mymy leaungrei naini Tameuh ne.

ISAIA 45:22

“Khaileaung pri verei i khumi bawibawichi awi, Kai teng y jeu u ly atleu naira ngo u! Harei awm khyh nai Tameuh ly kai ne.

ISAIA 49:12

Kai i khumichi ly kamlo paraira i nai py, tosyh hawi nidym mang i nai py, tokalawi mang y awm nai Asavanpri i nai py, ang jeu u ai,” napi.

ISAIA 49:23

Samrangchi ly ampo kamta nangchi ai ang kry iy, samrangnuchi ly amhm kamta pacho panei ai. Nichi ly lu meung naimy nang ai chiu u ai. Nichi ly tahm apanem naimy, nang ai tahm khai nai sai patei ai. Huna nai khala y kai ly Areng ne, nanai nangchi pany u ai. Kai i kasabawmra ajeng nai ngiereichi ly paleung phra ai ny y,” napi.

ISAIA 56:8

Mymy i khumichi ai pri pala naira i dengdairei, mychi i pri y palau ali teang nai Areng ly takhra khumichi ai py, huni khumichi hawi vanrei amkawm iy awm ai nai pahawi ai.

ISAIA 60:10

Areng my Jerusalem mary ai, “Cheng takhra khumichi ly nang i mary apaichi sa u palai teang ai. Nichi i samrangchi py nangchi i kalop ang sa pi ai. Kai ly kado theu nai deaungkho y, nangchi ai kang pajeng nai ne. Na i py vai ly nangchi ai meimai kahawi pei iy, kang pahen ai.

ISAIA 60:16

Amhm ly chanau ai kanu panei nai kamta, khumi cheng cheaungkhangchi i samrangchi ly nang ai ang kry u ai. Kai, Areng ly nang ai atleu bo, nanai py, Israela chengchi i ati cheaungkhang sa thai nai Tameuh ly nang ai miseaungra i nai alaw hai bo, nanai py, nang ly pany ai.

ISAIA 62:2

Aw Jerusalem mary, khumi cheng cheaungkhangchi ly nang i eaung naira niu u ai! Samrang bawibawichi py, nang i nang parai nai niu u ai. Nang ly Areng mymy kypkyp my pei nai amyn kangtha loh ai.

ISAIA 66:12

Areng my, “Kai ly nangchi ai nang chawn jojo ai nai kang pei ai. Khumi cheng cheaungkhangchi i yhmtheaung katuichi ly mana khala py kang vai y nai tavo tui kamta, nangchi teng y ang leaung ai. Nangchi ly amhm my tamen parai nai y tapawm naimy kanu panei nai deaungdi hawi atawm ai.

AMOS 9:12

Hunai deaungkho y Israela chengchi ly awm jo rai nai Edom pri ai py, vaichi khala y kaimy peang nai pri tleirei ai py, peang ali teang ai nai nga ai,” nanai tym hai ai nai Areng my ang thui pi bo.

ZEKHARIAH 2:11

Huni neng khala y khumi cheng cheaungkhangchi ly Areng teng y ahihawi u iy, mymy i khumichi lawm u ai. Mymy ly nangchi theung y awm ai. Kai ai mymy pato nai ne, nanai py, nangchi pany u ai.

MATTHAI 28:19

Hunaibaly cheng cheaungkhangchi ai abang nai khumi palawn ai nai chei u ly, nichi ai Ampo hawi Chapo hawi Philo Kaichai i amyn y baptis so u:

LUKA 24:47

naibaly mymy i amyn y uikhei ai nai leu hawi, kamngo pahen ai nai leu py Jerusalem y pateaung iy, cheng cheaungkhangchi teng y thui pi ai nai tla, nanai tajiu nai awm.

JOHAN 12:32

naibaly kai ai khaileaung i nai dang iy, khumi bawibawi ai kaimy teng y kapahawi ryp ai,” napi.

AMTAW 13:47

Hunai kamta Areng my leu ang pei i, ‘Khuteng taki y tym pa-rei nang paheng keung y awm thai ai nai, Cheng Takhrachi ai angvang hai ai nai keung y kang khai mang,’ nanai tajiu nai kamta ly,” napi.

AMTAW 15:17

Kai ali teang ai i, Davida i taichy anawi nai ly kaimy sa bi ai, Phra naira ngierei py kaimy sa bi ai i, Padyh teang ai, nanai

AMTENG HAI NAI 11:15

Naibaly kani pri i amtaw thau nai saryh i nai ly eng i, “Khaileaung pri y peang naira ly achi i Tameuh hawi mymy i Krista i peang naira lawn bo; mymy ly deungtasarei peang jojo ai,” nanai kani mang y ly raawi pajeng parai naichi theu tamangtang bo.

AMTENG HAI NAI 21:24

Naibaly cheng cheaungkhangchi ly huni kangvang y ly aleaung u ai i, khaileaung pri i samrangchi ly mymychi i tahm asang naira ly huni teng y tym hai ai.