Ezekiela 22:12 - Khumi Common Language Bible

¹² Nang theung i nang i khumi phyreichi ly un cha iy, khumi ai padei nai keungchi lawm u bo. Phyrei khumichi ly mymychi Israela chengchi teng y tangka paseng i, kamran la iy mymychi ai nang hai u. Nichi ly kai ai tami u veng bo,” napi. Hini ly sa thai naira angym nai Areng i leu ne.

Ezekiela 22:12 ပူးပေါင်းရင်းမြစ်များ

NEHEMIA 5:1

Neng kra kyh nai bo y Juda neampacho hawi neampachy neangneangchi ly mymychi tengtawi athui apreaung iy tangam u bo.

NEHEMIA 5:7

bawi la pi ai nai dawn nai ne. Kaichi ly mipui luchi hawi peang nai keungchi teng y, “Nangchi ly nangmychi i amjo amnauchi ai ana u lawh ly!” nanai kapreng bo. Kai ly hini khrukhra nai paju pachai ai nai mipuichi ai pangym iy nichi teng y,

SAM 106:21

Aikupta pri y lyh ai hawi nai leaungsaichi hawi, mymychi ai atleu pi nai Tameuh ai tami u bo.

SAM 15:5

Nichi ly katy lo y naimy, mychi i tangka alai ai nai pei reng; kamngo by y nai khumichi ai pasum ai nai molam, un langseaung la iy pany hai pi nai leu thui vai y. Huna nai khumichi ly chymme naimy awm jo ai.

LEU KACHENG 1:19

Atiu alawm nai ly atiu alawm nai khumi ai dei hai jojo reng. Hini ly hawi y sa naira y heng nai khumichi i avum reng nai khym taham ne.

ISAIA 1:23

Nang i miteaung kehchi py langmeang thau naichi, kangviu ai atho pei naichi lawm u bo. Nangchi ly un langseaungchi la u teu i py, Tara jeungra y nuro nukai chochi ai amo hai u y. Lumai cheaungtichi i ka-jo ka-thuichi ai py, tangai iy chih pi y.

ISAIA 17:10

Aw Israela pri, nang ly nang ai atleu iy lengseaung pui kamta ama hai nai Tameuh ai tami veng lawh bo. Nang ly cheng takhra khumichi i tameuh ai chiu ai nai apu parai nai keungchi ui nai ne.

ISAIA 56:11

Nichi ly cha nai paleung anyp pajau y, ngai ala nai uichi hawi atawm. Nichi ly ati sai py ka-dawn by y nai lu sa naichi ne. Mychi kangai sa akyhkyh iy, amy i vui y kamran hau u khyh naichi ne.

JEREMIA 2:32

Anglo ly mymy i amia lengseaungchi ai py, deaung vawi nai anglo ly mymy i apom nai ateaungchi ai py, tami vui thai na a? Na i py kai i khumichi ly kati pajau y nai neng kanichi neng khala, kai ai tami u veng bo.

JEREMIA 3:21

Mawi aheungchi salo y raawi thai nai ne. Huni raawi ly Israela mipuichi i kamngo theung y anum naimy mymychi i Areng Tameuh ai tami u veng nai deaungkho y, vo tangam nai tarawi y hnei takeng u nai raawi ne.

JEREMIA 6:13

Khumi katheang kalen bawibawichi ly teng y naimy nang chawn ai nai hau u bo. Amochi hawi pathyp pi nai keungchi malawn py, khumichi ai li-tapawp u nai ne.

JEREMIA 9:1

Kai ly dei naira avum nai kai i chengchi i vui vum kanithun vo pajau ai nai kai i meichi ly meikatui ly tuino kamta py, kai i lu ly tuikan kamta py, lawm ai ngai parai na bo.

Ezekiela 18:13

Ni ly kamran nga ai nai tangka paseng; huna nai khumi ly heng pajau na a? Heng pajau y leang. Ni ly huna nai amso ngai hawi naichi sa nai deaungkho y, ni ly dei ngaw ai. Ni i dei nai ly my i kamngolai ne.

Ezekiela 18:8

Ni ly kamran nga ai nai tangka paseng y. Hawi y naichi ai amkyn iy ka-jo ka-thuira y py kahawi padyh padawi pi.

Ezekiela 23:35

Sa thai naira angym nai Areng my leu pei nai ly “Nang ly kai ai tami vui iy nithun thun naimy kamleaung paleung hawi bima kalop sa nai molam y, nang ly patang naira avum ai,” napi.

Ezekiela 36:12

Kai i khumi Israela chengchi awi, kai ly nangchi ai huni pri y awm u ali teang ai nai kang pahawi ai. Huni pri ly nangmychi peang nai pri tatang lawm ai. Naibaly nangchi i cho chanauchi ly mana khala py, kajeu alam u bi ai ny y.

Levi 19:13

“Amy tleaung y atho di nai khumi ai, kamjau kamteang khai moh; ami i vawnsai lawm moh. Ka-tham vang pei ai awm nai ly kani dym y naimy pei praw ai nai tla; khawn mang khrairei pei y naimy khai moh.

Levi 25:37

Ni teng y alai ai pei nai tangka ai ty lo moh. Teicha teinei kamran palyn iy ni teng y jo moh.

AMOS 8:4

Nangchi i pri theung y kajeu alam naichi ai chiu piupa iy, khumi kamawnchi ai ana nai khumichi awi, hini leu tangai u.

AMOS 8:6

Vang teng y nai choh pui chomaw ai vang palyn iy jo ai. Kalai kangngym pe pajau y nai khumi kamawn ai hau iy, miseaung palawn ai nai phainai bomrei vang by y nai hawi van ai,” nanai thui u bo.

MATTHAI 23:13

“Na i py nangchi Reita patiu nai keungchi hawi Pharisai tapawp naichi awi, nangchi ly taham si! Nangchi ly amichi i vui kani pri my peang naira ly kho hai tawp veng iy, nangmychi py kun u y i, kun ai naichi ai py nangchi my kun ai nai pei u y.

MATTHAI 23:25

“Reita patiu nai keung hawi Pharisai tapawp naichi awi, nangchi ly taham si! Nangchi ly khau hawi saibi ly salo mang paju u i, theung mang y ly cha parawp nai hawi amkym pajau y nai kawi bo.

LUKA 18:11

Pharisai ly angdo i mymy naimy hina nai chiu asa ryp, ‘Aw Tameuh, kai ly khumi takhra kamta, um paviu naichi, hawi y naichi, pajang sa naichi ny y nai hawi, hini akeu cheaung nai keung kamta py kai ly ny y nai deaungkho y nang teng y kai kawn parai ba.

LUKA 19:8

Naibaly Zakai ly angdo i Areng teng y, “Khen cham Areng, kai i yhmtheaung ka-hyhrei kamawnchi teng y kapei ai; naibaly ami teng i py atiti um paviu teu i py pyh palyhrei kaheung teang ai,” napi.

LUKA 3:13

Mymy ly nichi teng y, “Pei nai bo y rawn takeng u moh,” napi.

I KORINTH 5:11

Na i py vai ly ami py amjo amnau i amyn apu makho iy angai nai khumi mo, atakaw nai khumi mo, myn y chiu nai khumi mo, mhm pavui nai khumi mo, um paviu nai khumi mo ne baly, huna nai khumi hawi amkawm y ai nai hawi, cho py cho y ai nai py nangchi teng y kang tajiu bo.

I KORINTH 6:10

paviu naichi mo, paleung no naichi mo, pavui naichi mo, ami mi ai jo naichi mo, um paviu naichi mo ly Tameuh i pri amtym ai ny y leang.

Leu Thui Nai 16:19

Nichi ly tara chih nai khala teng y nai hawi meimai khen ai nai tlo y, un tangka py cha ai nai tlo y. Huni un langseaungchi ly khumi kachengchi hawi khumi kahawichi i mei paju hai iy, tara lam tamang hai reng nai ne.

Leu Thui Nai 23:19

“Nang ly nangmychi Israela cheng tengtawi leaungrei ai tangka mo, teicha teinei mo, ti y baly vawnsai ha harei mo, alai ai nai pei nai khala, katy cho moh.

Leu Thui Nai 27:25

“ ‘Kamngo by y nai khumi ai padei ai nai un tangka cha nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my, ‘Amen!’ nanai pathang u sy.

Leu Thui Nai 32:18

Nichi ly sa thai naira awm nai atleu keung, mymychi ai hengra pei nai keung Tameuh ai tami u vui bo.

I TIMOTHEI 3:3

patiu nai sai py kawp nai, kreip athai hang pavui y nai, khumi ai tabeang y nai, neaung hawi nai, jo sei y nai, tangka paleung no y nai,

JUDA 1:11

Nichi ly taham si! Mymychi ly Kaina i lam y tako i, vang nga ai nai Balam i tamang naira y angpreng lengleang naimy, korah i aei naira y ly tama nai bo.