Ӧксыяслӧн 3 небӧг 2:35 - Коми Библия 2023

³⁵ Йоав пыдди тышкайӧзӧн веськӧдлыны Соломон пуктіс Бенайӧс, [ачыс Соломон сэки ӧксыаліс Ерусалимын,] а Авиатар поп пыдди ӧксы пуктіс [аркирейӧ] Садокӧс. [Господь сетіс Соломонлы ыджыд мывкыдлун, сюсь вежӧр да уна тӧдӧмлун, сылӧн тӧдӧмлуныс вӧлі саридздор лыа мында. Соломонлӧн мывкыдлуныс вӧлі ёна ыджыдджык важ олысьяслӧн да Египетын олысь мывкыда йӧзлӧн дорысь. Соломон босьтіс гӧтырӧ фараонлысь нывсӧ да вайӧдіс сійӧс Давид карӧ. Сэні гӧтырыс оліс, кытчӧдз Соломон эз лэпты аслыс керка. Но медводз сійӧ лэптіс Господьлы крам да Ерусалим гӧгӧр стен. Соломон вӧчис крамсӧ сизим во чӧж. Соломонлӧн вӧлі сизимдас сюрс морт, кодъяс кыскалісны-ваялісны изъяс, и кӧкъямысдас сюрс морт, кодъяс кералісны-перйисны изсӧ изкыртаысь. Соломон вӧчӧдіс вайӧртӧд да сы улын сулалысь пыкӧдъяс, вӧчӧдіс ыджыд мыссян дозъяс да сюръяяс, крам йӧрас вӧчӧдіс ва петанін да ыргӧнысь вайӧртӧд. Соломон вӧчӧдіс изкар да сы гӧгӧр стен, юкис Давид карсӧ кык пельӧ. Фараонлӧн нылыс вуджис Давид карысь аслас керкаӧ, кодӧс Соломон лэптіс сылы. Кар гӧгӧрыс Соломон кыпӧдіс стен. Куимысь вонас Соломон вайліс сотан да бурасян висьяс висьпуктанін вылын, кодӧс сійӧ лэптіс Господьлы, и сэні Господь водзын тшынӧдчис. Соломон помаліс керка лэптӧмсӧ. Сылӧн вӧлі куим сюрс квайтсё морт, кодъяс видзӧдісны уджалысьяс бӧрся. Господьлысь крамсӧ лэптӧм бӧрын да Ерусалим кар гӧгӧр стен кыпӧдӧм бӧрын Соломон нӧшта кыпӧдіс Ассур, Магдон, Гезер, Вылыс Бет-Хорон да Баалат каръяс. Ловъя дырйиыс на Давид шуліс Соломонлы: «Тэ тӧдан Бахуримысь Венямин чужанкотырысь Герлысь Шимей писӧ. Сійӧ быд ногыс лёкӧдіс менӧ, кор ме вӧлі муна Маханаимӧ. Но кор ме бӧр локті, сійӧ меным воча петіс Йӧрдан ю дорын, и сэки ме Господь водзын кыв сеті сылы, мый ог ви сійӧс. А тэ эн коль сійӧс мыждытӧг. Тэ мывкыд морт, и ачыд тӧдан, мый сыкӧд вӧчны, медым пӧрысь кадас сійӧ вуджас кулӧмаяс дінӧ сылысь вирсӧ кисьтӧм бӧрын».]

Ӧксыяслӧн 3 небӧг 2:35 ပူးပေါင်းရင်းမြစ်များ

Ӧксыяслӧн 3 небӧг 1:26

А менӧ, тэнсьыд кесйӧгтӧ, Садок попӧс, Иодайлысь Бенай писӧ да тэнсьыд Соломон питӧ, коді кесъялӧ тэныд, сійӧ эз кор.

Ӧксыяслӧн 3 небӧг 1:33

ӧксы шуис налы: «Босьтӧй аскӧдныд менсьым кесйӧгъясӧс, а Соломон пиӧс пуксьӧдӧй менам мул вылӧ да нуӧдӧй сійӧс Гихон ва петанін дорӧ.

Ӧксыяслӧн 3 небӧг 1:38

Садок поп, Нафан пророк, Иодайлӧн Бенай пиыс и ӧксыӧс видзысь керетсаяс да пелетсаяс мунісны, пуксьӧдісны Соломонӧс Давид ӧксылӧн мул вылӧ да нуӧдісны Гихон ва петанін дорӧ.

Ӧксыяслӧн 3 небӧг 2:27

Соломон вештіс Авиатарӧс Господь водзын попӧн кесъялӧмысь. Тадзи иніс Илийлӧн рӧд йылысь Силомын Господьлӧн шуӧмыс.

Ӧксыяслӧн 3 небӧг 4:4

Иодайлӧн Бенай пиыс веськӧдліс тышкайӧзӧн. Садок да Авиатар вӧліны попъясӧн.

1 Каднебӧг 15:11

Давид корис ас дінас Садок да Авиатар попъясӧс, Уриэл, Асай, Йоиль, Шемай, Элиэл да Аминадав левитъясӧс.

1 Каднебӧг 24:3

Элазар рӧдысь Садоккӧд да Итамар рӧдысь Ахимелеккӧд ӧтвылысь Давид юкліс попъясӧс котыръяс вылӧ, медым найӧ кесъялісны сьӧрсьӧн-бӧрсьӧн.

1 Каднебӧг 27:5

Коймӧд тӧлысьнас кесъялысь тышкакотырӧн веськӧдліс Бенай, Иодай аркирейлӧн пиыс. Сылӧн тышкакотырын вӧлі кызь нёль сюрс морт.

1 Каднебӧг 29:22

Сійӧ лунӧ найӧ ёна нимкодясьӧмӧн сёйисны-юисны Господь водзын. Давидлысь Соломон писӧ выльпӧв пуктісны ӧксыӧ да мавтыштӧмӧн сиисны Господьлы, а Садокӧс мавтыштӧмӧн пуктісны аркирейӧ.

Ездра 7:2

Хилки – Шаллумлӧн, Шаллум – Садоклӧн, Садок – Ахитувлӧн,

Иов 34:24

Юасьтӧг Сійӧ пасьвартӧ вынаясӧс, на пыдди пуктӧ мӧдъясӧс.

Езекиль 40:46

Войвылӧ видзӧдысь керкаыс – висьпуктанін дорын кесъялысь попъяслы, Садок рӧдысь петысьяслы. Левий чужанкотырысь сӧмын найӧ вермӧны матыстчыны Господь дінӧ, медым кесъявны Сылы».

Езекиль 43:19

сет ӧшкӧс Левий чужанкотырысь Садок рӧдысь попъяслы, кодъяслы лэдзӧма матыстчыны Ме дінӧ Меным кесъялӧм могысь, – висьталӧ Господь Ыджыдыс. – Найӧ мед начкасны ӧшкӧс мыжысь вись пыдди.

Ап. уджъяс 1:20

Псалом небӧгын гижӧма: ”Сылӧн оланіныс мед кушмас, сэні мед оз ло олысьыс”. Нӧшта гижӧма: ”Сылысь кесъялӧмсӧ мед босьтас мӧд”.

Ӧксыяслӧн 1 небӧг 2:35

Аслым Ме сувтӧда попӧс, коді кутас кывзысьны Менсьым да збыльмӧдны Менсьым кӧсйӧмӧс. Сылысь рӧдсӧ вӧча зумыдӧн. Став олӧм чӧжыс сійӧ кутас кесъявны Менам мавтыштӧма водзын.