1 NENG SATANG 11:10 - Khumi Common Language Bible

¹⁰ Anui ichi ly Davida i amyn amthang nai risachi ne. Nichi ly Areng i adeu nai kamta, Davida ai samrang palyn pajau ai nai takhra Israela khumichi hawi vanrei amkawm iy, samrang i pri khaw hai nai keungchi ne.

1 NENG SATANG 11:10 ပူးပေါင်းရင်းမြစ်များ

2 SAMUELA 3:21

Abana my Davida teng y, “Kai ly vai chei iy Israela cheng vui jynreichi, samrang nang mang y amkawm ai nai sa pi ai. Nichi ly nang ai mymychi i samrang ne, nanai dawn u patyp ai. Naibaly nang ly nangmy ngai nai kamta, Israela pri verei y peang ai nai nga ai,” napi. Davida ly Abana ai chymme naimy pato jo bo.

1 NENG SATANG 11:3

Huna nai Israela chengchi ai lu sa naichi ly Hebron mary y awm nai Davida teng y tym u nai khala, samrang ly Areng i mo y huni khumichi hawi amkawm nai vaineng asa bo. Nichi my py Samuela teng y Areng my adeu nai kamta, Davida ai asitui lei iy Israela samrang y palyn u bo.

1 NENG SATANG 12:21

Nichi ly amyn amthang nai soraichi ne nai deaungkho y, Davida i risachi ai peang nai miteaung kehchi lawm nai ne. Kangkhym y nichi ly Israela tavaimi kamkawm theung y miteaung kehchi lawm u bo.

1 NENG SATANG 12:23

Areng my adeu pi nai kamta, samrang Sawla i meingtym y Davida ai palyn pajau ai nai molam, sabawm ai nai tavai leaungsai kawp yb nai sorai risa neangneangchi ly ni i tavaimi kamkawm theung y tym u bo. Huni khumichi i vuikanai ly anui mang ichi ne. Khopuichi hawi tivichi syn naimy, tavai ateaung kangym amthyp nai Juda theaung risachi leaung 6,800 Hawihai palai acham yb nai Simeon theaung risa leaung 7,100 Levi theaung khumi leaung 4,600 Aron kangpreang Jehojada nithun abang nai khumi leaung 3,700 Tavai atiu kawp nai thawndeang Zadok amjo amnau lu sa nai leaung 22 Sawla i nupai napi nai Benjamin theaung khumi leaung 3,000 (Benjamin theaung theung i nawi keh naichi ly Sawla i ka-ym awm nai khumichi ne) Ephraim risa leaung 20,800, nichi ly mymychi i nupaichi theung y amyn amthang naichi ne. Nidym mang Manase theaungchi theung i Davida ai samrang palyn ai vawi takhra nai khumi leaung 18,000 Isakhar theaung lu sa nai leaung 200 reichi hawi, nichi nithun abang naichi (hini luchi ly Israelachi sa ai avo nai kalopchi sa ai nai neng kani pany nai khumichi ne) Ka-ym awm nai Zebulon theaung khumi leaung 50,000, nichi ly atiu ai nai angveirym iy, tavai ateaung kangym teaung kawp naichi ne. Khupui, tivi teaung kawp nai khumi leaung 37,000 reichi hawi vanrei, Naphtali theaung lu sa nai leaung 1,000 Tavai leaungsai acham yb nai Dan theaung khumi leaung 28,600 Tavai thau ai nai angveirym yb nai Asha theaung khumi leaung 40,000 Jordan tavo nisi mang i Ruben, Kad hawi nisi manase theaungchi theung i tavai ateaung kangym teaung kawp nai khumi leaung 120,000.

1 NENG SATANG 12:38

Tavai thau ai nai aeng yb nai sorai risa bawibawichi ly Davida ai Israela pri verei y peang nai samrang y palyn ai nai leu pacheang yb nai, Hebron mary mang y chei u bo. Huni bo i Israela mipui bawibawichi py, huna nai kamta paleung ka-dawn awm u nai ne.

1 NENG SATANG 12:39

Nichi ly mymychi i khumichi my sa pi rym nai teicha teineichi cha iy, Davida hawi vanrei kani thomrei awm u bo.

1 NENG SATANG 27:1

Hini ly samrang i kalop sa pi nai Israela cheng yhm dengtheung luchi, nupai luchi hawi pri peang nai miteaung kehchi i charangchi ne. Nichi ly khumi leaung 24,000 rei awm nai kamkawmchi phy iy, lorei y kamkawm harei kalop sa u bo. Huni kamkawm hahareichi ai, tavailu areng leaungrei my peang nai ne.

1 NENG SATANG 28:1

Davida ly Israela cheng miteaung keh bawibawichi ai, Jerusalem mary y angym hai bo. Hunaibaly cheng theaungchi i miteaung keh bawibawichi hawi pri peang nai miteaung keh bawibawichi ai py, Nupai luchi, samrang hawi chapochi i vawnsaichi, keaungngo kano kasau, sichi napi nai tawnbawichi ai kry nai khumichi py angym u bo. Angchi khyp thui ai na baly samrang yhm miteaung kehchi, amyn amthang nai tavai luchi hawi aly len nai khumi ngiereichi ly Jerusalem mary y angym u nai ne.

1 SAMUELA 16:1

Areng my Samuela teng y, “Nang ly Sawla i vui y mana tanrei paleung si hai jo ai mo? Kaimy ni ai ly Israela samrang i nai kapala vui bo; na i py Olive asitui syn iy, Bethlehem mary y awm nai Jesai napi nai khumi leaungrei teng y chei; kai ly ni i chapo leaungrei ai, samrang lawm ai nai vawi takhra yb veng bo,” napi.