ರೋಮ್ 7:4 - ಕೊಡವ ಬೈಬಲ್

⁴ ಅನ್ನನೆ, ನಾಡ ಅಣ್ಣತಮ್ಮಣಂಗಳೇ, ನಿಂಗಳು ಸಹ, ಕ್ರಿಸ್ತಂಡ ತಡೀರ ಮೂಲಕ ನ್ಯಾಯಪ್ರಮಾಣಕ್ ಚತ್ತ್ ಪೋಯಿತುಳ್ಳಿರ. ಆನಗುಂಡ್, ದೇವಕಾಯಿತ್ ಫಲ ಕೊಡ್‍ಪನೆಕೆ, ಚಾವ್‍ಯಿಂಜ ಜೀವವಾಯಿತ್ ಬಂದ ಬೋರೆ ಒಬ್ಬಂಗ್ ಕೂಡ್‍ನಯಿಂಗಳಾಯಿತುಳ್ಳಿರ.

ರೋಮ್ 7:4 ပူးပေါင်းရင်းမြစ်များ

ಮತ್ತಾಯ 26:26

ಅಯಿಂಗೆಲ್ಲಾರು ಉಂಬಕಾಪಕ, ಯೇಸು ಒಟ್ಟಿನ ಎಡ್‌ಪಂಜಿ, ದೇವನ ತುದಿಚಿತ್, ಪೊಳಿಪಂಜಿ ಶಿಷ್ಯಂಗಕ್ ಕೊಡ್‌ತಿತ್: ಇದ್‍ನ ಎಡ್‌ತ್‌ ತಿನ್ನಿ, ಇದ್ ನಾಡ ತಡೀಂದ್ ಎಣ್ಣ್‌ಚಿ.

ಮಾರ್ಕ 4:20

ಚೆನ್ನ ಜನ ನಲ್ಲ ಮಣ್ಣ್‌ಕ್ ಬುದ್ದ ಕುರುನನೆಕೆ ಇಪ್ಪ. ಅಯಿಂಗ ಕುಶೀಲ್ ದೇವಡ ವಾಕ್ಯತ್‍ನ ಸ್ವೀಕಾರ ಮಾಡಿತ್, ಫಲ ಕೊಡ್‍ಪ. ಚೆನ್ನ ನುಪ್ಪದ್, ಚೆನ್ನ ಅರ್‌ವದ್, ಚೆನ್ನ ನೂರಾಯಿತ್ ಫಲ ಕೊಡ್‍ಪ.

ಯೋಹಾನ 15:8

ನಿಂಗ ದುಂಬ ಫಲ ತಪ್ಪಯಿಂಗಳಾಯಿತ್ ಇಂಜತೇಂಗಿ, ನಾಡ ಅಪ್ಪಂಗ್ ಮಹಿಮೆ ಕ್‍ಟ್ಟುವ, ನಾಕ್ ಸಹ ನಿಂಗ ಶಿಷ್ಯಂಗಳಾಯಿತ್‌ಪ್ಪಿರ.

ಯೋಹಾನ 3:29

ಮಂಗಲಕರ್ತಿ ಉಳ್ಳಂವೊನೇ ಮಂಗಲಕಾರ ಆಪ. ಆಚೇಂಗಿ ಮಂಗಲಕಾರಂಡ ಕೂಟ್‍ಕಾರ ಮಂಗಲಕಾರಂಡ ಪಕ್ಕತ್‍ಲ್ ನಿಂದಿತ್ ಅಂವೊಂಡ ತಕ್ಕ್‌ನ ಕ್‍ೕಪ, ಮಂಗಲಕಾರಂಡ ದ್ವನಿ ಕ್‍ೕಟಿತ್ ದುಂಬ ಕುಶಿ ಪಡುವ. ಅನ್ನನೆ ನಾಕ್ ಆ ಕುಶಿ ಕ್‍ಟ್ಟಿತ್, ನಾಡ ಕುಶಿ ಪೂರ್ತಿ ಆಚಿ.

ಯೋಹಾನ 6:51

ನಾನೇ ಪರಲೋಕತ್ಂಜ ಬಂದ ಜೀವತ್‍ರ ಒಟ್ಟಿ; ಈ ಒಟ್ಟಿನ ತಿಂಬಯಿಂಗ ಎಕ್ಕಾಲು ಬದ್‍ಕ್‍ವ; ನಾನ್ ತಪ್ಪ ಒಟ್ಟಿ ನಾಡ ತಡಿಯೇ. ಈ ಲೋಕತ್‍ರ ಜನ ನಿತ್ಯ ಜೀವ ಪಡೆಯುವಕಾಯಿತ್ ನಾನ್ ನಾಡ ತಡೀನ ತಪ್ಪೀಂದ್ ಎಣ್ಣ್‌ಚಿ.

ರೋಮ್ 6:11

ಅನ್ನನೆ ನಿಂಗಳು, ನಿಂಗಳ ಪಾಪಕ್ ಚತ್ತಯಿಂಗಳಾಯಿತು, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡಲ್ಲಿ ಉಳ್ಳ ಐಕ್ಯತ್‍ಲ್ ದೇವಕಾಯಿತ್ ಬದ್‍ಕಿಯಂಡುಳ್ಳಯಿಂಗಳಾಯಿತು ಗೇನ ಮಾಡಿಯೊಳಿ.

ರೋಮ್ 6:14

ನಿಂಗ ನ್ಯಾಯಪ್ರಮಾಣತ್‍ರ ಅಡಿಕ್ ಬರತೆ, ಕೃಪೇರ ಅಡಿಕ್ ಬಂದಿತುಳ್ಳಗುಂಡ್ ಪಾಪ ನಿಂಗಳ ಆಳುವಕ್ ಕಯ್ಯುಲೆ.

ರೋಮ್ 6:2

ಅನ್ನನೆ ಇಲ್ಲೆ! ಪಾಪಕ್ ಚತ್ತ್ ಪೋಯಿತುಳ್ಳ ನಂಗ, ಇಂಞು ಅದ್‍ಲ್ ಎನ್ನನೆ ಬದ್‍ಕ್‌ವಕಾಪ?

ರೋಮ್ 6:22

ಇಕ್ಕ ನಿಂಗ ಪಾಪತ್ಂಜ ಬುಡುಗಡೆ ಆಯಿತ್ ದೇವಡ ಅಡಿಯಾಳಾಯಿತ್ ಉಳ್ಳಾಂಗ್, ಪವಿತ್ರವಾಯಿತ್‌ಪ್ಪದ್ ನಿಂಗಕ್ ಕ್‍ಟ್ಟ್‌ವ ಇನಾಮ್, ಅದ್ಂಡ ಪ್ರತಿಫಲ ನಿತ್ಯ ಜೀವ.

ರೋಮ್ 7:3

ಆನಗುಂಡ್, ಅವಡ ವಡಿಯ ಬದ್‍ಕಿಯಂಡಿಪ್ಪಕ, ಅವ ಬೋರೆ ಒಬ್ಬನ ಮಂಗಲ ಕಯಿಚತೇಂಗಿ, ಅವಳ ವ್ಯಬಿಚಾರೀಂದ್ ಕಾಕುವ; ವಡಿಯ ಚತ್ತ ಪಿಂಞ ಮಂಗಲತ್‍ರ ಪ್ರಮಾಣತ್ಂಜ ಬುಡುಗಡೆ ಆನಗುಂಡ್, ಅವ ಬೋರೆ ಒಬ್ಬನ ಮಂಗಲ ಕುಯಿಚತೇಂಗಿ ಅವಳ ವ್ಯಬಿಚಾರೀಂದ್ ಕಾಕುಲೆ.

ರೋಮ್ 7:6

ಆಚೇಂಗಿ, ಇಕ್ಕ, ಒಳ್‍ದಿತುಳ್ಳ ಪಳೆಯ ರೀತಿಲ್ ಅಲ್ಲ, ಆಚೇಂಗಿ ಪವಿತ್ರಾತ್ಮತ್‍ರ ಪುದಿಯ ರೀತಿರ ಪ್ರಕಾರ ನಂಗ ಸೇವೆ ಮಾಡ್‌ವನೆಕೆ, ನಂಗಳ ಪುಡ್‍ಚಿ ಬೆಚ್ಚಿತ್ಂಜ ನ್ಯಾಯಪ್ರಮಾಣಕ್ ನಂಗ ಚತ್ತಿತ್ ಬುಡ್‍ಗಡೆ ಆಯಿತುಂಡ್.

ರೋಮ್ 8:2

ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತ ಯೇಸುರಲ್ಲಿ ಉಳ್ಳ ಐಕ್ಯತ್‍ಲ್ ನಂಗಕ್ ಜೀವ ತಪ್ಪ ಪವಿತ್ರಾತ್ಮತ್‍ರ ಕಾನೂನ್, ನನ್ನ ಪಾಪ ಪಿಂಞ ಚಾವ್‍ರ ಕಾನೂನಿಂಜ ಬುಡುಗಡೆ ಮಾಡ್‍ಚಿ.

1 ಕೊರಿಂಥ 10:16

ನಂಗ ಆರಾದನೆ ಮಾಡ್‌ವಕ್ ಒಕ್ಕಚೆ ಕೂಡಿ ಬಪ್ಪಕ, ಕ್ರಿಸ್ತ ನಂಗಕಾಯಿತ್ ಚತ್ತ್ ಪೋನದ್‍ನ ಗೇನ ಮಾಡ್‌ವಕಾಯಿತ್, ನಂಗ ದೇವಕ್ ವಂದನೆ ಮಾಡಿತ್ ಕುಡಿಪ ದ್ರಾಕ್ಷಿರಸ, ನಂಗ ಆ ಚೋರೆರ ಪಾಲ್‍ದಾರಂಗಾಂದ್ ಕಾಟಿತಪ್ಪ ಅಲ್ಲಾ? ನಂಗ ತಿಂಬ ಒಟ್ಟಿ ಕ್ರಿಸ್ತಂಡ ತಡೀರ ಪಾಲ್‍ದಾರಂಗಾಂದ್ ಕಾಟಿತಪ್ಪ ಅಲ್ಲಾ?

2 ಕೊರಿಂಥ 11:2

ಕ್ರಿಸ್ತ ಎಣ್ಣುವ ಒರೇ ಪುತ್ತಂಗಾರಂಗ್ ನಿಂಗಳ ಪವಿತ್ರ ಕನ್ನಿ ಮೂಡಿಯಾಯಿತ್ ಒಪ್ಪ್‌ಚಿಡಂಡೂಂದ್ ನಾನ್ ನಿಶ್ಚಯ ಮಾಡ್‍ನಗುಂಡ್, ನಿಂಗಕಾಯಿತ್ ದೇವಡ ವೈರಾಗ್ಯವಾನ ವೈರಾಗ್ಯತ್‍ಲ್ ನಾನ್ ಉಳ್ಳ.

ಗಲಾತ್ಯ 3:13

ಮರತ್‍ಲ್ ತೂಂಗಿತ್ ಚತ್ತ್‌ಪೋನ ಏದ್ ಮನುಷ್ಯನು ಶಾಪ ಪಡ್ಂದವೋಂದ್ ದೇವಡ ವಾಕ್ಯತ್‍ಲ್ ಉಂಡ್. ಅನ್ನನೆ, ಕ್ರಿಸ್ತ ನಂಗಕಾಯಿತ್ ಶಾಪವಾಯಿತ್, ನ್ಯಾಯಪ್ರಮಾಣತ್‍ರ ಶಾಪತ್ಂಜ ನಂಗಳ ಬುಡುಗಡೆ ಮಾಡಿತ್ ಕಾಪಾಡ್‍ಚಿ.

ಗಲಾತ್ಯ 5:18

ನಿಂಗಳ ದೇವಡ ಆತ್ಮ ನಡ್‍ತಿಯಂಡ್ ಉಂಡೇಂಗಿ ನಿಂಗ ನ್ಯಾಯಪ್ರಮಾಣಕ್ ಒಳಪಟ್ಟಯಿಂಗ ಅಲ್ಲ.

ಎಫೆಸ 2:15

ನ್ಯಾಯಪ್ರಮಾಣತ್‍ನ ಪಿಂಞ ಅದ್ಂಡ ನೇಮತ್‍ನ ತಾಂಡ ತಡೀರಗುಂಡ್ ನಾಶ ಮಾಡ್‍ಚಿ. ಅನ್ನನೆ ಈ ದಂಡ್ ಜನತ್‍ನ ತಾಂಡ ಮೂಲಕ ಒರೇ ಪುದಿಯ ಮನುಷ್ಯನಾಯಿತ್ ಸೃಷ್ಟಿ ಮಾಡಿತ್, ಸಮಾದಾನ ಮಾಡ್‍ಚಿ.

ಫಿಲಿಪ್ಪಿ 1:11

ಅದಲ್ಲತೆ ಇಲ್ಲಿಯತ್‍ರ ನಿಂಗಡ ಬದ್‍ಕ್ ಯೇಸು ಕ್ರಿಸ್ತನಗುಂಡ್ ಮಾತ್ರ ಕ್‍ಟ್ಟ್‌ವ ನೀತಿರ ಗುಣತ್‍ಲ್ ದುಂಬ್‍ನದಾಯಿತ್ ಇಪ್ಪ. ಅನ್ನನೆ ದೇವಕ್ ಮಾತ್ರ ಮಹಿಮೆ ಪಿಂಞ ತುದಿ ಆಡ್.

ಫಿಲಿಪ್ಪಿ 4:17

ನಾನ್ ನಿಂಗಡಗುಂಡ್ ಸಹಾಯ ಮಾತ್ರ ನೋಟಿಯಂಡ್ ಇರತೆ, ನಿಂಗ ಮಾಡ್‍ನ ಸಹಾಯಕ್ ದೇವ ನಿಂಗಕ್ ದುಂಬ ಫಲ ತರಂಡೂಂಡ್ ಬೋಡುವಿ.

ಕೊಲೊಸ್ಸೆ 1:10

ಅಕ್ಕ, ನಿಂಗ ಒಡೆಯಂಗ್ ಯೋಗ್ಯವಾನ ಬದ್‍ಕ್ ಬದ್‌ಕಿತ್, ಎಲ್ಲಾ ರೀತಿಲ್ ಅಂವೊನ ಕುಶಿ ಪಡ್‍ತಿತ್, ಎಲ್ಲಾ ತರತ್‍ರ ನಲ್ಲ ಕೆಲಸತ್‌ರ ಫಲತ್‍ನ ಕೊಡ್‌ತಿತ್, ದೇವನ ಗೊತ್ತಾಪಕುಳ್ಳ ಅಂವೊಂಡ ಬುದ್ದಿಲ್ ಬೊಳಿವಿರ.

ಕೊಲೊಸ್ಸೆ 1:22

ಆಚೇಂಗಿ, ಇಕ್ಕ ಅಂವೊ ತಾಂಡ ಮೋಂವೊ ತಡೀಲ್ ಚತ್ತ್ ಪೋನಗುಂಡ್ ನಿಂಗಡ ಕೂಡೆ ಇಂಜ ವಿರೋದತ್‍ನ ಕಳೆಂದಿತ್ ಸಮಾದಾನ ಮಾಡಿತ್, ಅಂವೊಂಡ ಸನ್ನಿದಾನತ್‍ಲ್ ನಿಂಗಳ ಪವಿತ್ರವಾನಯಿಂಗಳಾಯಿತ್, ಒರ್ ತಪ್ಪಿಲ್ಲತಯಿಂಗಳಾಯಿತ್, ಒರ್ ಕುತ್ತ ಇಲ್ಲತಯಿಂಗಳಾಯಿತ್ ಅರ್ಪಿಚಿಡ್‌ವಕ್ ಇನ್ನನೆ ಮಾಡ್‍ಚಿ.

ಕೊಲೊಸ್ಸೆ 1:6

ನಿಂಗಡ ಪಕ್ಕ ಬಂದ ಆ ದೇವಡ ನಲ್ಲ ಸುದ್ದಿ, ಇಡೀ ಲೋಕಕ್ ಪೋಯಂಡುಂಡ್. ಅದ್ ನಿಂಗಡ ಪಕ್ಕ ಬಂದಿತ್, ನಿಂಗ ಅದ್‍ನ ಕ್‍ೕಟಿತ್ ದೇವಡ ಕೃಪೇನ ನೇರಾಯಿತ್ ಅರ್ಥಮಾಡ್‍ನ ದಿವಸತ್ಂಜ ನಿಂಗಡ ಬದ್‍ಕ್‍ಲ್ ಎನ್ನನೆ ಫಲ ತಂದ್‍ೕಂಡುಂಡೊ, ಅನ್ನನೆ ಅದ್ ಪೋಪ ಜಾಗತ್‍ಲೆಲ್ಲಾ ಸಹ, ಜನಡ ಬದ್‍ಕ್‍ಲ್ ಮಾಡಿಯಂಡುಂಡ್.

ಕೊಲೊಸ್ಸೆ 2:14

ನಂಗ ನ್ಯಾಯಪ್ರಮಾಣತ್‍ರನೆಕೆ ಮಾಡತಗುಂಡ್ ನಂಗಕ್ ವಿರೋದವಾಯಿತ್ ಇಂಜ ಪಿಂಞ ಅದ್‍ನಗುಂಡ್ ನಂಗಕ್ ಒಳ್‍ದಿ ಬೆಚ್ಚಿತ್ಂಜ ಅಪರಾದತ್‍ನ ಇಲ್ಲತನೆಕೆ ಮಾಡಿರ್‌ತ್. ಅಂವೊ ಅದ್‍ನೆಲ್ಲಾ ಎಡ್‍ತಿತ್ ಕ್ರಿಸ್ತನ ಶಿಲುಬೇಲ್ ಇಟ್ಟಿತ್ ಆಣಿ ಅಡಿಪಕ ಆ ಆಣಿಲ್ ಅಡಿಚಿರ್‌ತ್.

ಕೊಲೊಸ್ಸೆ 2:20

ನಿಂಗ ಕ್ರಿಸ್ತಂಡ ಕೂಡೆ ಚತ್ತ್ ಪೋಯಿತ್, ಈ ಲೋಕತ್‍ರ ಆತ್ಮತ್‍ರ ಅದಿಕಾರತ್ಂಜ ಬುಡುಗಡೆ ಆಯಿತುಳ್ಳಿರ. ಪಿಂಞ ಎನ್ನಂಗ್, ನಿಂಗ ಇಂಞು ಇನ್ನನೆ ಮಾಡ್‌ವಕ್ಕಾಗ, ಇದ್‍ನ ತಿಂಬಕ್ಕಾಗ, ಇದ್‍ನ ಮುಟ್ಟುವಕ್ಕಾಗಾಂದ್ ಈ ಲೋಕತ್‍ರ ನೇಮತ್‍ರನೆಕೆ ಬದ್‌ಕಿಯಂಡುಳ್ಳಿರ?

ಇಬ್ರಿಯ 10:10

ಯೇಸು ಕ್ರಿಸ್ತಂಡ ತಡಿ ಒರೇ ಕುರಿ ಬಲಿಯಾನಗುಂಡ್, ದೇವಡ ಚಿತ್ತತ್‍ರನೆಕೆ ಅದ್ಂಡ ಮೂಲಕ ನಂಗಳ ಪವಿತ್ರವಾನಯಿಂಗಳಾಯಿತ್ ಮಾಡ್‍ಚಿ.

1 ಪೇತ್ರ 2:24

ಅಂವೊ ನಂಗಡ ಪಾಪತ್‍ನ ತಾಂಡ ತಡೀಲ್ ಎಡ್‍ತಂಡ್, ಶಿಲುಬೇಲ್ ಪೊರ್‌ತಂಡ್‌ ಚತ್ತತ್. ಆನಗುಂಡ್, ನಂಗ ಪಾಪಕ್ ಚತ್ತ್ ಪೋಯಿತ್ ನೀತಿಕ್ ಬದ್‍ಕ್‍ವನೆಕೆ ಆಚಿ. ಅಂವೊಂಡ ಗಾಯತ್‍ನಗುಂಡ್ ನಂಗ ವಾಸಿಯಾಚಿ.

ಪ್ರಕಟನೆ 19:7

ನಂಗ ಕುಶಿಪಟ್ಟಿತ್, ಕೊಂಡಾಡಿತ್ ಅಂವೊಂಗ್ ಮಹಿಮೆ ಅರ್ಪಿಚಿಡನ. ಕೊರಿಕುಟ್ಟಿಯಾನವೊಂಡ ಮಂಗಲ ಬಾತ್, ಅಂವೊಂಡ ಪೊಣ್ಣಾಪಕುಳ್ಳ ಮಂಗಲಕರ್ತಿ ಅವಳ ತಯಾರ್ ಮಾಡ್‍ಚೀಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

ಪ್ರಕಟನೆ 21:9

ಪಿಂಞ ಆಕೀರ್‌ಲ್ ಏಳ್ ಬಾದೆರಗುಂಡ್ ದುಂಬಿತ್ಂಜ ಏಳ್ ಪಾತ್ರತ್‍ನ ಪುಡ್‌ಚಂಡಿಂಜ ಆ ಏಳ್ ದೇವದೂತಂಗಡಲ್ಲಿ ಒಬ್ಬ ನಾಡ ಪಕ್ಕ ಬಂದಿತ್: ಇಲ್ಲಿ ಬಾ! ನಾನ್, ಕೊರಿಕುಟ್ಟಿಯಾನವೊಂಡ ಪೊಣ್ಣಾಪಕುಳ್ಳ ಮಂಗಲಕರ್ತಿನ ನೀಕ್ ಕಾಟಿತಪ್ಪೀಂದ್ ಎಣ್ಣ್‌ಚಿ.