Mishiraachechinaꞌo 28:31 - Kafa Linguistics Project

³¹ Koniyoona biin bayaanoon Yeerichi taatittineechon gettiibee, aafoon kuppheꞌi Doono Yesuus Kiristoosichon dojjii beehe.

Mishiraachechinaꞌo 28:31 ပူးပေါင်းရင်းမြစ်များ

Maatiyoosi 4:23

Ebiyee gubb, Yesuusi Ayihudeenaꞌo kiceebeeti kexoochaa dojjiibee, Yeerichi taatittinee mishiraachee qaaroon gettiibee, biiyo bulliichee asheenaꞌon wodiibee, Galiilee showoo bullina guuddii beehe.

Maariqoosi 1:14

Yowannisi yeshaa cucheetoyee gubb, Yesuusi Yeerichi mishiraachee qaaroon gettiibee, “Yemeeno katinnitone; Yeerichi taatittine ittoshi kellooch shaggetine; ebich ittoshi axaaxee gommoochee Yeer waan wotteree, Yeerichi wocho tuneti mishiraachee qaaroon iberiibote” iibee Galiilee showooch waahe.

Luqaasi 8:1

Aroyee gubb Yesuusi Yeerichi taatittinee mishiraachoon gettiibee, awaajjiibeenoo, katemoonaa gafoo bullinooch guuddii beehe; aaraa gutte bi dabbeenaꞌo biinna tookkii guuddii beeheete.

Mishiraachechinaꞌo 1:3

Yesuusi wodde xuuxoona bi qititoyee gubb, mishiraachechinaꞌoyich xalla bekkeebee kashecho bi tunoon wodde gommona manjiihe. Aabbe qemon bekkeꞌi, Yeerichi taatittineechon boonoshich dojjii beehe.

Mishiraachechinaꞌo 20:25

“Ta ittoshi bulli daggooch guuddaabee, Yeerichi taatittineechon dojjito taane; ebiyee gubb illa ta aafoon beegaachemmo ittoshi tunoon ariibeeto taane.

Mishiraachechinaꞌo 23:11

Bi decharoobee xum Doono Yesuusi Phawuloosi gaꞌooch neexeꞌi, “Yerusaalem ta miixoo ne tunetoommon, ebiyoommon Roomaa wotta taach ne miixemmoyich qaawiihe; ebich kupphebe” iye.

Mishiraachechinaꞌo 28:23

Boonoshiyoo bare aaboon taajjeꞌi, are taajjee aabooba meetinaꞌo tuneꞌi Phawuloosi beeti kexooch waaheete. Biyoo maaddoochee tiijjiꞌi xum beddaahaa, Yeerichi taatittineechon miixoona bi gaboon bekkiihe; Muusichi Sheeroonaa keemechinaꞌochi macaafoonoochee galliibee, Yesuusichon gettiibee, boonoshi mullooch gedda qiiccehe.

Mishiraachechinaꞌo 28:30

Phawuloosi bi kiraayiti kexooch gutte naton kotehe; bi waan waa beetinaꞌo bullin iibbii beehe.

Mishiraachechinaꞌo 4:29

Andoo Doonocho, boonoshi miichoon ciine; aafoon kuppheree ne qaaroon no gettemmoyich, ne guuno noon kupphiibe.

Mishiraachechinaꞌo 4:31

Boonoshi corootitoyee gubb, boonoshi kiceeti xaaꞌoo shuuriye. Bulliyoo Yaafe Ayaanoona ceenniyeete; aroochee Yeerichi qaaroon aafoon kuppheꞌi gettiyeete.

Mishiraachechinaꞌo 5:42

Ebiyee gubb, qemi qemona yaafee kexonaa kexi kexonooch guuddiꞌi, “Yesuusi aroo Kiristoosine” iibee mishiraachee qaaroon asheenaꞌoyich dojjoonaa yibbaatoonon kuxaanoon beeheete.

Mishiraachechinaꞌo 8:12

Tunebaani Filipphoosi Yeerichi taatittineechonaa Yesuus Kiristoosichi shigeechonon boonoshich mishiraachee qaaroon bi getaa waayeꞌi, boonoshi mulloon Yesuusi toommooch tooꞌiiti maacheenaꞌonaa anaaminaꞌona aacona afaalleeheete.

Filipphisiyoosi 1:14

Kittinnoo tuneti maneenaꞌo daggoochee meetinaꞌo ta cucheyee naboona beshoon Doono Yeerin gibenetinaꞌone; shataanoonoo Yeerichi qaaroon getoyich aafichoyee beshoon aafoon kupphee beetinaꞌone.

2 Ximootiyoosi 2:9

Hini mishiraachee qaaroon ashich ta gettetoyich gondoon shuunetochoommon ta cuchemmi wottoon xuuxoon beeggaabeeto taane; tunebaani Yeerichi qaaro cucheyaachemmone.

2 Ximootiyoosi 4:17

Tunebaani mishiraachee qaaroon bechee shuunoo taanna bi ceennemmonaa Aageteenaꞌo bulli waayemmonoyich, Doono Yesuusi ta gaꞌooch neexeꞌi taan kupphiihe; daaheree gammoocheenoo taan wodiihe.