ISAIA 31:1 - Khumi Common Language Bible

¹ Aikupta pri mang y kasabawmra hnei ai nai chei naichi ly taham si! Nichi ly keaungngochi, tavai ka-richi hawi keaungngo atang nai risachi, napi nai Aikupta pri i tavai atho len nai ai ym u nai ne. Na i py Israela chengchi i chai parai nai Areng Tameuh ai ly ym u y. Kasabawmra nga ai nai mymy teng y py hnei u y.

ISAIA 31:1 ပူးပေါင်းရင်းမြစ်များ

ATITI AWM ANGCHEI NAI 47:17

Naibaly nichi ly Josepha teng y syn u i, Josepha ly nichi i keaungngochi, sichi, mi-ichi, beramchi, keaungngo kano kasauchi ai chohchi hawi katheung pi bo. Huni saneng y mipuichi ly mychi i tawnbawichi hawi choh katheung u nai ne.

2 NENG SATANG 16:7

Huni neng khala amo Hanani ly samrang Asa teng y chei iy, “Samrang nang ly nangmy i Areng Tameuh ai paleung pado y naimy, Suria samrang ai paleung pado lawh nai deaungkho y, Israela tavaimichi ly nang teng i nai tleaung veng bo.

2 NENG SATANG 16:9

Areng ly mymy ai ka-ym awm nai khumichi teng y sa thai naira pei ai nai khaileaung pri verei y, hawihai palai khen patawm bo. Nang ly hawi y naira sa lawh nai y, vai i dengdairei tavai atiu nai awm jo ai,” napi.

JOBA 39:11

Nang ly ni i atho len nai ai a-ym pajau a? Nang i kalop kalen ai ni teng y au pajau na a?

SAM 20:7

Phyrei khumichi ly mychi i tavai ka-ri hawi keaungngochi ai a-ym u. Na i py achi ly achi i Areng Tameuh ai a-ym u nai ne.

ISAIA 10:17

Israela chengchi i kangvang ne iy, chai parai nai Tameuh ly aleng keung amjy cheaungkhang takhawi y naimy, ati cheaungkhangchi ai kanirei y my kang hai nai mai kamta atawm ai.

ISAIA 2:7

Nichi i pri ly muku, tangka awm ma mang nai deaungkho y, khri pa-rei nang chawn nai ne. Nichi i pri y keaungngochi nawi parai i, keaungngo ka-richi py khrikhri pa-rei nawi parai nai ne.

ISAIA 20:5

Ethiopia pri ai ym iy, Aikupta pri satang kamlyh leu katheu u nai khumichi ly athang khai naira tama ai i, paleung phra u ai.

ISAIA 22:11

Tuikan kangngym dengdairei leaung nai tuichi ai mary theung y kadeng ai nai, tui kadengra harei py sa u bo. Na i py nichi ly huni kalop ai jangni khala my pasym pi yb nai keung, hina nai tym hai nai keung Tameuh ai ly tahm khai u y.

ISAIA 30:16

Huna nai tangai ai nai tleaung y ly rang parai nai keaungngochi atang iy, paleung ka-echi teng i dengdairei preang ai nai dawn pasym u nai ne. Nangchi i ka-dawn ly hawichy y! Ati mana nai mo nabaly nangchi ly preang u takengkei ai tla nai deaungkho y ne. Nangchi ly nangmychi i keaungngochi ai rang parai, nanai athang khai u teu i py, nangchi ai ang hui nai nichi i keaungngochi ly rang keh ai.

ISAIA 36:6

Nangchi ly Aikupta pri i kasabawmra ajeng u bo. Na i py huni pri ai paleung pado nai ly tleu iy kiu y viu reng nai japang uipo ai cheaungvawi palawn nai atawm. Aikupta samrang ly mychi ai paleung pado nai neng khala, japang uipo hawi naini atawm nai ne,” napi.

ISAIA 36:9

Nangchi ly sa thai naira theang keh nai Asuria tavailu arengchy ai malawn py, tiu u pajau y leang. Na i py Aikupta chengchi teng i nai tavai ka-ri hawi keaungngo atang nai risa kasabawmrachi kadeaung u lawh.

ISAIA 43:15

Kai ly nangchi i chai parai nai Areng Tameuh ne. Israela chengchi awi, nangchi ai kaimy sa nai ne; kai ly nangchi i samrang ne,” napi.

ISAIA 5:12

Nangchi i pawichi sa naira y tarochi, atymchi, byhlyhchi hawi kreip hangchi abawi reng nai ne. Na i py Areng ly ati mana sa mo, nanai nangchi pany y.

ISAIA 57:9

Nangchi ly rimui hang hawi mui kahawichi amjui amthyp iy, Mole tameuh ai chiu ai nai chei u bo. Kamlo kang sa hawi tavau pri y khrairei py, savaichi pato iy tameuhchi ai hau u nai ne.

ISAIA 64:7

Nang i amyn y nang teng y leaungrei py chiu so y. “Sabawm kyh ba,” nanai leaungrei py hnei ai nai jeu y. Kaichi i kamngochi deaungkho y, nang ly meimai hi vui iy kaichi ai khai su bo.

ISAIA 9:12

Nisi mang i Suria pri hawi nidym mang i Philistia prichi ly Israela pri tamyh vui ai nai angvei u rym bo. Huna nai y Areng i kado theu nai ly rym y. Nichi ai parip ai nai mymy i kiu pheu nai ly awm jo rai nai ne.

ISAIA 9:13

Israela chengchi ly uikheih u y. Ati cheaungkhang sa thai nai Areng ly mymychi ai pajeng teu i py nichi ly mymy teang y ali u teang y.

JEREMIA 17:5

Areng my, “Khumi ai py, dei thai nai khumi i haiho ai py, ym iy kai ai nithun thun nai khumi ai py kaimy amsawi lawi hai ai.

JEREMIA 2:13

Kai i khumichi ly heng nai tuino, napi nai kai ai khai su iy tui atang y nai akosyn nai tui kadengra tuikanchi sa u iy, kamngo amjy nyhrei sa tamang u bo.

JEREMIA 37:7

kai teng y pato nai keung Zedekiah teng y, “Nang ai sabawm ai nai vai, amsa nai Pharao samrang i tavaimichi ly mychi i awm nai Aikupta pri y vawi u ali teang ai.

JEREMIA 42:14

Tavai ka-jeira avum bi y ai nai, tavai pasau ai nai baw katyn thai bi y ai nai, kajeu kanglam by y nai Aikupta pri y kaichi kachei u ai,’ nanai nangchi thui ai nai avo y.

Ezekiela 17:15

Na i py Juda samrang ly tavai thau i, keaungngochi hawi tavaimi risa neangneang kasabawmra nga ai nai, Aikupta pri y savaichi pato bo. Ni i katau eaung a? Huna nai sa nai ly law tleaung na a? Ka-lyra sumneang akhai nai taphra nai ly pajeng naira avum y naimy awm na a?

Ezekiela 29:16

Israela chengchi ly nichi teng y mana khala py abyh u ai ny y. Huna nai abyh lawh nai deaungkho y, mymychi ly mana tanrei tamang na mo, nanai Israela chengchi teng y Aikupta pri i avum nai khym taham my pany hai ali teang ai. Huna nai khala kai ly sa thai naira angym nai Areng ne, nanai Israela chengchi pany u ai,” napi.

DANIELA 9:13

Kaichi ly Mosi i reitara y awm nai kamngo pajeng naira bawibawi ly avum u bo. Na i py kaichi i Areng Tameuh awi, vaimy kaichi ly nang i kangai mang y atho sa iy, kamngora i nai en vui ai nai hawi leu meitang lam mang y abang ai nai py, atho kaso u y rai.

HOSEA 11:5

“Nichi ly kai teng y vawi u ali teang y nai deaungkho y, Aikupta pri mang y vawi u ai nai tla ai. Asuria samrang ly nichi ai peang ai.

HOSEA 11:9

Kai ly kado theu iy nang ai pajeng ai ny y; kai ly Israela ai taphra bi ai ny y. Ati mana nai mo na baly kai ly khumicho ny y, Tameuh ne nai deaungkho y ne. Chai parai nai keung kai, Tameuh ly nangchi hawi vanrei awm nai ne. Kai ly kado theu naimy nangchi teng y kang jeu ai ny y.

HOSEA 14:3

Asuria samrang ly kaichi ai mana khala py atleu pajau y. Tavai keaungngochi ly kaichi ai amo hai pajau y. Kaimychi kiu hawi sa nai mynchi ai, kaichi i Tameuh, nanai thui ali bi y ai. Aw Areng, nang ly awmra jeaungmang nai khumichi ai pahen nai ne”

HOSEA 7:7

“Nichi ly kado theu nai paleung bi phui na i, peang nai keungchi ai tleh u bo. Nichi ly samrangchi ai leaungrei bo y leaungrei tleh u nai ne. Na i py kai teng y kasabawmra nga ai nai, ami py hnei u y,” napi.

HABAKKUK 1:12

Aw Areng, nang ly angchei khala i dengdairei Tameuh ne. Nang ly kaichi i Tameuh, Chai parai naimy deungtasarei awm nai ne. Aw Areng, kai i Tameuh hawi abyhra lengseaung, “Nang ly Babulon chengchi ai vawi takhra iy, kaichi ai pajeng thai ai nai nichi ai atho angym hai bo.

HABAKKUK 3:3

Tameuh ly Edom pri mang dengdairei ang jeu ali teang ai; Chai parai nai Tameuh ly Paran mawi aheung mang dengdairei ang jeu ai. Mymy i phum-ang ly kani khusang y khiu na bo. Khaileaung py mymy ai palo nai raawi hawi kawi na bo.

ZEKHARIAH 10:5

Juda khumichi ly lamchira i aneaung kapan theung y, paleung ka-echi ai chiu piupa nai tavaimichi kamta, eaung naira nga u ai. Areng ly nichi hawi vanrei awm nai deaungkho y, nichi ly paleung ka-e keaungngo atang nai risachi ai malawn py tiu nai pajau vui ai.

Leu Thui Nai 17:16

Samrang ly my i tavaimichi i vui keaungngo neangneang khawn ai nai avo y. Areng my mymy i khumichi ai Aikupta pri mang y ali teang moh, nanai leu pei nai deaungkho y, samrang ly keaungngo van ai nai huni pri y khumi pato moh.

Leu Thui Nai 20:1

“Nangchi ly paleung ka-echi ai tiu naira y, nangchi tleaung y atho len nai ka-ri kamkawm, keaungngo kamkawm, tavaimi kamkawmchi hawi avum nai khala, nichi ai jei u moh. Nangchi ai Aikupta pri i dengdairei atleu nai keung Areng Tameuh ly nangchi hawi vanrei awm hai ai.