Maariqoosi 13:11 - Kafa Linguistics Project

¹¹ Wotta asheenaꞌo ittoshin beshii imiyooba, ‘Ama gettehone?’ getiree shiichi iriteyaahote. Tunebaani areegaata Yeeri ittoshich immimmi mooyon getote. Gettemmo Yaafe Ayaanoani ittoshi toonoone.

Maariqoosi 13:11 ပူးပေါင်းရင်းမြစ်များ

2 Saameeli 23:2

“Doono Yeerichi Ayaano ta gettemmon taach gettiye; bi qaaro ta noonooch tunehe.

Isiyaasi 50:4

Taahitinaꞌon, qaaroona kupphiyoon ta ariyemmoyich, Nuggishoo Doono Yeeri ariyechi heciyoon taach immitone. Maaddoona taan tokketoochee tiijjiye; doyechochoommon ta ellemmoyich ta waamon qechiye.

Maatiyoosi 10:17

Tunebaani nallechinaꞌoyich ittoshin beshiiree immemminaꞌone; Ayihudeenaꞌo kiceebeeti kexoochaa arengoona xooppemmo ittoshine; ebich ashi waanee ittoshi qelloon quyebote!

Maariqoosi 13:12

“Arooba manoo bi manoon, nihoo bi bushoon wuxemmi asheenaꞌoyich beshiiree immemmone; wotta bushiisheenaꞌo boonoshi niheenaꞌonaa boonoshi indeenaꞌonochi toommooch tiyiree wuxiyemminaꞌone.

Maariqoosi 13:9

“Illa ittoshi qelloon quyebote; nallechinaꞌoyich ittoshin beshiiree immemminaꞌone; Ayihudeenaꞌo kiceebeeti kexoochaa arengoona xooppemmo ittoshine; ta miixoo ittoshi tunemmoyich ta naboyich iraasheenaꞌonaa taateenaꞌonochi aafooch neexemmo ittoshine.

Luqaasi 21:12

“Tunebaani ebi bulliyee shiichiree, ta naboyich ittoshin yechemminaꞌone; duuꞌiyemminaꞌone; Ayihudeenaꞌo kiceebeeti kechi nallechinaꞌoyich ittoshin beshiiree immemminaꞌone; boonoshiyoo ittoshin cuchiyemminaꞌone; taateenaꞌonaa iraasheenaꞌonochi aafoochoo ittoshin neechemminaꞌone.

Yowannisi 3:27

Yowannisi ishichiꞌi wochiye: “Asho koniyoona Yeeri daaggaanoon amoonolla tuniyoon hakkaache.

Mishiraachechinaꞌo 2:4

Boonoshi bulli Yaafe Ayaanoona ceenniyeete; bekkech Yaafe Ayaano boonoshich hakkoon imaa boonoshi ariyaani noonoona yibbaateheete.

Mishiraachechinaꞌo 3:13

Abrahami, Yisaaqinaa Yaaqobinochi Nuggishoo, biyoo no qaabbechinaꞌochi Nuggishoo, bi Bushoo Yesuusin oogiihe. Tunebaani ittoshi bi qitemmoyich beshiiꞌi immiyote. Phelaaxoosi biicha bi gabaa, bi aafoochaa nookkehote.

Mishiraachechinaꞌo 4:31

Boonoshi corootitoyee gubb, boonoshi kiceeti xaaꞌoo shuuriye. Bulliyoo Yaafe Ayaanoona ceenniyeete; aroochee Yeerichi qaaroon aafoon kuppheꞌi gettiyeete.

Mishiraachechinaꞌo 6:10

Tunetaa bi gettiibeeti ariyoonaa Ayaanoonon habbiyoon hakkaaneenaꞌone.

Mishiraachechinaꞌo 6:15

Areegaata nalloyich koteti Ayihudeenaꞌo bulli Isxifanoosin manjii boonoshi ciinnimmona, bi aafo maraakee aafoon shaahiye.

Mishiraachechinaꞌo 7:55

Tunebaani Isxifanoosi Yaafe Ayaanoona ceenniꞌi shimaayooch manjii ciinniꞌi, Yeerichi oogee yiiroonaa Yesuusi Yeerichi qanne badd neexeꞌi bi beemonon beeggiye.

1 Qorontoosi 2:13

Wotta hini wojjeechonoo gettaabeeto noone. Yaafe Ayaano boonoshi toommooch beeti asheenaꞌoyich, Yeerichi Ayaanee mooyon xiishiibee no gettaabeeto, hini showeexi ashi shalligoo arichiibeeti yibbaatoona tuneyaanoon, Yaafe Ayaano nooch bi arichiibeeti yibbaatoonane.

Efesooni 3:5

Ebiyoo wonnee yemeenooch bare shiijjereenaꞌo waan ashi bushiishoyich aricheyaanoone; tunebaani and yaafeeti bi mishiraachechinaꞌonaa keemechinaꞌonoyich bi Ayaanoona gaxxitone.

Yaaqobi 1:5

Ittoshi daggoochee koniyoona shalligoo biich shappi gaata, qoonaanoon mulloochee tiijjiꞌi bullich immiibeeti Yeerin qollebe; biichoo ichemmone.

1 Pheexiroosi 1:12

Are keemechinaꞌo boonoshi gettiti wochoona boonoshi maddeto, ittoshichalli, boonoshich tunee qayo boonoshich bekkehe; wotta shimaayoochee wochetaa waati Yaafe Ayaanee giidoona mishiraachee qaaroon ittoshich miixeti asheenaꞌo and are wochoon ittoshich gettitinaꞌone. Maraakeenaꞌolla ebi mooyon maqqiꞌi ariyoyich qaatii beetinaꞌone.