Ezekiela 5:12 - Khumi Common Language Bible

¹² Nangchi theung i phy thomrei y phyrei khumichi ly marychi theung y no kanghawi, kajeu kanglam y dei u ai. Takhra phy thomrei y phyreichi ly mary angam mang y haisau tamo y dei u ai. Huni bo i phy thomrei y phyrei ai ly ali theung y pakheang pawn iy kaimy haisau hawi tleh ai.

Ezekiela 5:12 ပူးပေါင်းရင်းမြစ်များ

ISAIA 1:24

Hunai deaungkho y sa thai naira angym nai Israela chengchi i Tameuh, ati cheaungkhang sa thai nai keung Areng my leu pei nai vai, tangai ba. Mymy ly “Kai ly kaimy i paleung ka-e napi nai nangchi ai vawitheung tha ai i, nangchi ly kai ai mana mo i py, khrukhra hai pajau ai ny y.

JEREMIA 13:24

Areng ly khutaha daichi ka-vym mang ali aho nai theung y akheang nai choh ali kamta, nangchi ai ahei hai phro ai.

JEREMIA 14:12

Nichi ly biu hai naimy kasabawmra hnei takeng teu i malawn py, kai ly khumichi i aeu nai raawi katangai pi ai ny y. Nichi ly kai teng y leng patlum nai kapathypra hawi katalamrachi talam i py, kai ly kawn pi ai ny y. Huna nai kakawn pi ai nai tleaung y ly tavai keung y dei hai ai. Takang theu hai iy no kanghawi y dei hai asi,” napi.

JEREMIA 15:2

Nichi my, kaichi ly mani mang y kachei u ai mo?, nanai nang teng y ang deng u nai khala, hina nai thui pi: “Nangchi phyrei ly no kanghawi man iy dei u ai i, no-na man naira mang y chei ai! Phyrei ly tavai keung y deu u ai i, tavai atiu naira mang y chei u ai! Phyreichi ly takang theu naira y dei u ai i, takang theu naira mang y chei u ai! Phyreichi ly patiu iy langheng y hawi ai i, patiu naira avum ai naira mang y chei u ai!,” nanai kai teng y leu ang pei nai ne.

JEREMIA 15:9

Cho chanau leaung saryhrei dei nai i amhm ly paleung pany y na bo. Ni i kanithun kangvang ly kaveng lawm veng bo. Ni ly kangji nga naimy paleung si ngam jo nai ne. Nangchi theung i dei kamthumchi ai ly kaimy paleung ka-echi ai katleh hai ai. Hini ly kai, Areng my thui nai leu ne.

JEREMIA 21:9

Hini mary y awm nai ngiereichi ly tavai keung y dei u be ai, ti y baly kajeu kanglam hawi no kanghawi y py dei u ai. Na i py mary angam mang y theu iy katanmeuh naimy tiu nai Babulon khumichi teng y, kasum apei nai khumichi ly dei u ai ny y; ati py ne sy, dei y i, heng u ai.

JEREMIA 24:10

Nichi hawi nichi i amsi pajochi teng y pei nai pri y leaungrei ai py kangheng tleaung y pa-rei, kai ly nichi ai tavai takai ka-jeira py, tahum takang hawi no kanghawi py katym hai ai,” napi.

JEREMIA 42:22

Hunai deaungkho y nangchi ly tavai takai y mo, tahum takang y mo, ti y baly no kanghawi y mo man iy, nangmychi chei iy awm ai nai pri y dei u ai,” nanai thui pi bo.

JEREMIA 44:27

Nangchi nang chawn ai nai tleaung y ly phra u ai nai kang sa ai. Aikupta pri y awm nai Juda khumichi ly leaungrei py tleaung y na pa-rei, tavai takai hawi, no kanghawi y dei u ai.

JEREMIA 9:15

Hunai deaungkho y nichi i tlang tleaung y Israela chengchi i, ati cheaungkhang sa thai nai keung kai, Areng my mana kang sa ai mo, nanai tangai cham. Kai ly kaimy i khumichi ai kho nai dona keung pacho iy, dei asi abawi nai tui nei hai ai.

JEREMIA 9:16

Kai ly nichi hawi nichi i amsi pajochi malawn py thai vai y nai khumi chengchi theung y, nichi ai ahei hai ai. Hunaibaly nichi phra be ai nai pa-rei tiu ai nai tavaimichi kapato ai,” napi.

Ezekiela 12:14

Kai ly ni i samrang bangtangchi, tau pei nai keungchi hawi tamcheaung risachi ai, meingtym tleirei y ahei hai pawn ai. Khumichi ly nichi ai haisau hawi tleh ai nai hau u ai.

Ezekiela 14:17

“Ti y baly kaimy huni pri y tavai atiu hai ai i, khumi hawi tawnbawichi raurei tamyh pawn ai nai taphra thai nai haichi pato nai khala y,

Ezekiela 14:19

“Kai ly huni pri y no kanghawi tym hai iy kado theu naira my khumi neangneangchi hawi, tawnbawi neangneangchi ai dei hai baly,

Ezekiela 14:21

Sa thai naira angym nai Areng my leu pei nai ly “Kai ly khumi hawi tawnbawichi tamyh ai nai tavai takai, tahum takang, mawi kasichi hawi no kanghawi napi nai, hawi y keh nai pajeng naira amjy palyhrei, Jerusalem mary y tym hai ai.

Ezekiela 16:42

Naibaly kai ly kado theu nai rym ai i, awmnem ai; kado theu bi ai ny y, ka-e paleung py awm bi ai ny y leang bo.

Ezekiela 21:22

Huna nai khala, ‘Jerusalem,’ nanai tajiu nai ka-ma-ra thaicheng ly ni i lamtang kiu y tym bo. Huni thaicheng ly ni teng y mary apai taphra ai nai dengkeaung beangpuichi tai iy tiu ai nai leu pei nai tavai kachyh nai katyn aeu ai nai py, katheu taphra ai nai dengkeaung beangpui ai py, abyhra khaileaungchi taphum nai hawi abyhra amkeuchi tai ai nai py thaicheng my patei ai.

Ezekiela 24:13

Aw Jerusalem mary, nang ly kaja hawi y nai molam y, nangmy ai chai hai y bo. Kai ly nang ai chai pa-rei sa teu i py, nang ly chai y naimy awm nai ne. Kai i kado katheu pajeng naira avum y ryrei ly nang ly chai lawh ai ny y.

Ezekiela 33:27

“Kai ly Tameuh kangheng ne tatang; hunai y phra seaungkhrang nai marychira y awm nai khumichi ly tleh naira avum u ai, nanai sa thai naira angym nai kai, Areng i pany hai nai leu nichi teng y thui pi. Daichi avangchira y awm nai khumichi ly daichi mawichi i teicha lawm ai. Mawichi hawi tapiuchira y aheu nai khumichi ly no-na y dei u ai.

Ezekiela 36:19

Nichi i sa nai hawi amhi amtlau nai molam y nichi ai pajeng iy, pri tleirei y amprei phro i, pri takhrachira y ahei hai bo.

Ezekiela 43:8

Samrangchi ly mychi i katheu chenghengchi hawi katheu kheutangchi ai, kai i Achura yhm katheu chenghengchi hawi katheu kheutangchira y tabiri iy sa u. Huna nai y kai hawi nichi sala ly angpang harei arai khyh bo. Nichi ly amso ngai hawi nai cheaungkhangchi sa iy, kai i amyn kachai ai thui tamawn u bo. Huna nai y kai ly kado theu i, nichi ai taphra nai ne.

Ezekiela 5:10

Naibaly Jerusalem mary i amhm ampochi ly mymychi i cho chanauchi ngan cha u ai; cho chanauchi my py mychi i amhm ampochi i ngan cha u teang ai. Nangchi i dei kamthumchi ai py kai ly pajeng iy, meingtym tleirei y ahei hai ai.”

Ezekiela 5:17

Nang i cho chanauchi ai dei hai ai nai daichi mawi kasichi hawi cha nei takang nai py, nang ai padei ai nai no kanghawi khrukhra naira hawi tavai takaichi py kang pato ai. Hini ly kai, Areng i leu pei nai ne,” napi.

Ezekiela 5:2

Phyrei ai ly Jerusalem mary y katanmeuh nai neng tem nai khala mary theung y mai veang. Takhra phy harei ai lo ly mary theung y amki iy haisau hawi tawpbaw pawn. Vai phy harei ai ly ali theung y pakheang veng. Kai ly huni phyrei ai pareng iy haisau hawi kalei ai.

Ezekiela 6:8

“Kai ly khumi phyreichi ai haisau tamo i nai tleaung hai iy, pri takhra tleirei y ahei hai ai.

Ezekiela 7:15

Lamchira y atiu naichi awm; yhmchira y no naira hawi kajeu alam naichi py awm. Daichi avang y awm nai khumichi ly haisau tamo y dei u iy, mary theung y awm nai khumichi ly no kanghawi hawi, tahum takang y dei u ai.

Ezekiela 7:3

Aw Israela pri awi, nang i phra ai nai neng tym bo. Nang i sa naichi molam y kai ly nang ai tara kang chih bo i, nang ly kai i kado theu naira avum ai. Nangmy i sa nai amso ngai naichi vawilai ly nang ai vawitheung kang tha ai.

Levi 26:33

Kai ly nangchi teng y tavai takai tym hai iy, nangchi ai pri takhra mang y ahei hai ai. Nangchi i pri ly khumi angso by y iy nangchi i marychi py phra seaungkhrang ai.

AMOS 9:4

Paleung ka-echi my patiu vui i py, nichi ai padei ai nai kaimy leu pei ai. Kai ly nichi ai sabawm y naimy, taphra vui ai nai leu pacheang veng bo,” napi.

AMOS 9:9

“Paho tleaung y chohnei alai nai kamta, kai i leu hawi Israela khumichi ai alai vui ai. Khumi cheng cheaungkhang theung y alai chum baly, ataing y nai khumi ngiereichi ai ly kaimy charyh vui ai.

ZEKHARIAH 7:14

Ali kamchai kamta aho hai iy, pri takhra mang y ahei hai pawn bo. Hini hawi nai pri py, khumi angso savai tlang nai meingtym lawm vui bo,” napi.

Leu Thui Nai 28:65

Nangchi ly nangmychi tym nai meingtym tleirei y awmnem naira ngo u y ai, saleaung khuteng by y. Areng ly nangchi ai paleung bi hai ai. Athang khai naira by y ai i, paleung phra hai ai.

AMTENG HAI NAI 6:8

Hunaibaly kai ly khen i, khen cham, keaungngo ka-mang harei awm:huni tleaung y atang nai keung i amyn ly Dei Naira ne: naibaly Tavau Kho ly ni teng y abang bo. Naibaly nini ly haisau hawi, takang theu hai nai hawi, kanghawi kanglai tym hai nai hawi, khaileaung i mawi kasichi ai py teaung iy, khaileaung phy palyhrei ra y phyrei y padei ai nai leu nga bo.