Mishiraachechinaꞌo 1:8 - Kafa Linguistics Project

⁸ Tunebaani Yaafe Ayaano ittoshi toommooch bi kindiyooba, giidoon danemmo ittoshine. Arooba Yerusaalem, Yihudee showoo bulliich, Shamaaree showooch, showee tuggo bulliichoo ta mooyon miixemmo ittoshine” iye.

Mishiraachechinaꞌo 1:8 ပူးပေါင်းရင်းမြစ်များ

Shoddo 22:27

Showee tuggooch beddaahaa beeti asheenaꞌo bulli Doono Yeerin gabemminaꞌone; bi waanoo wottemminaꞌone; aageteenaꞌochi shiijjereenaꞌo bulli bi aafooch goyinnemminaꞌone.

Shoddo 98:3

Israꞌeeleenaꞌoyich bi gibenikkiti, bi shoodoonaa gibeneyoonon shalligitone; showee tuggooch beddaahaa beeti asho bulli, Yeerichi wudoon beeggitone.

Isiyaasi 42:10

Doono Yeerich andire shoddoon shoddebote; bi galletoon showee toommo bulliichaa shoddebote. Baharee toommona shaꞌee beetinaꞌo bulli, baharee daggooch beeti halleenaꞌo bulli, galletebote. Baharee gashooch, buure showoonaa arooch beetinaꞌonote, shoddebote.

Isiyaasi 52:10

Doono Yeeri yaafe bi mochoon, aageteenaꞌo bullich bekkiyemmone; showee tuggeenaꞌo no Nuggishoochi wodiyoon beeggemminaꞌone.

Isiyaasi 66:19

boonoshi daggooch malletoon geddemmo taane; boonoshi daggoochee muriccitinaꞌon, ta mooyon waayeyaani, ta oogoon beegaani, aageteenaꞌo waan, Tarishesh, Fuux, shangoon awureebeeti Luudi asheenaꞌo waan, Tubaal, Yawaan, wohooch beeti buure showoochoo daachiyemmo taane; boonoshiyoo aageteenaꞌo daggooch ta oogoon awaajjemminaꞌone.

Erimiyaasi 16:19

Ta hakkoo, ta giidoo, iritee aabooboo ta deebo tuneti Doono Yeero, showee tuggoochee aageteenaꞌo ne waan waaree, “No qaabbechinaꞌo kootoon, duube mooyon, boonoshich gaacaani mooyon woraashitinaꞌone” gettemminaꞌone.

Mikiyaasi 3:8

Tunebaani ta, Israꞌeeleenaꞌoyich boonoshi xuꞌoonaa axaaxoonon ta gettemmoyich, Doono Yeeri bi Ayaanoon, giidoon, dayinnetoonaa hakkoonon taach immitone.

Zakaariyaasi 4:6

Aroochee taach ishichiye: “Zerubabeelich getteeti Doono Yeerichi qaaro ebine: ‘Zerubabeelo, ebin ne tuniyemmo ta Ayaanoonalli hakkoona woyee giidoona toonoone’ iye Beshe Mawe Doono Yeeri.

Maatiyoosi 24:14

Ashi yaroo bullich miixoo bi tunemmoyich hini Yeerichi taatittinee mishiraachee qaaro showee toommo bulliich getteyemmone; arooba yemeenee ciiro woyemmone” iye.

Maatiyoosi 28:19

Illa tiyiree hambote; aageteenaꞌo bulliich beetinaꞌon Nihoo Yeeri, Bushoo Yeerinaa Yaafe Ayaanoonochi shigoona aacona afaalloonaa tuniibote iyaꞌa ittoshich ta getteto bullin boonoshich dojjoona ta dabbeenaꞌon tuniibote. Illa yemeenee ciirooch beddaahaa bulli aaboon ta ittoshina tookkaa beeto taane” iye.

Maariqoosi 16:15

Daakkiꞌi ishichiye: “Showee toommo bulliich hambote; ta mishiraachoon halleeto bullich getote.

Luqaasi 1:35

Wotta hini are maraakoo wochiꞌi ishichiye: “Yaafe Ayaano ne toommooch woyemmone; Beshoo Yeerichi giidoo ne toommooch yiiremmone; ebich wotta ne shiyemmi bushoo yaafoo getteyemmone; ‘Yeerichi Bushoo’ getteyemmone.

Luqaasi 10:19

Dingeroonaa barahee machoonon baatoona ittoshi neexxemmoyich, ittoshin shixxiibeeti Sheexaanee giidoo bullin yittiiree ittoshi hajjemmoyich, ukkirittinoon ittoshich immeto taane. Ittoshich etto tunemmi mooyo amolla aalloone.

Luqaasi 24:29

“Noonna tookkiree qebe; showoo beshee, xumetone” iꞌi manjii ataalliyeete. Ebich boonoshina tookkii qeya giyiye.

Yowannisi 15:27

Ittoshiyoo wotta shiichiꞌi taanna tookkii ittoshi beetoyich, taachon miixemmo ittoshine” iye.

Mishiraachechinaꞌo 1:5

Yowannisi asheenaꞌon aacona afaallitone; tunebaani and giisheche aaboyee gubb Yaafe Ayaanoona afaalleyemmo ittoshine” iꞌi gettiye.

Mishiraachechinaꞌo 13:31

Biinna tookkii Galiilee showoochee Yerusaalem waatinaꞌoyich wodde areddoon bekkehe. Boonoshiyoo and Israꞌeeleenaꞌoyich bi miixeenaꞌone.

Mishiraachechinaꞌo 2:32

Illa hini Yesuusin Yeeri qitoochee tiijjitone; no bulli ebi mooyoyich miixoo noone.

Mishiraachechinaꞌo 22:15

Ebin bi tuniito, ne beeggetonaa ne waayetonoyich asho bulli aafooch bi miixoo ne tunemmoyichiye.

Mishiraachechinaꞌo 3:15

Kashee Shimboon wuxiihote. Tunetaa biin Yeeri qitoochee tiijjiye. Hini mooyoyich no miixoo noone.

Mishiraachechinaꞌo 4:33

Mishiraachechinaꞌo “Doono Yesuus Kiristoosi qitoochee tiyitone” iꞌi ooge giidoona miixee beeheete; boonoshi bulli toommooch oogeti wojjoo beehe.

Mishiraachechinaꞌo 5:32

Ebi mooyinaꞌoyich no miixoo noone; wotta Yeerich deꞌa ii beetinaꞌoyich bi immiti Yaafe Ayaanoo miixoone” iyeete.

Mishiraachechinaꞌo 6:8

Isxifanoosi Yeeri biich wojjoonaa giidoonon imaa asheenaꞌo daggooch giidechi gaakkechi shuunoonaa worganikkiti malletoonon tunii beehe.

Mishiraachechinaꞌo 8:1

Arooba Sawuli “Asheenaꞌo Isxifanoosin boonoshi wuxoo tatoone” itone. Ebi arooba Yerusaalem beeti Yesuusichi asheenaꞌo toommooch oogeti duꞌo waahe. Mishiraachechinaꞌoyee damba Yesuusichi asheenaꞌo bulli Yihudee showoonaa Shamaaree showoonooch shaceheete.

Roomi 10:18

Tunebaani “Wochoon waayeyaaneenaꞌone?” iyo. Waayetinaꞌone. Yaafe Macaafooch bi kooreetoommon, “Wocheyechinaꞌochi qaaro, alemo bullich waayeehe; boonoshi gettiti qaaro, showee tuggooch beddaahaa shaggiye.”

Qolaasiyaasi 1:23

Ebi bi tunemmo, Kiristoosi toommooch mullee tooꞌiyoona manjiꞌi ittoshi waayeti mishiraachee qaaree gibenoochee shokaanoon ittoshi beegaatane. Are mishiraachoo shimaayoyee desh beeti halleetinaꞌo bullich getteetone; ta Phawuloosiyoo ebi mishiraachee qaaree maddechon tunehoye.