ISAIA 60:21 - Khumi Common Language Bible

²¹ Nang i khumi bawibawichi ly kateng sa u naimy, pri py peang ai nai nga u jojo ai. Khumi bawibawichi i mo y kai i nang parai nai amteng hai ai nai, kai ly nangchi ai kry iy kapalum ai.

ISAIA 60:21 ပူးပေါင်းရင်းမြစ်များ

2 SAMUELA 7:10

Kai i khumi Israela chengchi i vui awm ai nai meingtym vawi takhra iy, ana patang naira avum hai y naimy, saleaung khuteng chah hai bo. Hini pri y kun khyp khala i dengdairei, khumi hawi y naichi my tiu nai avum teu i py, vai mo mang y ly avum bi ai ny y. Nang ai paleung ka-echi teng i nai lawira nga hai ai i, katu chanauchi peung hai ai, nanai kai adeu bo.

SAM 37:11

Na i py paleung apanem nai khumichi ly pri peang ai i, tlamsa naira hawi chawn pa naira amtym u ai.

SAM 37:18

Areng ly mymy i leu tangai naichi ai kry. Nichi ly pri ai deungtasarei peang u ai.

SAM 37:22

Areng my amtheaung naira pei nai khumi ly pri amtym u ai. Na i py mymy i amsawi lawi nai khumichi ly pri pala nai avum u ai.

SAM 37:29

Khumi kahawichi ly pri amtym ai i, hu y awm jo ai nai nga u ai.

SAM 92:13

Nichi ly Areng i yhm y ui iy, achi i Tameuh i Achura yhm y angvai nai dengkeaung keungchi hawi atawm.

ISAIA 19:25

Ati cheaungkhang sa thai nai keung Areng my, huni prichi ai amtheaung naira pei iy, “Kai i khumi Aikupta chengchi awi, kaimy sa nai Asuria chengchi hawi, kaimy vawi takhra nai khumi Israela chengchi awi, nangchi ai kaimy amtheaung naira pei ai,” napi.

ISAIA 24:16

Achi ly leu meitang teaung nai Israela chengchi ai, khaileaung khuteng takira y awm nai khumichi my palo nai khulym raawichi thai u ai. Na i py kai ly athang khai naira by y i, bengtlairei kaawm nai khyh bo ly! Ka-ym by y nai khumichi ly leu tangai y jojo i, tamangra tamangra nai ne.

ISAIA 26:2

Mary apai katheuchi paeaung chum baly kahawi sa nai khumi cheng, ka-ym awm nai khumi cheng kun ai nai pei u.

ISAIA 29:23

Nangchi ly kaimy kang pei ai nai cho chanauchi niu u ai. Huna nai khala y kai ly Israela chengchi i chai parai nai Tameuh ne, nanai nangchi pany u ai. Kai ai tahm pateng iy tahm khai naimy jei u ai.

ISAIA 43:21

Huni khumichi ly kaimy i vui, kai i sa nai khumichi ne; nichi my py kai ai palo u ai.

ISAIA 43:7

Nichi ly kaimy peang nai khumichi, kai i nang parai nai amthang hai ai nai, kaimy sa nai khumichi ne,” napi.

ISAIA 44:23

Nangchi kani khusang awi, amo theu naimy aeu u! Khaileaung thiu parai nairachi awi, aeu u! Mawichi hawi thengreung theung i dengkeaung keungchi awi, amo theu naimy aeu u! Areng ly mymy i khumi Israela chengchi ai atleu iy, mymy i nang parai nai patei pi bo.

ISAIA 45:11

Israela chengchi i chai parai nai Tameuh, mo mang i vui y sa nai Areng my, “Kai i cho chanauchi molam y nangchi my kai teng y deng ai nai aly by y. Kai ly ati sa ai nai avo mo, nanai nangchi my kai ai thui pi ai nai aly by y!

ISAIA 45:24

“Nichi ly kaimy deaungkho y eaung naira hawi atho ham naira nga u nai ne, nanai thui u ai. Na i py kai i niu ngai y nai khumi bawibawichi ly tahm anem u ai.

ISAIA 45:25

Kai, Areng ly Jakob i kangpreangchi ai atleu ai. Nichi py kai ai palo u ai.

ISAIA 45:8

Kai ly kanitui kamta, kani mang i dengdairei, eaung naira pala pi ai. Huni ai khaileaung ly am-eaung iy, tlamsa naira hawi adyh adawi naira, napi nai athaichi theu ai. Kai, Areng ly hini atitichi tym hai ai.

ISAIA 49:3

Mymy ly kai ai, “Aw Israela, nang ly kai i miseaung ne; nang deaungkho y khumichi ly kai ai palo u ai,” napi.

ISAIA 51:2

Nangchi i amsi sangum Abraham hawi Sarah nini i satang dawn pany jo ba. Abraham ai kaimy palau nai thym khala y, ni ly cho chanau by y. Na i py kai ly ni ai cho chanau amtheaung hai iy, ni i kangpreangchi peung hai nai ne.

ISAIA 52:1

Jerusalem mary awi, nang ly atho alo teang ly lo-pa teang jau ba! Tameuh i mary pui kachai awi, nangmy ai phum-ang hawi khiu ba! Pri takhra chochi ly mo mang y mana khala py, nang i apai pa-kho theung y kun u ai ny y.

ISAIA 54:17

Na i py mani tavai ateaung py, nang ai no pei pajau y leang. Nang ly nangmy ai ang seu nai ngiereichi ai, tlau teang pajau ai. Kai ly kaimy i miseaungchi ai kry iy, eaung naira kapei ai,” napi. Hini ly Areng i leu pei nai ne.

ISAIA 57:13

Nangmychi ai ang sabawm ai nai nangchi aeu u nai khala y, huni mynchi my nangchi ai atleu pi na sy! Hunichi ly ali tlenrei aho baly akheang pawn ai nai teu! Na i py kai ai ym nai khumichi ly mychi i saleaung khutengra y awm ai nai nga iy, kai i Achura yhm kachaira y kai ai chiu u ai,” napi.

ISAIA 61:11

Tichi ly pato iy keung prau nai kamta, Areng ly mymy i khumichi ai meitang khyp atleu ai. Khumi cheng cheaungkhangchi my py, mymy ai palo u ai.

ISAIA 61:3

Zion mary i paleung si vo tangam nai khumichi teng y, vo tangam nai i jeng y amo theu naira py, paleung mawn nai i jeng y palo nai khulym py, pei ai nai mymy ly kai ai pato bo. Nichi ly Areng i nang parai nai amteng hai ai nai, Tameuh my ui nai, hawi naira napi nai Ngopraibiu keungchi kamta cheang u sau ai.

ISAIA 61:7

Nangchi i kangji kangai nga nai hawi sum nairachi ly tem ai bo. Nangchi ly naimychi i pri y awm naimy, nangchi i yhmtheaungchi py, phy nyhrei nang panawi bi ai. Nangchi ly deungtasarei amo theu ai nai nga u ai.

ISAIA 62:4

“Paleng vui naira avum nai khumi,” nanai amyn loh ai ny y. Nang i pri py, “Akhai su nai aju,” nanai amyn palau ai ny y leang bo. Nang i amyn kangtha ly “Tameuh my kawn nai neampachy,” nanai lawm ai. Nang i pri py, “Amotheu parai naimy pom nai,” nanai amyn loh ai. Ati mana nai mo nabaly Areng ly nang ai kawn nai deaungkho y, juvo lawm nai keung ly mymy i aju ai tamen nai kamta, nang i pri ai py tamen ai.

ISAIA 64:8

Na i py aw Areng, nang ly kaichi i ampo ne. Kaichi ly khaileaung laikan hawi atawm iy, nang ly laawm beu nai keung hawi atawm. Nang ly kaichi ai sa nai keung ne nai deaungkho y,

ISAIA 65:9

Juda chengchi ai amtheaung naira pei ai. Juda kangpreangchi ly mawi tleaung pri napi nai kai i pri amtym u ai. Kai i miseaung, kai i khumichi ly huni pri y awm iy amtym u ai.

JEREMIA 24:6

Nichi ai kry iy hini pri y kapahawi ali teang ai. Kai ly nichi ai taphra y naimy kapalum ai; akyn vui y naimy kaui ai.

JEREMIA 32:41

Nichi teng y hawi naira pei ai naini kangai khyh; hini pri y awm jojo ai nai meingtym sa pi ai.

Ezekiela 11:17

“Hunai deaungkho y sa thai naira awm nai kai Areng my leu pei nai ly nichi teng y thui pi. Kai ly cheng takhrachi theung i nai nangchi ai kang la teang iy, nichi ahei u dan nai prichira i nai, nichi ai kapangym ali teang ai. Israela pri py kapei pi ali teang ai.

Ezekiela 34:29

Kai ly nichi ai paitiu khuta hawi nai meingtymchi pei iy, pri theung y tahum takang py tama hai ai. Cheng takhra khumichi my py nichi ai mana khala py panui hai bi ai ny y.

Ezekiela 37:25

Nichi ly mychi i amsi pajochi awm reng nai pri, kai i miseaung Jakob teng y kaimy pei nai pri y awm u ai. Nichi kamta nichi i cho chanauchi hawi, nichi i kangpreang bawibawichi py, huni pri y awm u jojo ai. Kai i miseaung Davida kamta samrang ly nichi ai peang jojo ai.

Ezekiela 47:7

Kai ly tui peang y tym nai khala, tui peang makeng nyhreira y dengkeaung keungchi prau mang nai kaniu.

AMOS 9:15

Kai ly kaimy i khumichi ai, kaimy pei nai pri y kaimy awm hai ai; ami py nichi ai taphra naira avum hai bi y ai,” napi. Hini ly nangchi i Areng Tameuh my leu pei nai ne.

OBADIA 1:17

“Na i py Zion mawi salo y tleaung nai khumi phyrei awm ai; hini mawi ly meingtym kachai lawm ai. Jakob i kangpreangchi ly mymychi i vui amtym ai nai nga ai. Pri amtym ai nai nga u ai.

ZEPHANIAH 3:13

Dei kamthum Israela khumichi ly ami ai py tamang u ai ny y. Leu ka-chawi katheu nai py, tapawp ai nai atho sa ai nai py, sa u ai ny y. Nichi ly chawn, pa u ai. Ami ai py jei y iy, chymme naimy awm u ai,” napi.

MATTHAI 15:13

Mymy ly pathang i, “Kani pri mang i Ngaai my ui y nai keung tleirei ai ly akyn ai nai tla.

MATTHAI 5:5

“Paleung jypjyp naichi ly taham hawi: nichi ly khaileaung pri amtym ai.

JOHAN 15:2

Kai hawi amtawm iy athai y nai changpi ngierei ly mymy ly aphi ai; athai nai ngierei ly athai nawi tleaung nawira ai nai ang chai hai.

EPHESI 1:12

Krista ai athang khai manme chum naichi ly mymy i nang parai nai sai palo ai naira lawn ai nai, Krista kypkyp y ly kaichi ai mymy i yhmtheaung lawn ai nai ang sa nai ne.

EPHESI 1:6

Huni pahenra ly Ngai Parai Nai y jawm my ang pei;

EPHESI 2:10

Achi ly mymy i kiu i theu nai ne i, achi ai atiti kahawi sa ai nai vui Krista Isu y ly sa nai ne, huni atiti sa naira y achi i tako ai nai Tameuh my sa rym nai ne. nai

EPHESI 2:7

Hunaibaly mymy ly neng tym ai naira y ly Krista Isu y achi i tlang tleaung y neaung hawi nai deaungkho y, mymy i pahenra khri pa-rei nawi nai sai ly patei pajau ai.

II THESALONIKA 1:10

nichi ai ly Areng hawi mymy i nang parai nai atiti sa thai naira i dengdairei deungtasarei tama ai naira khrairei patheu iy, ngari patang ai.

II PETERA 3:13

Na i py mymy i leu adeu nai kamta hawi naira awm nai, kani khaileaung kangtha ai ly achi athang khai.

AMTENG HAI NAI 21:27

naibaly atiti chai y nai amjy mo, amso ngailai nai hawi ka-chawi thui nai keung mo huni theung y tlen py kun ai ny y; Beram Cho i heng naira cha-iu y amyn tajiu angchi nai ngiereichi naini kun ai khyh.

AMTENG HAI NAI 21:7

Pajau nai keung ngierei ly hunichi ai amtym ai; naibaly kai ly ni i Tameuh kalawn ai i, ni py kai i chapo lawn ai.

AMTENG HAI NAI 5:10

naibaly nichi ai ly achi i Tameuh i vui y peang naira hawi pathyp pi nai keungchi y nang palawn bo; naibaly nichi ly khaileaung pri y peang ai,” napi.