ESTA 3:12 - Bukuit Ne Tilil

¹² Ki kiguur anyun siriigap laitoryat kobwa eng' arawet ne po tai eng' peetuutap taman ak somok, ak ki kisir ko uu tugul che ki ng'at Haman kong'atyi kiptainigap che mi kaplaitoryat, pounik che ki pou emet age tugul ak kiptainigap pororyet age tugul. Ki kisirchi emet age tugul ko uu sirennyi ak pororyet age tugul ko uu kutinnywa. Ki kisir eng' kainetap Laitoryat Aasuerus ak ki king'ooch eng' peteitap laitoryat.

BUKUIT NE TILIL

¹² Kigiguur anyun sirikab laitoriat kobwa eng’ arawet ne bo tai eng’ betutab taman ak somok, ak kigisir ko u tugul che king’at Haman, kong’atyi kiptainikab laitoriat, ak bounik che kibou emet age tugul, ak bounikab bororiet age tugul; kigisirji emet age tugul ko u sirennyi, ak bororiet age tugul ko u kutinywa; kigisir eng’ kainetab laitoriat Aasuerus, ak kiging’och eng’ peteitab laitoriat.

ESTA 3:12 ပူးပေါင်းရင်းမြစ်များ

1 LAITORINIK 21:8

Kosir anyun paronok eng' kainetap Ahab, ak kong'ooch eng' ng'ooksetap Ahab, ak koyookyi paronochooto poisyek ak piik che taagunotiin che ki mi nganasennyi che kimeng'jindos ak Nabot.

EZRAH 8:36

Ki igoochi kora ng'atuutigap laitoryat kandoik che po kaplaitoryat ak pounik che ki mi aineet pitoniin, ak kitoret piik ak kootap Kamuktaindet.

ESTA 1:22

Ki iyookto paronok koba emotinwek tugul che po laitoryat, koba emet age tugul eng' sirennywa ak koba pororyet age tugul eng' kutinnywa, kole, koboi chii tugul koonnyi ak komwaita eng' kutitap piikyik.

ESTA 3:11

Ak ki leenji `laitoryat Haman, “Kagigoonin fedha kobooto piik agicheek si kobiit iyachi ko uu ole makte.”

ESTA 8:2

Ki inem laitoryat peteinnyi ne kiga rebe Haman, ak kogoochi Mordekai. Ak ki inde `Esta Mordekai koboi kootap Haman.

ESTA 9:27

kong'at Yahudik kole koriip icheek kobooto iyotennywa ak tugul che ki namgei ak icheeget, peetuusyechooto aeng' ko uu ng'olyoonnywa ne ki kisir, si ma kibagaakta ak ko uu peetuusyek che ki king'at, eng' kenyiit age tugul.

DANIEL 3:10

Ee laitoryat, koing'at inyee ile chii age tugul ne kasei cheetap igoondit, ndurerut, ketubet, chepkesemit, kibugandet, ak ndurerut ne oo kobooto tyenwogik alak tugul, kobutyi ng'wony ak kolas kanamwetap thahabu,

DANIEL 6:12

Ki riik anyun pichooto, ak kong'alaal eng' taitap laitoryat agobo ng'atuutyetap laitoryat koleenji, “Ee Laitoryat! Tos ki ma isir ng'atuutyet ak inde kaineng'ung' ing'at ile eng' peetuusyek sosom, age tugul ne saaei kiy, ngo kamuktain age anan ko chii, kobatenen inyee, ee laitoryat, kewiirchin keriingetap ng'etuunyik?” Kowol laitoryat kole, “Po iman kiito, ko uu ng'atuutyetap Medik ak Persik, ne ma walaksei.”

DANIEL 6:15

Ki iyumgei anyun pichooto eng' kayanjinet koyumjigei laitoryat ak koleenji ineendet, “Ee laitoryat, nai ile ng'atuutyetap Medik ak Persik koma kiwalei, ng'atuutyet anan etanutik che igimiiti laitoryat.”

DANIEL 6:25

Ki sirchi anyun `Laitoryat Darius piik ak pororyosyek tugul ak che po kutusweek tugul che menyei ng'wony komugul; koleenji, “Ingotesak kaalyeet eng' okweek!

DANIEL 6:8

Igimiit anyun ng'atuutyet, ee laitoryat, ak isir kaineng'ung' eng' siruutichooto, si ma kiwal, ko uu ng'atuutyetap Medik ak Persik, ne ma walaksei.