Езекиль 17:23 - Коми Библия 2023

²³ Израильса джуджыд керӧс вылын сійӧ пашкыртчас-быдмас, сетас коль, лоас ыджыдсьыс-ыджыд сус пуӧн. Сылӧн увъяс вылас поздысясны лэбачьяс, вожъяслӧн вуджӧр улӧ вӧчасны аслыныс оланін.

Езекиль 17:23 ပူးပေါင်းရင်းမြစ်များ

Олӧм 49:10

Иуда киын пыр лоӧ юралан беддьыс, сылӧн кок бердын – ыджыдалан беддьыс, кытчӧдз оз лок Бурӧдысь, кодлысь кывзысьӧны войтыръяс.

Псалтыр 80:8

Сьӧкыдалігад тэ шыасин Ме дінӧ, и Ме мезді тэнӧ. Гым пытшсянь Ме вочавидзи тэныд, Мерива ва дорын тӧдмалі тэнӧ.

Сьылан 5:15

Сылӧн кокыс мрамор сюръя кодь, зарни подув вылӧ сувтӧдӧма. Сылӧн мыгӧрыс Ливан керӧс кодь, ыджыд сус пу кодь.

Исай 2:2

Тадзи лоӧ бӧръя кадӧ: сійӧ керӧсыс, кӧні сулалӧ Господьлӧн крамыс, лоӧ став керӧссьыс на джуджыдджык, став мыльксьыс на вылынджык. Сэтчӧ дугдывтӧг кутасны локны войтыръяс.

Исай 27:6

Локтана кадӧ Яков вужъясяс, Израиль сетас вож да кутас дзоридзавны. Муюгыдыс тырас вотӧсӧн.

Исай 49:18

Лэпты синтӧ да гӧгӧр видзӧдлы: тэнад пияныд ставныс чукӧртчӧны, локтӧны тэ дінӧ. Ме кыв сетӧмӧн кӧсйыся Аслам олӧмӧн, – висьталӧ Господь, – кыдзи гӧтырпулӧн мичмӧдчанторйыс зарни-эзысь, тадзи пияныд лоӧны тэнад мичмӧдчанторйӧн.

Еремей 31:12

Найӧ локтасны, кутасны долыда сьывны Сион керӧс вылын, кутасны нимкодясьны, ӧд Господь сетіс налы бур козинъяс: шобді, вина да вый, ыжъясӧс да ӧшъясӧс. Налӧн олӧмыс лоас ваӧн киськалӧм сад кодь, найӧ оз нин вынтӧммыны.

Езекиль 20:40

Ӧд Менам вежа керӧс вылын, израильса джуджыд керӧс вылын, ті ставныд, кодъяс оланныд асланыд муын, кутанныд кесъявны Меным, – висьталӧ Господь Ыджыдыс. – Сэні Ме сибӧда тіянӧс, Израиль войтыр. Ме виччыся, мый ті ваянныд сэтчӧ козинъяснытӧ, мувыв быдтассьыныд медводдза босьтӧмторъяснытӧ да вежа сетӧмторъяснытӧ.

Езекиль 31:6

Вожъясас поздысьлісны енэжвывса лэбачьяс, пу улас пиянасьлісны вӧрса пемӧсъяс, вуджӧр улас олісны вына войтыръяс.

Езекиль 36:8

А тіян вылын, Израиль керӧсъяс, пашкыртчасны-быдмасны пуяс да ваясны вотӧс Менам Израиль войтырлы, ӧд найӧ регыд бӧр локтасны.

Езекиль 40:2

Израиль муӧ да сувтӧдіс зэв джуджыд керӧс вылӧ. Тайӧ вӧлі Енсянь петкӧдлӧм. Керӧс лунвывладорас сулалісны карлӧн кодь керкаяс.

Даниил 4:8

пуыс вӧлі ыджыд да ён, йывнас сійӧ инмис енэжӧдзыс, тыдаліс му помӧдзыс.

Даниил 4:9

Сылӧн коръясыс вӧліны мичаӧсь, сы вылын вотӧсыс вӧлі уна, и сысянь пӧткӧдчисны ставныс. Сылӧн вуджӧр улӧ сайӧдчывлісны пемӧсъяс, сылӧн вожъяс вылын поздысьлісны енэжвывса лэбачьяс, и сысянь пӧткӧдчис быд ловъя олысь.

Осий 14:7

и паськалас гӧгӧр. Сійӧ лоӧ олив пу кодь мича, ливанса вӧр моз пондас ӧвтны чӧскыд дукӧн.

Осий 14:8

Израиль войтыр бара овмӧдчас олив пуяслӧн вуджӧр улӧ, найӧ пондасны быдтыны нянь, кутасны дзоридзавны виноград моз, нимавны ливанса вина моз.

Микей 4:1

Тадзи лоӧ бӧръя кадӧ: сійӧ керӧсыс, кӧні сулалӧ Господьлӧн крамыс, лоӧ став керӧссьыс на джуджыдджык, став мыльксьыс на вылынджык. Сэтчӧ дугдывтӧг кутасны локны войтыръяс.

Матвей 13:32

Став кӧйдыссьыс сійӧ медпосни. Сійӧ быдмӧ да лоӧ пу кодь, став пуктассьыс ыджыд, весиг енэжвыв лэбачьяс поздысьӧны вожъясас».

Марк 4:32

Кӧдзӧм бӧрас быдмӧ да став пуктассьыс ыджыд лоӧ, весиг енэжвыв лэбачьяс вермӧны поздысьны гырысь вожъясыслӧн вуджӧр улӧ».

Лука 13:19

Енлӧн Юралӧмыс муӧ кӧдзӧм горчица тусь кодь. Сійӧ быдмӧ да лоӧ пу кодь ыджыд, весиг енэжвыв лэбачьяс поздысьӧны вожъясас».

Иоан 12:24

Веськыда, веськыда висьтала тіянлы: шобді тусь кӧ муӧ усьӧм бӧрас оз кув, сэки ӧтка тусьӧн кольӧ. Кулас кӧ, уна тусь ваяс.

Галатӧ 3:28

Иудей-ӧ тэ либӧ грек, кесйӧг-ӧ либӧ мездлуна морт, айлов-ӧ либӧ ань – Исус Кристос пытшкын торъялӧмыс абу.

Колосӧ 3:11

Грек-ӧ тэ либӧ иудей, вундыштчӧмыд-ӧ либӧ абу вундыштчӧмыд, варвар-ӧ либӧ скиф, кесйӧг-ӧ либӧ мездлуна морт – торъялӧмыс абу. Ставыс да ставас Кристос.

Восьтӧм 11:15

Кор сизимӧд анделыс тутсіс трубаӧ, енэжас кылісны гора шыяс. Найӧ шуалісны: – Став муюгыдыс лои миян Господьлӧн да Сылӧн Мавтыштӧмалӧн юраланінӧн. Сійӧ кутас юравны нэмъяс чӧж!