31 Leu Maikawm Pawm ai Jerusalem mary i chiu sa nai meingtym ra y kasyh nai bo y, samrang Davida ly hini khumichi ai Achura yhm theung y katyn kapau beu ai nai kalopchi pei nai ne.
Khumichi ly Pawm angjeaung u i, Davida my sa yb nai tai theung i pasym yb nai meingtymra y khai u bo. Naibaly Davida ly Areng teng y leng patlum nai kapathyprachi hawi amkawm nai kapathyprachi talam nai ne.
Achura Yhm mang y syn u. Pathyp pi nai keungchi hawi Levi theaungchi ly Areng i Taichy yhm hawi Taichy yhm i ateaung alangchi py, Achura Yhm mang y syn u nai ne.
Hunaibaly Samrang Davida hawi vanrei, Israela luchi, tavailu arengchi ly Leu Maikawm Pawm angjeaung ai nai molam, Obed Edom i yhm y chei iy, apu parai nai pawi sa u.
Samrang Davida ly khri pa-rei apu parai nai kanih mai ka-syn amthyp. Hunai kamta katyn kapau beu kawp naichi, nichi i lu Khenania hawi Pawm angjeaung nai Levi theaungchi py amthyp u nai ne. Davida ly apathyp nai ateaung py amthyp.
Levi yhm dengtheung phyreichi ly Achura yhm y katyn kapauchi beu u nai ne. Nichi i yhm dengtheung luchi ly vum, kanithun sa ai nai aly ngai nai deaungkho y, Achura yhm takun phyreichi ra y awm u i, takhra kalopchi sa ai nai ngo y nai ne.
Kalop sa nai khumichi ly Achura yhm leng amteaung nai khala y pathyp pi nai keungchi ly mychi i ateaung amthyp iy, bawchi syn naimy meingtym la u nai ne. Naibaly Asah nupai theung i Levi theaungchi my sa-rachi syn u; nichi ly samrang Davida my leu pei yb nai kamta, Areng ai palo u bo.
Naibaly huni khumi ly theung mang i ly-um mang y kai ai pahawi bo. Tosyh pa-kho i sahawi apai theung i ly-um y takun harei awm; Huni takun ly tokalawi mang y mo tha nai ne. Tokalawi pa-kho sahawi y py hunai kamta takun harei awm. Huni takun ly tosyh ngan mang y mo tha nai ne.