Naibaly ym nai khumi mipuichi ly paleung py dawn nai py vanrei awm, mymychi theung y leaungrei py yhmtheaung awm nai ly, Kai i teu, nanai angam y; nichi ly atiti bawibawi vanrei ahum bo.
Amjo amnauchi awi, nangchi ai ly miseaung ny y ai nai ang palau u nai ne; na i py nangchi i miseaung ny y naira ly tlang i vui ka-vo teaung u reng moh ly, tamen naira y phai asabawm u leungtang.
Krista Isu y ly lengkhym takip nai py, takip y nai py ati sai py kamran by y leang; ym naira y ly tamen naira deaungkho y atiti sa nai naini kamran awm nai teu.
Naibaly Krista my ang tamen nai hawi, Tameuh teng y miu katui lawn ai nai atiti talam naira hawi apathyp naira y achi i jeng y ang pei nai kamta ly tamen naira y tako u.
Amjo amnauchi awi, kaichi ly nangmychi molam y ly Tameuh teng y kawn nai leu thui jojo ai nai tla:huni ly avo khyp, ati mana nai mo nabaly nangchi i ym naira ly khri pa-rei veang nai, nangchi bawibawi y atamen leungtang naira ly peung nai tleaung y peung ra peung ra lawh veng;
Amjo amnauchi ai tamen tatang ai nai leu meitang patawm u iy, nangchi i phailo ai chai hai u chum nai deaungkho y paleung y hawihai palai atamen u leungtang:
Kangkhym kangtem y ly nangchi bawibawi paleung vanrei awm u ly, pahen nai paleung awm u, amjo amnauchi kamta atamen u, neaung kahawi awm u, leu anui naimy awm u ly:
naibaly Tameuh ai dawn ryhryh naira y ly amjo amnauchi ai aniu ngai naira abawi u ly, naibaly amjo amnauchi ai aniu ngai naira y ly tamen naira abawi u.
Ami my, “Kai ly Tameuh ai tamen,” napi iy, amy i amjo amnau ai niu ngai y baly, mymy ly ka-chawi thui nai teu; amy i amjo amnau niu ryhryh nai ai malawn py tamen y pui baly, Tameuh niu vai y nai ai ipsaly mana tamen thai ai mo?