ISAIA 36:6 - Khumi Common Language Bible

⁶ Nangchi ly Aikupta pri i kasabawmra ajeng u bo. Na i py huni pri ai paleung pado nai ly tleu iy kiu y viu reng nai japang uipo ai cheaungvawi palawn nai atawm. Aikupta samrang ly mychi ai paleung pado nai neng khala, japang uipo hawi naini atawm nai ne,” napi.

ISAIA 36:6 ပူးပေါင်းရင်းမြစ်များ

2 ARENG KEH 17:4

Na i py sanengrei khala y Hosea ly Aikupta samrang so teng y; savaichi pato iy kasabawmra hnei chum baly, Asuria pri y kahm pei y naimy awm vui bo. Huna nai satang ly Shalmaneser my thai nai khala, Hosea ai patiu iy theaung u khai hai nai ne.

2 ARENG KEH 18:21

Nang ly Aikupta pri i kasabawmra ajeng nai ne. Na i py huni pri ai ym nai ly japang uipo keung ai cheaungvawi palawn nai hawi atawm. Huni japang uipo keung ly tleu iy, nang i kiu y ang viu ai. Aikupta samrang ly mymy ai ym naichi i vui y japang uipo hawi atawm,’ nanai leu pei bo,” napi.

SAM 146:3

Khumichi i lu sa nai keungchi ai ym u moh; mani khumicho ly nangchi ai atleu pajau y leang.

LEU KACHENG 25:19

Khri pa-rei aly aeang nai thym khala, ka-ym by y nai khumi teng y abyh nai ly ho lenghau nai hawi teicha teinei taai nai, ti y baly kheu tabai naimy lam tako nai atawm.

ISAIA 31:1

Aikupta pri mang y kasabawmra hnei ai nai chei naichi ly taham si! Nichi ly keaungngochi, tavai ka-richi hawi keaungngo atang nai risachi, napi nai Aikupta pri i tavai atho len nai ai ym u nai ne. Na i py Israela chengchi i chai parai nai Areng Tameuh ai ly ym u y. Kasabawmra nga ai nai mymy teng y py hnei u y.

ISAIA 31:3

Aikupta chengchi ly vawinam arengchi ny y. Khumi mangrichi teu na a. Nichi i keaungngochi py vawinam keaungngochi ny y. Areng my bawi la nai khala y, atho len nai cheng ly dei lawm vui ai. Kasabawmra nga nai khumi chengchi py anawi vui ai. Huni khumi cheng amjy nyhrei py myh kang vui ai.

Ezekiela 17:17

Babulon tavaimichi ly khumichi ai padei ai nai abyhra amkeuchi sa iy tui apaichi tai u nai khala y, atho len nai Aikupta samrang i tavaimi kamkawm malawn py, Juda samrang ai sabawm pajau ai ny y.

Ezekiela 29:16

Israela chengchi ly nichi teng y mana khala py abyh u ai ny y. Huna nai abyh lawh nai deaungkho y, mymychi ly mana tanrei tamang na mo, nanai Israela chengchi teng y Aikupta pri i avum nai khym taham my pany hai ali teang ai. Huna nai khala kai ly sa thai naira angym nai Areng ne, nanai Israela chengchi pany u ai,” napi.