ISAIA 53:6 - Khumi Common Language Bible

⁶ Achi bawibawi ly beram kamta lam tamang iy, amychi ngai nai lam y tako u bo. Hunai deaungkho y Areng ly achi hawi ataing nai pajeng naira ly ni i tlang tleaung y tym hai bo.

ISAIA 53:6 ပူးပေါင်းရင်းမြစ်များ

ATITI AWM ANGCHEI NAI 22:6

Abraham my Isaka ai ly theng apu hai i, mymy ly mai hawi acho syn. Nini ly tako hawi nai thym kha y,

SAM 119:176

Kai ly tama nai beram kamta lam tamang bo; hunai deaungkho y jeu ly nang i miseaung kai ai hau kyh ba; kai ly nang i reita leu pei naichi ai tami y leang.

SAM 69:4

Kai ai atyhtyh naimy niu ngai y nai khumichi i vuikanai ly kai lura i sam tleaung y malawn py nawi nai ne. Katapawp leu thui iy kai ai ka-jo hau nai khumichi ly atho awm parai nai ne. Kai ai padei ai nai ngai u bo. Kai ly kapaviu y nai vawnsaichi ai, nichi teng y kapei ai nai tla bo.

ISAIA 40:2

Jerusalem mary i khumichi ai atho pei u. Nichi ly ngari kamtang kra parai pa-rei avum nai deaungkho y, nichi i kamngochi ai vai, kaimy pahen pi bo, nanai nichi teng y thui pi u. Kai ly nichi i kamngo nai ai pajeng nai tym angym hai bo,” napi.

ISAIA 53:10

Areng my, “Ni ly kai i kangai y no patang nai avum bo. Ni ly mymy i tlang a-au nai ly kamngo pahen nai kapathypra ne. Hunai deaungkho y ni ly mymy i cho chanau kangpreang neangneang niu ai. Ni ly heng sau ai. Mymy deaungkho y kai i dawn pasym naichi py eaung naira nga ai.

ISAIA 53:11

Ni ly no patangra i nai amo theu naira nga ali teang ai. Mymy i patang nai ly jawm ny y, nanai pany ai. Ni ly kai i miseaung kahawi ne iy, mymy i tlang tleaung y kawn parai. Khumi neangneangchi i kamngo mynji pho iy, huna nai sa nai molam y, huni khumichi i kamngo kaimy pahen ai.

ISAIA 53:12

Hunai deaungkho y kai ly ni ai tahm asang nai khumi, sa thai naira awm nai khumichi hawi vanrei, tahm teng nai meingtymra y pei ai. Ni ly mymy i tlang ai pasai y naimy apei iy, khumi hawi y naichi i taham si nai kham pi. Ni ly kamngo sa naichi i jeng y huni khumichi hawi ataing nai kamngo amtym pi iy, nichi i kamngo lawi ai nai chiu sa pi bo,” napi.

ISAIA 53:5

Na i py achi i kamngo molam y, no pei nai tamo kalemchi nga iy, achi i hawi y sa nai molam y khyh pakhau nai avum nai ne. Ni ly huna nai kamngo pajeng nai kham pi nai deaungkho y, achi ly kamngo lawira nga bo. Ni i nga nai tamo kalem saho y, achi ly no hawi naira nga nai ne.

ISAIA 53:7

“Ni ly pahyp y naimy ana naira avum teu i py, ni ly leu sairei py katheu y. Ni ly tleh ai nai pahawi nai beramcho kamta py, mui vau en nai beram kamta py, paleung apanem parai naimy kham nai ne.

ISAIA 55:7

Khumi hawi y naichi ly mymychi i hawi y sa naichi khai su iy, mychi i paleung ka-dawnchi py takhra vui ai nai tla. Nichi ly achi i Areng Tameuh mang y ali u teang ai nai tla. Mymy ly pahen iy law tleaung hai kaliki ai.

ISAIA 55:8

Areng my, “Kai i ka-dawnchi ly nangchi i ka-dawnchi hawi atawm y. Kai i reitachi py, nangchi i reitachi hawi takhra nai ne.

ISAIA 56:11

Nichi ly cha nai paleung anyp pajau y, ngai ala nai uichi hawi atawm. Nichi ly ati sai py ka-dawn by y nai lu sa naichi ne. Mychi kangai sa akyhkyh iy, amy i vui y kamran hau u khyh naichi ne.

ISAIA 6:7

Ni ly kai i labeaungteng y mai-ai hawi tabi i, “Nang i labeaungteng ly hini mai-ai hawi tabi chum nai deaungkho y, nang ly kamngo by y, nang ly kamngochi lawira nga veng bo,” napi.

ISAIA 66:3

“Khumichi ly mychi i kangai sa u reng nai ne. Mychi i vui si tleh iy apathyp nai ly khumi ai padei iy apathyp nai hawi atawm. Beram pathyp nai hawi ui pathyp nai py vanrei ne. Amti amjang talam nai ly eu thi talam nai hawi atawm. Mui katui leng patlum iy talam nai ly myn ai chiu nai hawi atawm teang. Nichi ly amso ngai ai hawi chiu sa naichira y amo theu u lawh nai ne.

JEREMIA 50:6

“Kai i khumichi ly mawichira y beram typ keungchi my lam tama hai nai beramchi hawi atawm nai ne. Nichi ly mawichira y lyn kalau, ang vum kathiu naimy mychi i beram hai ai tami vui nai beramchi kamta, amki u bo.

Ezekiela 3:18

Kaimy hawi y sa nai khumi leaungrei ly dei ai nai tla, nanai thui i py, huni khumi dei y pa-rei nang ly khumi kahawi sa vui ai nai lam patei pi y lawh baly, huni khumi ly my i kamngolai y dei ai; huna nai khala huni khumi i dei nai molam ly nang i phu ne.

DANIELA 9:5

“Kaichi ly kamngo sa tamang u. Teng y naichi kasa u lawh. Amso ngai naichi ne iy ka-awi sa u lawh bo. Kaichi ly nang i leu pei naichi khai su iy, nang i sa pi nai reitachira i nai en vui lawh bo.

ROM AVANGCHI TENG Y PAWLA I CHA PA NAI 4:25

huni Isu ai ly achi i kamngo nai deaungkho y patiu hai i, achi ai eaung naira nga hai ai nai pathau bo.

JAKOB 5:20

mymy ly khumi kamngo ai lam tamang naira i dengdairei pahawi ali hai nai deaungkho y, dei ai naira i dengdairei phailo ai ly paheng ai, naibaly kamngo neangneang ai py khiu ai, nanai pany sy.

I PETERA 2:25

Nangchi ly beram kamta lam tamang nai ne i, vai ly nangchi i phailo ai ang typ nai hawi peang nai keung teng y vawi ali u teang veng bo he.

I PETERA 3:18

Ati mana nai mo nabaly Krista ly achi ai Tameuh teng y ang pahawi thai ai nai kamngo nairachi deaungkho y tlenrei patang, khumi kahawi ly hawi y naichi i vui y; tlang mang y padei nai awm i, phailo mang y paheng nai bo;

TARA CHIH NAI KEUNGCHI 21:25

Huni deung khala, Israela chengchi theung y samrang by y leang rai; khumi luteng ly amy i ngai nai kamta sa u nai ne.