ISAIA 53:10 - Khumi Common Language Bible

¹⁰ Areng my, “Ni ly kai i kangai y no patang nai avum bo. Ni ly mymy i tlang a-au nai ly kamngo pahen nai kapathypra ne. Hunai deaungkho y ni ly mymy i cho chanau kangpreang neangneang niu ai. Ni ly heng sau ai. Mymy deaungkho y kai i dawn pasym naichi py eaung naira nga ai.

ISAIA 53:10 ပူးပေါင်းရင်းမြစ်များ

SAM 110:3

Paleung ka-echi ai nangmy tiu nai kani y, nang i khumichi ly alyly naimy, nang hawi vanrei thau u ai. Khawn mang y tla nai kadam kamta, atho awm nai khumi ka-cheang neangneangchi ly nang i awm nai mawi kachai salo y ang tym u ai.

SAM 147:11

Na i py mymy ai jei naimy tahm khai naichi, khaw parai nai tamen naira ai ym nai khumichi ai aly ngai nai ne.

SAM 149:4

Areng ly mymy i khumichi ai tamen nai ne; tahm anem nai khumichi ai, eaung nai hawimy tahm pasang u.

SAM 21:4

Ni ly hengra hnei i, nang ly ni ai hengra pei nai khyh chang y, deungtasa hengra py pei pi nai ne.

SAM 22:30

Mo mang i deng kangthauchi ly nang i amtaw thau u ai. Vai i deung kangthauchi ly mo mang i deng kangthauchi teng y, Areng i satang amti pi ai.

SAM 22:31

“Areng ly mymy i khumichi ai atleu pi bo,” nanai mo mang y tapen nai khumichi teng y thui pi ai.

SAM 69:26

Huni khumichi ly nangmy pajeng nai khumichi ai ana u bo; nang ly tamo kalem nga hai nai khumichi i avum nai patang nai satang thui u bo.

SAM 72:17

Samrang i amyn ly awm jojo sy; amyn amthang nai ly kanito kamta awm jojo sy. Tameuh ly samrang ai amtheaung naira pei nai kamta, khumi cheng cheaungkhangchi ly mychi ai py, amtheaung naira pei ai nai Tameuh teng y hnei u sy.

SAM 72:7

Samrang i deung y leu meitang adyh adawi naimy peang hai sy; lo my kangvang pei nai ryrei ly tlamsa naira awm sy.

SAM 89:29

Ni i pri ly kani khusang kamta khaw hai ai; ni i katu chanauchi ly samrang lawm jojo ai.

SAM 89:36

Davida i kangpreang ly mana khala py myh kang ai ny y; kani tleirei, kai ly ni i pri khaw hai jojo ai.

ISAIA 42:1

Areng my, “Hini khumi ly kaimy atho awm hai nai, kai i miseaung, kai i paleung kangai vawi patyp nai khumi ne. Kai ly kaimy i Phailo ai ni teng y kawi hai ai. Ni py khumi cheng cheaungkhangchi ai, ka-dyh ka-dawi naimy peang ai.

ISAIA 46:10

Kai ly angchei khala i dengdairei, leu kangtem kang thuipi yb nai ne. Mo mang y tym ai nai atitichi ai, jangni khala my kang thui pi yb veng bo. Kai i dawn pasym naichi ly mana khala py phra ai ny y, nanai kaimy thui pi yb nai kamta, kai i pasym yb nai atitichi ly sa ai.

ISAIA 49:4

“Kai ly kalopchi kasa, na i py ati sai py ny y lawh! Kai ly atho naini kakheih teu ni ly ati sai py amcheang y, nanai katheu bo. Na i py kai ly kaimy i kalopchi amsym ai nai Areng ai ym na sy. Mymy ly kai i sa nai kalop molam y, kawn vangchi ang pei ai.

ISAIA 53:12

Hunai deaungkho y kai ly ni ai tahm asang nai khumi, sa thai naira awm nai khumichi hawi vanrei, tahm teng nai meingtymra y pei ai. Ni ly mymy i tlang ai pasai y naimy apei iy, khumi hawi y naichi i taham si nai kham pi. Ni ly kamngo sa naichi i jeng y huni khumichi hawi ataing nai kamngo amtym pi iy, nichi i kamngo lawi ai nai chiu sa pi bo,” napi.

ISAIA 54:3

Nang ly amy i khujyhchi palen ai nai tla. Vai, cheng takhra khumichi awm nai pri ly nang i khumichi my nga u ali teang ai. Vai, khumi angso savai tlang nai marychi ly phuitaw na ai.

ISAIA 61:9

Nichi ly khumi cheng cheaungkhangchi theung y amyn amthang u ai. Nichi ly kai i amtheaung naira nga nai khumichi ne, nanai nichi ai niu nai khumi lutengchi my pany u ai,” napi.

ISAIA 66:22

“Khaileaung kangtha hawi kani kangthachi ly kai i sa thai nai saho y khaw jo nai kamta, nangchi i amyn hawi kangpreangchi ly khaw u jojo ai.

ISAIA 9:7

Ni i sa thai naira haiho ly hlo veangveang iy, ni i pri py tlamsa jojo ai. Ni ly samrang Davida i yhmtheaung amtym iy vai i dengdai deungtasa tem pa-rei leu meitang adyh adawi naimy peang ai. Ati cheaungkhang sa thai nai Areng ly hina naichi tym angym hai ai nai leu pacheang yb veng nai ne.

JEREMIA 32:41

Nichi teng y hawi naira pei ai naini kangai khyh; hini pri y awm jojo ai nai meingtym sa pi ai.

Ezekiela 33:11

Sa thai naira angym nai kai Areng ly Tameuh kangheng ne nai deaungkho y, kaimy kang thui pi nai ly ami mo leaungrei kamngo sa iy dei nai niu ai nai ngai y. Huni khumi kamngo sa nai anawn iy heng nai naini kaniu ai nai ngai. Nangchi Israela chengchi awi, nangchi i sa thym nai kamngochi anawn u jau; ati mana nai y dei ai nai ngai u lawh mo?

Ezekiela 37:25

Nichi ly mychi i amsi pajochi awm reng nai pri, kai i miseaung Jakob teng y kaimy pei nai pri y awm u ai. Nichi kamta nichi i cho chanauchi hawi, nichi i kangpreang bawibawichi py, huni pri y awm u jojo ai. Kai i miseaung Davida kamta samrang ly nichi ai peang jojo ai.

DANIELA 9:24

“Saneng vui saryh nai meingtym saryhrei nai neng ly nang i chengchi hawi nang i chai parai nai mary ai kamngo hawi, hawi y naira i nai, lawi hai ai nai Tameuh my khai pi takhra nai neng ne. Amteng hai nai hawi amo leu teng khyp nai sai pany hai ai nai hawi, chai parai nai Achura yhm khai takhra teang ai nai molam, Tameuh ly nichi i kamngochi pahen iy, deungtasarei leu meitang adyh adawi nai deung tym ai.

MIKHA 7:18

Aw Areng, nang hawi pata ai nai tameuh takhra by y. Nang ly dei kamthum nang i khumichi my tiu nai kamngo pahen pi bo. Nang ly kado theu jojo y leang. Nang ly kaichi ai pahen.

ZEPHANIAH 3:17

Nang i Areng Tameuh ly nang hawi vanrei awm; mymy i sa thai naira hawimy, nang ly eaung naira nga ai. Areng ly nang i tlang tleaung y amo theu naira nga ai. Mymy ly mymy i tamen naira hawi nang ai deung kangthaang pei ai. Mymy ly nang i molam y, amo theu nai khulym thui ai.”

ZEKHARIAH 13:7

Ati cheaungkhang sa thai nai Areng my, “Aw haisau, ang thau ly kai i kalop sa pi nai beram typ keung ai tiu ba; ni ai tleh ba. Naibaly beramchi ly ahei phro ai. Kai ly kaimy i khumichi ai tiu ai i,

MATTHAI 17:5

Ni ly thui dudu nai thym khala y khen cham, tamai kaleung parai nai ly mymychi ai deng; naibaly khen cham, tamai theung i dengdairei raawi ly, “Hini ly kai i Chapo ngai parai nai ne: kai ly mymy i tlang tleaung y khrikhri pa-rei kakawn parai: mymy i leu tangai u,” napi.

MATTHAI 3:17

Naibaly khen cham, kani pri mang i dengdairei raawi ly, “Hini ly kai i Chapo ngai parai nai ne, kai ly mymy i tlang tleaung y khrikhri pa-rei kakawn parai,” napi.

LUKA 1:33

mymy ly Jakob kangpreangchi tleaung y deungtasarei areng lawn ai i, my i peang nai ly temra awm ai ny y,” napi.

JOHAN 1:29

Naibaly mymy ly khawn mang y Isu ai ni teng y jeu ai tau nai niu i, “Khen cham, Tameuh i Beram Cho, khaileaung pri i kamngo la pi veng nai keung ho!

JOHAN 12:24

Meitang khyp kang thui pi, choh amairei khaileaung y tla iy dei y baly huni my tlairei awm jojo ai khyh; dei baly neangneang peung ai.

JOHAN 13:32

Tameuh my mymy y ly ni ai palo ai, palo py palo praw ai.

ROM AVANGCHI TENG Y PAWLA I CHA PA NAI 6:9

Krista ai ly kadeichi theung i nai pathau i, dei ali bi y leang bo, nanai achi pany; deira my ly mymy i tlang tleaung y aly peang bi y leang bo.

ROM AVANGCHI TENG Y PAWLA I CHA PA NAI 8:32

Mymy i Chapo kypkyp ai malawn py khai y nai, achi bawibawi i jeng y ang pei nai keung ly, mymy hawi atiti bawibawi jawm naimy ang pei teang y ai a?

ROM AVANGCHI TENG Y PAWLA I CHA PA NAI 8:8

naibaly tlang i reita y awm naichi ly Tameuh ai kawn hai thai y leang.

II KORINTH 5:21

Mymy y ly achi ly Tameuh i hawi naira lawn thai ai nai, kamngo pipi pany y nai ai ly Tameuh my achi deaungkho y kamngo palawn bo.

KALATIA 3:13

Hunaibaly Abraham ai amtheaung hai naira ly Krista Isu y ly Cheng Takhrachi i tlang tleaung y awm thai ai nai, Krista ly achi i jeng y amsawi lawi nai ne i, Reita i pasawi naira i dengdairei achi ai atleu bo;

EPHESI 1:5

hunaibaly mymy i tamen naira nang parai nai sai palo ai nai, mymy i kangai kawn nai kamta ly Isu Krista i saho y achi ai mymy i vui chanau y ang palawn ai nai ang khai rym chum veng nai bo.

EPHESI 1:9

mymy i kangai leu thui nai sai ang pany hai nai ne;

EPHESI 5:2

Naibaly Krista my ang tamen nai hawi, Tameuh teng y miu katui lawn ai nai atiti talam naira hawi apathyp naira y achi i jeng y ang pei nai kamta ly tamen naira y tako u.

II THESALONIKA 1:11

Achi i Tameuh my ang palau naira y ly palau ai ataing nai ang sa rym thai ai nai hawi, ym naira y atiti sa nai cheaungkhang mymy i atiti sa thai naira y nangchi ai sa hai thai ai nai, kaichi ly chiu kang sa pi jojo nai he.

HEBRAI 2:13

Naibaly, “Khen cham, kai hawi Tameuh i kai ai pei nai deaungdichi,” napi taleang bi.

HEBRAI 7:27

mymy ly huni pathyp pi nai keung kalen kehchi i sa nai kamta, kani tleirei amy i kamngo nairachi deaungkho y talam manme veng iy, huni bo y ly khumi humchi i kamngo nairachi deaungkho y talam ai nai aly ngai y leang; ati mana nai mo nabaly huni ly amymy ai atalam amang nai thym khala y ly sa bi ai nai aly by y pa-rei tlenrei my sa na veng.

HEBRAI 9:14

deungtasarei Phailo i saho y meimai cheh ai by y nai Tameuh teng y atalam nai Krista i thi my ly Tameuh kangheng i kalop sa ai nai, nangchi hawi nai hawi y nai pany naira ai ly hini hengra abawi y nai atiti sa naira y ly mana tanrei pachai ai mo?

I PETERA 2:24

achi ly kamngo lam mang y dei veng iy hawi naira lam mang y heng thai ai nai mymy kypkyp ly achi i kamngochi ai dengkeaung tleaung y mymy i tlang y ang pho pi bo; nangchi ai ly mymy i pakhau nai satlang y hawi ang sa pi bo.

AMTENG HAI NAI 1:18

“Jei moh; kai ly kangman keh nai hawi kangkhym keh nai hawi, heng nai keung py ne; kai ly dei i, na i py khen cham, deungtasarei i vui y kai ly heng teang nai ne, deira hawi tavaukho i sawchi py kai teng y awm.