Mymy i leu pei nai ly “Kai i leu tangai nai prichi amyn la nai khala, Aikupta pri hawi Babulon pri tabawi ai; Philistin pri, Turu pri hawi Ethiopia pri i khumichi py, Jerusalem mary i khumichi amyn la naira y tabawi ai.
Mymy ly “Nang khumicho awi, Turu mary i khumichi my, ‘Jerusalem mary i katheu pa-kho ly phra vui bo! Huni mary i katheuchi ly am-eaung naimy awm bo! Huni mary ly kaichi hawi acham nai mary ny y leang bo!,” nanai amo theu naimy aeu u nai ne.
Kai ly nang ai ka-jei awm nai tem naira kang tym hai ai bo. Nang ai khumichi my hau i py avum ai ny y,” napi. Hini ly sa thai naira angym nai Areng i pei nai leu ne.
Areng my, “Turu khumichi ly kamngo sa nai bo y sa panawi u bi nai deaungkho y, kai ly nichi ai meitang khyp kapajeng ai. Nichi ly khumi chengvui jeungreichi ai Edom pri mang y pri pala pawn nai ne. Naibaly nichi ly mychi naimy amsawi amnai asa nai sumneang ai taphra vui bo.
