ISAIA 45:6 - Khumi Common Language Bible

⁶ Kai, hina nai sa nai ly kai ly Areng ne iy, kai ny y baly tameuh takhra by y, nanai khaileaung katem i dengdai takhra katem y khrairei, awm nai khumi ngiereichi ai pany hai nai ne.

ISAIA 45:6 ပူးပေါင်းရင်းမြစ်များ

SAM 46:10

Mymy ly “Atiu naichi anawn u; kai ly khumi cheng cheaungkhangchi theung y py, khaileaung pri verei y Tameuh nang parai nai ne, nanai pany u,” nanai leu pei bo.

SAM 83:18

Nichi ly nang leaungrei naini Areng ne, nanai hawi, khaileaung pri verei y samrangchi tleaung y samrang ne, nanai py pany u sy.

ISAIA 11:9

Tameuh i nang parai nai Zion mawi salo y, ka-jeira lawm hai nai, ti y baly hawi y naira ati sai py awm ai ny y. Panglichi ly tui kawi mang nai kamta, huni pri y Areng ai pany nai cheng naira hawimy kawi angym ai.

ISAIA 37:20

Aw, kaichi i Areng Tameuh, vaimy kaichi ai Asuria chengchi kiu i nai atleu pi kyh ba. Hunaibaly nangmy leaungrei naini Tameuh ne, nanai khaileaung pri y awm nai khumi cheng bawibawichi my pany u ai,” nanai takeng bo.

ISAIA 43:10

“Aw, Israela chengchi awi, nangchi ly kai i pany hai nai keungchi ne. Nangchi ly kai ai pany u ai nai py, kai ly Tameuh harei khyh, nanai pany u thai ai nai py, kai ly nangchi ai kaimy i miseaung palawn ai nai kang vawi nai ne. Kai ny y baly tameuh takhra by y; mana khala py by y, vai mo mang py awm ai ny y.

ISAIA 44:6

Israela chengchi ai peang iy ama hai nai Areng, ati cheaungkhang sa thai nai keung Areng my, “Kai ly angchei khala i dengdai tem khala khrairei awm jojo nai keung harei khyh nai Tameuh ne. Kai ny y baly tameuh takhra by y.

ISAIA 45:5

“Kai ly Areng ne; kai ny y baly tameuh takhra by y. Nang ly kai ai pany y teu i py, kai ly nang i aly ngai nai atho haiho kang pei ai.

ISAIA 47:8

“Nang saw ala ai ngai nai khumi awi, amymy ai chymme bo, nanai khumi awi, hini leu tangai ba. Kai ly Tameuh tanrei len nanai py kai ka-tawm khumi ly by y, nanai py nang thui bo. Nang ly mana khala py lumai lawm ai ny y, mana khala py cho chanauchi alai vai ai ny y nanai py, nang ly athang khai bo.

ISAIA 49:26

Kai ly nang ai pahyp y naimy ana nai khumichi ai, mychi tengtawi atleh hai iy, kasa them hai ai. Huna nai khala kai ly nangchi ai atleu nai keung Areng ne, nanai khumi bawibawichi my pany u ai. Kai ly Israela chengchi i sa thai naira awm nai keung Tameuh ne, nanai nichi pany u ai,” napi.

ISAIA 59:19

Nidym mang dengdai nisi mang khrairei, khumi bawibawichi ly mymy i amyn hawi sa thai naira haiho ai, jei hyn naimy tahm khai u ai. Mymy ly ho parai nai tavo tui kamta py, ho parai nai ali kamta py ang jeu ai.

Ezekiela 38:23

Hina nai hawimy kai ly nang parai iy chai parai, nanai khumi cheng cheaungkhangchi teng y kapatei ai. Naibaly kai ly Areng ne, nanai nichi pany u ai,” napi.

Ezekiela 39:21

Areng my, “Khumi cheng cheaungkhangchi ly kai i nang parai nai haiho niu u ai. Kai i ka-dyh ka-dawi tara chih naichi leu pacheang naira y, kai ly kaimy i sa thai naira ai ati mana teaung mo, nanai nichi teng y patei pi ai.

JOELA 2:27

Aw Israela chengchi awi, kai ly nangchi ai kang awm hai nanai py, kai, Areng ly nangchi i Tameuh ne iy, kai ny y baly Tameuh takhra by y nanai py, huna nai khala y nangchi pany u ai. Kai i khumichi ly mana khala py, thui tamawn nai avum u bi ai ny y.

MALAKHI 1:11

Khaileaung katemra y khrairei, khumichi ly kai ai tahm khai nai palo u bo. Nichi ly meingtym tleirei y mui katuichi patawi iy, paleung ka-nora hawi nai kapathyprachi kai teng y talam u. Nichi bawibawi py kai i amyn palo u bo!