Ап. уджъяс 12:17 - Коми Библия 2023

¹⁷ Петыр сетіс кинас пас, медым найӧ лӧнясны. Сэсся висьталіс налы, кыдзи Господь петкӧдіс сійӧс дзескыдінысь. «Юӧртӧй та йылысь Яковлы да мукӧд вокъяслы», – шуис Петыр. Та бӧрын петіс на дінысь да муніс мӧдлаӧ.

Ап. уджъяс 12:17 ပူးပေါင်းရင်းမြစ်များ

Псалтыр 146:7

Сьылӧй Господьлы, аттьӧалӧй Сійӧс, ворсӧй миян Енлы гуслиӧн.

Матвей 10:23

Ӧти карысь кӧ тіянӧс вӧтласны, пышйӧй мӧдӧ. Веськыда висьтала тіянлы: Израильысь став карсӧ кытшовттӧдзныд на Морт Пи локтас.

Марк 6:3

Сійӧ ӧд тшупсьысь! Абу-ӧ Сійӧ Мариялӧн пиыс, абу-ӧ Яковлӧн, Иосейлӧн, Иудалӧн да Симонлӧн вокыс? Оз-ӧ тані овны Сылӧн чойясыс?» Тадзи Сійӧс ӧтдортісны.

Лука 1:22

Крамысь петӧм бӧрын Закар эз вермы сёрнитнысӧ. Йӧзыс гӧгӧрвоисны, мый сійӧ аддзылӧма Енсянь петкӧдчылӧм. Закар сёрнитіс йӧзыскӧд пасъясӧн.

Иоан 10:40

Исус бара вуджис Йӧрдан ю мӧдлапӧлӧ, кӧні Иоан пыртліс йӧзсӧ, да кольччис сэтчӧ.

Иоан 11:54

Та вӧсна Исус эз нин ветлы восьсӧн Иудея муӧд. Сійӧ муніс сэтысь овтӧминлань Ефраим карӧ да кольччис сэтчӧ велӧдчысьясыскӧд.

Иоан 13:24

Симон-Петыр довкнитіс сылы, юав пӧ Исуслысь, код йылысь Сійӧ сёрнитӧ.

Иоан 7:1

Та бӧрти Исус ветлӧдліс Галилеяті. Иудея муӧд Сійӧ эз кӧсйы ветлӧдлыны, ӧд иудейяслӧн веськӧдлысьяс кӧсйисны вины Сійӧс.

Иоан 8:59

Сэки найӧ босьтісны изъяс да кӧсйисны лыйлыны Исусӧс, но Исус саймовтчӧмӧн петіс крамсьыс да муніс сэтысь.

Ап. уджъяс 1:15

Сійӧ лунъясӧ чукӧртчис сё кызь гӧгӧр велӧдчысь. На шӧрӧ сувтӧмӧн Петыр шуис:

Ап. уджъяс 12:16

А Петыр пыр на игӧдчис. Кор восьтісны да аддзисны сійӧс, ёна чуймисны.

Ап. уджъяс 12:18

Асывнас Петырлӧн вошӧмысь шыпуртаяс ёна шызисны.

Ап. уджъяс 13:16

Сэки сувтіс Павел, сетіс кинас пас да шуис: «Израиль войтыр да Енмысь полысьяс, кывзӧй!

Ап. уджъяс 15:13

Налӧн сёрнитӧм бӧрын шыасис Яков: «Вокъяс, кывзӧй менӧ.

Ап. уджъяс 16:40

Дзескыдінысь петӧм бӧрын Павел да Сила мунісны Лидия ордӧ, сэні аддзысисны вокъяскӧд. Найӧс ышӧдӧм бӧрын мунісны карсьыс.

Ап. уджъяс 19:33

Сэні вӧліны тшӧтш иудейяс. Найӧ мырдӧн тшӧктісны Ӧльӧксандрлы петны йӧз водзӧ. Ӧльӧксандр сетіс кинас пас, мед ланьтасны, да кӧсйис нин сёрнитны.

Ап. уджъяс 21:18

Аскинас Павелкӧд ми мунім Яков дінӧ, кытчӧ локтісны тшӧтш вичкоса юрнуӧдысьяс.

Ап. уджъяс 21:40

Павеллы лэдзисны сёрнитны. Сод вылас сулалӧмӧн Павел лэптіс кисӧ. Кор йӧзыс ланьтісны, сійӧ пондіс сёрнитны еврей кыв вылын:

Ап. уджъяс 28:15

Сэні вокъяс кывлӧмаӧсь миян локтӧм йылысь. Найӧ воча локтісны миянлы, ӧтияс Аппия вузасянінӧдз, мӧдъяс – Куим шойччан керка нима сиктӧдз. Найӧс аддзӧм бӧрын Павел долыдмис да аттьӧаліс Енмӧс.

1 Коринфӧ 15:7

Та бӧрти Исус петкӧдчис Яковлы, сэсся став апостолыслы.

Галатӧ 1:19

Мукӧд апостолсӧ ме эг аддзыв Господьлысь Яков воксӧ кындзи.

Галатӧ 2:12

Яковсянь мӧдӧдӧмаяс вотӧдз Петыр ӧтлаын сёйис мукӧд войтыръясысь эскысьяскӧд. Но Яковлӧн йӧз локтӧм бӧрын сійӧ пондіс сайласьны да ӧтдортчыны, ӧд поліс вундыштчӧм дор сулалысьясысь.

Галатӧ 2:9

Яков, Петыр да Иоан, кодъясӧс лыддисны зумыд сюръяясӧн, гӧгӧрвоисны, мый Енмыс буралӧмнас корӧма менӧ. Сэки миянлы Варнавакӧд найӧ кинысӧ сетісны, медым вӧчны ӧтувъя удж. Сёрнитчим, мый найӧ мунасны иудейяс дінӧ, ми – мукӧд войтыръяс дінӧ.

Яков 1:1

Гижӧ Яков, Енлӧн да Господь Исус Кристослӧн кесйӧг. Чолӧмала дас кык чужанкотырӧс, кодъяс разалӧмаӧсь став му пасьталаыс.