ISAIA 49:23 - Khumi Common Language Bible

²³ Samrangchi ly ampo kamta nangchi ai ang kry iy, samrangnuchi ly amhm kamta pacho panei ai. Nichi ly lu meung naimy nang ai chiu u ai. Nichi ly tahm apanem naimy, nang ai tahm khai nai sai patei ai. Huna nai khala y kai ly Areng ne, nanai nangchi pany u ai. Kai i kasabawmra ajeng nai ngiereichi ly paleung phra ai ny y,” napi.

ISAIA 49:23 ပူးပေါင်းရင်းမြစ်များ

ATITI AWM ANGCHEI NAI 27:29

Pri bawibawichi ly nang teng y lu meung iy miseaungchi lawm u sy. Cheng cheaungkhangchi ly nang i mo y lu meung u sy. Nang ly amjo amnauchi ai peang sy. Nang i amhm kangpreangchi ly nang ai lu meung u sy. Nang ai pasawi nai khumi ai ly amsawi lawi teang sy. Nang ai amtheaung hai nai khumichi ly amtheaungra ngo teang sy,” napi.

ATITI AWM ANGCHEI NAI 43:26

Josepha yhm y tym nai khala nichi ly mymychi i syn nai langseaungchi talam pi iy ni i mo y ambeu naimy chiu u bo.

SAM 138:4

Aw Areng, khaileaung pri y awm nai samrang bawibawichi ly nang i adeu nai leuchi thai u nai deaungkho y nang ai palo u ai.

SAM 25:3

Nang ai ym nai khumichi ly sum naira avum u y ai. Nang ai tiu ai nai panga y naichi naini sum u ai.

SAM 34:22

Areng ly mymy i khumichi ai atleu ai; mymy teng y abyh ai nai ahihawi nai khumichi ly kamngo pajeng naira lawi u ai.

SAM 68:31

Aikupta pri i savaichi ly nang teng y ang jeu u ai; Ethiopia pri khumichi ly kiu pheu iy, Tameuh teng y chiu sa hnei takeng u ai.

SAM 69:6

Ati cheaungkhang sa thai aw Areng! nang ai ym nai khumichi ly kai i molam y kangji ngo hai moh kyh ba. Aw Israela chengchi i Tameuh! nang ai chiu nai khumichi ly kai i molam y tahm anem hai moh kyh ba.

THEU NAI 6:7

Kai ly nangchi ai kai i khumi kypkyp kapalawn ai; kai ly nangchi i Tameuh ne ai. Aikupta pri y miseaung achei naira i nangchi ai kang lawi hai nai khala y, kai ai nangchi i Areng Tameuh ne, nanai pany u ai.

ISAIA 14:1

Areng ly mymy i khumi Israela chengchi ai pahen ali teang nai ne. Mymy i khumichi palawn ai nai vawi takhra ai. Mymy ly nichi ai mychi i saleaung khutengra y awm u ali teang ai nai pei ai. Cheng takhra khumichi ly jeu iy nichi hawi vanrei awm u ai.

ISAIA 14:2

Khumi cheng cheaungkhangchi ly Israela chengchi ai, Areng my pei nai pri y vawi u ali teang ai nai sabawm u ai. Huni pri y cheng takhra khumichi ly Israela chengchi teng y miseaung kamta kalop sa u ai. Israela chengchi ai patiu nai khumichi ai, vai ly Israela chengchi my patiu ali teang ai. Israela khumichi py, vaichi khala mychi ai ana nai khumichi ai peang u ai.

ISAIA 25:9

Hini atitichi tym nai khala y khumi bawibawichi my, “Mymy ly kaichi i Tameuh ne lawh ly! Kaichi ly mymy ai ym nai deaungkho y, mymy py kaichi ai atleu bo. Mymy ly Areng ne. Kaichi ly mymy ai kaym u nai ne. Mymy ly kaichi ai atleu pi nai ne i, vai kaichi ly amo theu seu naimy atho kanga u bo,” nanai thui u ai.

ISAIA 26:8

Kaichi ly nang i ngai nai kamta sa iy, nang ai athang khai naimy awm; nang ai naini kakadeaung u bo.

ISAIA 29:22

Hunai deaungkho y Abraham ai ngari kamtangra i atleu nai Israela chengchi i Areng Tameuh my, “Aw, kai i khumichi awi, nangchi ly kangji nga u ai ny y. Kangji nga iy meimai phra u ai ny y.

ISAIA 41:20

Hini atitichi niu u nai khala y, khumichi my hini ly kai, Areng i sa nai ne, nanai pany u ai. Hini kalop ai Israela chengchi i chai parai nai Tameuh my sa nai ne, nanai pany u ai.

ISAIA 43:10

“Aw, Israela chengchi awi, nangchi ly kai i pany hai nai keungchi ne. Nangchi ly kai ai pany u ai nai py, kai ly Tameuh harei khyh, nanai pany u thai ai nai py, kai ly nangchi ai kaimy i miseaung palawn ai nai kang vawi nai ne. Kai ny y baly tameuh takhra by y; mana khala py by y, vai mo mang py awm ai ny y.

ISAIA 45:14

Areng my Israela chengchi teng y leu pei nai ly “Aikupta pri hawi Ethiopia pri i yhmtheaung katuichi ly nangchi nga u ai. Seba pri i khumi len ka-sangchi ly nangchi teng y miseaung achei u ai. Nichi ly sengkry hawi pakheng naimy, nangchi nithun abang u ai. Nichi ly nangchi i mo y lu meung naimy, hina nai thui pi u ai; ‘Tameuh ly nangchi hawi vanrei awm bo; mymy leaungrei naini Tameuh ne.

ISAIA 45:17

Na i py Israela chengchi ly Areng i atleu nai nga u iy, nichi i eaung nai ly deungtasa akan jo ai. Nichi ly mana khala py, tahm anem u ai ny y.’ ”

ISAIA 49:7

Khumi cheng cheaungkhangchi my niu ngai y nai khri pa-rei avum iy, samrang hawi y naichi i miseaung teng y, Israela chengchi i chai parai nai Tameuh, atleu keung my, “Pri peang nai samrangchi ly nang ai law tleaung hai iy tahm ang khai u ai. Samrang i chapochi my py nang ai niu iy, tahm khai nai lu meung u ai.” Ati mana nai mo nabaly ka-ym awm nai Areng napi nai Israela chengchi i chai parai nai Tameuh ly nang ai vawi takhra nai deaungkho y ne,” napi.

ISAIA 50:7

Na i py Areng ly kai ai sabawm nai deaungkho y, nichi i ana nai ly kai i tlang tleaung y patang naira tym hai y leang. Hunichi ai kham pajau ai nai, kai ly khamta bo.

ISAIA 52:15

Na i py vai, ni ly khumi cheng cheaungkhangchi ai chai hai ai. Samrangchi py mynkym u ai. Nichi ly mana khala py pany vai y nai hawi thai vai y naichi niu iy, pany u thai ai,” napi.

ISAIA 52:6

Na i py kai ly Tameuh ne, nanai kai i khumichi ly kai i amyn pany iy, nangchi teng y leu pei nai keung ly kai ne, nanai kangkhym y nangchi pany u ai.

ISAIA 60:14

Nangchi ai pahyp y naimy ana nai khumichi i kangpreangchi ly nangchi teng y jeu iy, lu meung naimy ang chiu u ai. Vaichi khala y nang ai khumi aniu y nai khumi bawibawichi ly nang i kheu keung y ambeu iy chiu u ai. Nichi ly nang ai, ‘Israela chengchi i chai parai nai Areng i mary pui Zion mary,’ nanai py palau u ai.

ISAIA 60:16

Amhm ly chanau ai kanu panei nai kamta, khumi cheng cheaungkhangchi i samrangchi ly nang ai ang kry u ai. Kai, Areng ly nang ai atleu bo, nanai py, Israela chengchi i ati cheaungkhang sa thai nai Tameuh ly nang ai miseaungra i nai alaw hai bo, nanai py, nang ly pany ai.

ISAIA 60:3

Khumi cheng cheaungkhangchi ly nang i kangvang awm naira mang py, samrangchi ly nang i khawn kani si ko nai sangso mang py ang jeu u ai.

ISAIA 62:2

Aw Jerusalem mary, khumi cheng cheaungkhangchi ly nang i eaung naira niu u ai! Samrang bawibawichi py, nang i nang parai nai niu u ai. Nang ly Areng mymy kypkyp my pei nai amyn kangtha loh ai.

ISAIA 64:4

Nangmy ai kadeaung u nai khumichi i vui y, hina nai kalopchi ai nang kamta sa pi nai Tameuh ai ly ami py niu vai y. Huni Tameuh satang thai py thai vai y.

Ezekiela 37:6

Nangchi teng y athovuichi hawi ngan bawichi lyn hai iy, peihchi hawi mym pi ai. Nangchi theung y taho hai thai nai ali pakun pi ai i, nangchi ai heng hai ali teang ai. Huna nai khala kai ly Areng ne, nanai nangchi pany u ai,” napi.

JOELA 2:27

Aw Israela chengchi awi, kai ly nangchi ai kang awm hai nanai py, kai, Areng ly nangchi i Tameuh ne iy, kai ny y baly Tameuh takhra by y nanai py, huna nai khala y nangchi pany u ai. Kai i khumichi ly mana khala py, thui tamawn nai avum u bi ai ny y.

MIKHA 7:17

Nichi ly pavui kamta speung theung y jawn ai. Nichi ly mychi i amtangra dengdairei jei naimy theu u iy, achi i Areng Tameuh teng y ahihawi u ai.

Kati Nai 11:12

Kai ly nichi ai sa nai py ny y, nichi ai katapen nai py ny y! Nang ly nichi i amsi pajochi teng y pei ai adeu nai pri y chei nai lam jeungrei, ati mana nai kai ai deaungdi katyp khumi palawn iy, nichi ai peu hai lawh mo?

MATTHAI 25:16

Naibaly talent pangrei nga nai keung ly huni ly ka-pai sa hai praw i, talent pangrei kamran nga hai bo.

ROM AVANGCHI TENG Y PAWLA I CHA PA NAI 10:11

Tameuh i cha-iu ly, “Ami py mymy ai ym nai ngierei ly amthang leaung y ai,” napi nai ne.

ROM AVANGCHI TENG Y PAWLA I CHA PA NAI 5:5

naibaly Phailo Kachai achi teng y ang pei nai Tameuh i tamen naira ly achi i paleung y ang lei chum nai deaungkho y athang khai naira my ly amthang hai leaung y leang.

ROM AVANGCHI TENG Y PAWLA I CHA PA NAI 9:33

“Khen cham, Zion y ly atlym naira lengseaung hawi paka naira lengseaung pui kakhai i, Ami py mymy ai ym nai ngierei ly amtheaung leaung y ai,” nanai tajiu nai kamta.

I PETERA 2:6

Ati mana nai mo nabaly Tameuh i cha-iu leu y ly, “Khen cham, Zion y ly taki i lengseaung aly len keh nai, Vawi takhra nai hawi vang teng parai nai kakhai nai ne; Ami py mymy ai ym nai ngierei ly amthang leaung y ai,” nanai tajiu nai ne.

AMTENG HAI NAI 3:9

Khen cham, Juda tatang ny y naimy, ka-chawi thui iy Juda angam nai Setan i achu nai kamkawmchi ai ly, khen cham, nichi kypkyp ai ly nang teng y katym hai iy, nang i kheu keung y ambeu hai ai i, nang ai katamen, nanai nichi ai kang pany hai ai.