1 SAMUELA 16:4 - Khumi Common Language Bible

⁴ Samuela ly Areng i leu pei nai kamta sa ai nai, Bethlehem mary y chei bo. Huni mary i lu sa nai miteaung kehchi ly kaso theu u naimy lamchung u i, “Areng awi, nang ly paleung awmnem naimy jeu nai a?,” nanai deng.

1 SAMUELA 16:4 ပူးပေါင်းရင်းမြစ်များ

ATITI AWM ANGCHEI NAI 35:19

Rakeli ly dei bo i, veu ai ly Ephrath mary mang y chei nai lam teng y up bo; vai ly huni meingtym ai ly Bethlehem, napi.

ATITI AWM ANGCHEI NAI 48:7

Kai ly ngamhm Rakeli i molam y hina nai kamta sa pi nai ne. Mesopotamia pri dengdairei kang vawi ali teang nai khala y, Kanan pri Ephrath mary ahawi y ni ly dei i, kai ly khri pa-rei paleung si parai. Kai ly ni ai Ephrath mary mang y chei nai lam teng y up nai ne,” napi. (Vai ly Ephrath napi nai ai ly Bethlehem, nanai palau nai ne.)

2 SAMUELA 6:9

Naibaly Davida ly Areng ai jei nai deaungkho y, “Vai, kai ly hini Leu Maikawm Pawm ai mana angjeaung ai mo?” nanai thui iy,

1 ARENG KEH 17:18

Neampachy lumai ly Elija teng y, “Aw Tameuh i khumi awi, nang ly ati mana nai kai ai hini patang naira tym hai lawh mo? Nang ly kai i chapo ai dei ai nai pa-rei Tameuh teng y, kai i kamngochi pany hai ai nai hini meingtym y jeu nai a?” napi.

1 ARENG KEH 2:13

Naibaly Hakith i chapo Adonijah ly Solomon i amhm Bathaseba teng y chei; Bathaseba my, “Vai, nang jeu nai ly ahawi ka-dawi kamta jeu nai a?” nanai deng. Adonijah my, “Ne na a,” nanai pathang.

2 ARENG KEH 9:22

Joram my, “Nang ly tlamsa nai ka-dawn hawi jeu nai a?,” nanai deng. Jehu my, “Nang i ngamhm Jezabela my sa amteaung nai uimiu atam kawp nai hawi myn chiu naichi awm nai ryrei ly ati mana tlamsa naira awm pajau ai mo?,” napi.

HOSEA 11:10

“Khrangsi i hang nai kamta kai ly paleung ka-echi ai hang hai nai khala y, kai i khumichi ly kai nithun abang u ai. Nichi ly nidym ngan mang dengdairei, kai teng y jeu u kaliki ai.

HOSEA 6:5

Naibaly kai ly amochi ai pato iy, nangchi ai tara chih ai nai satang hawi, taphra ai nai satang thui hai nai ne. Nangchi teng i kai aly ngai nai ly rai y.

LUKA 2:4

Naibaly Josepha py Davida i dengtheung hawi kangpreang teang nai deaungkho y Kalili pri i Nazaret avang dengdairei Judai pri i Bethlehem avang napi naira y chei teang;

LUKA 5:8

Naibaly Simon Petera ly huna nai niu baly Isu i kheukhu ahawi y ambeu iy, “Areng, kai ai khai su ba, kai ly khumi kamngo he,” napi.

LUKA 8:37

Naibaly Kerasin pri tengtang i khumi bawibawichi ly khrikhri pa-rei jei nai deaungkho y ni ai ly mymychi teng i dengdairei chei veng ai nai takeng; naibaly mymy ly paleaung y atang iy ali teang bo.

1 SAMUELA 21:1

Davida ly pathyp pi nai keung Ahimelek awm nai Noba mary y chei bo. Ahimelek ly jei hyn naimy Davida ai ka-vum sa i, “Nang ly ati mana nai y nangmy tlairei jeu nai mo?,” nanai deng.