Эсфир 8:14 - Коми Библия 2023

¹⁴ Ӧксылӧн тэрыб вӧвъяс вылын верзьӧмаяс дзик пыр тӧвзисны юӧртны ӧксылысь тшӧктӧмсӧ. Юӧртісны тшӧтш Суза изкарын.

Эсфир 8:14 ပူးပေါင်းရင်းမြစ်များ

Ӧксыяслӧн 3 небӧг 4:28

Ӧксылӧн ветліг-мунігъясӧ найӧ быдӧн могмӧдлісны ӧксылысь доддялӧм да верзьӧма вӧвъяссӧ урчитӧм мында идӧн да идзасӧн.

2 Каднебӧг 30:6

Юӧр нуысьяс мӧдӧдчисны ӧксылӧн да юралысьяслӧн гижӧднас да ӧксылӧн тшӧктӧм серти юӧртісны став Израиль да Иуда му пасьтала: «Израиль войтыр, бергӧдчӧй Господь дінӧ, Ӧвраамлӧн, Исааклӧн да Израильлӧн Ен дінӧ, сэки Сійӧ бергӧдчас тіян дінӧ, кодъяс мынінныд ассурса ӧксыяслӧн киысь да ловйӧн колинныд.

Неемий 1:1

Неемийлӧн, Хакалий пилӧн, висьталӧм. Кызьӧд вонас кислев тӧлысьӧ ме вӧлі Суза изкарын.

Эсфир 1:2

Сійӧ кадас Артаксеркс ӧксылӧн юралан пуклӧсыс вӧлі Суза изкарын.

Эсфир 2:3

Ӧксы мед индас став аслас ӧксыув муясын йӧзӧс, кодъяс чукӧртасны том мича нывъясӧс Суза изкарӧ. Найӧс мед овмӧдасны аньяслӧн керкаӧ аньясӧс видзысь Гегайлӧн, ӧксы евнуклӧн, тӧждысьӧм-видзӧдӧм улӧ. Нывъяслы мед сетасны чӧскыд дука мавтасъяс [да мукӧд коланаторсӧ].

Эсфир 3:13

Вӧлі мӧдӧдӧма йӧзӧс, кодъяс нуисны гижӧдсӧ ӧксыув муясӧ, медым ӧти лунӧн – дас кыкӧд адар тӧлысьлӧн дас коймӧд лунӧ – вины-бырӧдны став иудейсӧ, томӧс и пӧрысьӧс, челядьӧс и аньясӧс, а налысь эмбурсӧ мырддявны. [Гижӧдас вӧлі пасйӧма: «Индиясянь Эфиопияӧдз сё кызь сизим муын юралысьяслы да налӧн киподувса веськӧдлысьяслы гижӧ Артаксеркс ыджыд ӧксы. Ме ыджыдала войтыръяс вылын, юрала став муюгыднас. Но вылӧ кыпӧдчытӧг, рам да лӧнь сьӧлӧмӧн веськӧдлігӧн ме кӧсъя, медым менам муын олысьяс олісны зыксьытӧг. Ме зіля видзны став аслам муын лӧньлун, медым сэті позис ветлыны повтӧг, и ставныс вермисны лӧня овны ӧта-мӧдныскӧд. Ме юалі туйдӧдысьяслысь, кыдзи тайӧс пӧртны олӧмӧ. Сэки миян пӧвстын аслас сюсьлунӧн торъялысь да эскана морт, Аман, ӧксы бӧрся медыджыдыс, коді тӧждысьӧ бурсӧ вӧчны мунымлы, гӧгӧрвоӧдіс миянлы, мый став му пасьтала мукӧд войтыръяс пӧвстын олӧ ӧти зыксьысь войтыр. Аслас индӧдъясӧн тайӧ войтырыс сувтӧ мукӧд войтыръяслы паныд, ӧтдортӧ ӧксылысь тшӧктӧмъяссӧ, медым торкны миянлысь юралӧмнымӧс. Ми тӧдмалім, мый збыльысь сӧмын тайӧ войтырыс век зыксьӧ мукӧд йӧзкӧд, аслас оласногӧн торкӧ индӧднымӧс да миян юралӧмлы паныд кыпӧдчӧмнас вӧчӧ ыджыд лёкторъяс, медым миян муын дзугны йӧзыслысь бур олӧмсӧ. Та вӧсна тшӧктам бырӧдны пыдди пуктана Аман юралысьлӧн гижӧдын индӧм йӧзӧс, тшӧктам жалиттӧг шыпуртӧн вины найӧс ставнысӧ, тшӧтш гӧтыръяснысӧ да челядьнысӧ. Вӧчны тайӧс тшӧктам таво дас кыкӧд адар тӧлысьлӧн дас коймӧд лунӧ. Колӧ ӧти лунӧн бырӧдны тайӧ йӧзсӧ, кодъяс дугдывтӧг паныд сувтӧны, и пыр кежлӧ шыбитны найӧс адӧ. Сэки найӧ оз кутны водзӧ падмӧдны миянӧс, и ми вермам олӧм помӧдзным овны лӧня да зыксьытӧг».]

Эсфир 3:14

Тайӧ гижӧдсӧ индӧдӧс моз колӧ вӧлі юӧртны ӧксыув муясын олысь войтыръяслы, медым найӧ ставныс вӧліны дасьӧсь сійӧ луныс кежлӧ.

Эсфир 3:15

Гижӧд нуысьяс тэрмасьӧмӧн мунісны паськӧдны ӧксылысь тшӧктӧмсӧ. Юӧртісны тшӧтш Суза изкарын. Ӧксы да Аман пуксисны юны-гажӧдчыны, а Суза кар ёна шызис.

Эсфир 8:13

Тайӧ гижӧдсӧ индӧдӧс моз колӧ вӧлі юӧртны ӧксыув муясын олысь войтыръяслы, медым индӧм лунӧ иудейяс вӧліны дасьӧсь водзӧс перйыны найӧс мустӧмтысьяслысь.

Эсфир 8:15

Кор Мардокей петіс ӧксы дінысь, сы вылын вӧлі ӧксылӧн еджыд да гӧрдовлӧз рӧма паськӧм, вӧсни шабдіысь пемыдгӧрд кышан, юр вылас ыджыд зарни юркытш. Суза карын олысьяс гажӧдчисны да нимкодясисны.

Еклесиаст 9:10

Ставсӧ, мый верман, вӧч выныд серти. Ӧд кулӧмаяслӧн оланінас, кытчӧ тэ мунан, оз ло уджалӧмыс, мӧвпалӧмыс, тӧдӧмлуныс да мывкыдлуныс.

Даниил 8:2

Ме аддзи ачымӧс Суза изкарын, Элам нима ӧксыув муын, Улай ю дорын.

Ӧксыяслӧн 1 небӧг 21:8

Давид юаліс Ахимелеклысь: «Эм-ӧ тані тэнад шы либӧ шыпурт? Ӧксы менӧ ёна тэрмӧдліс да, аскӧд некутшӧм тышкасянтор эг босьт, весиг шыпуртӧс».