ರೋಮ್ 5:2 - ಕೊಡವ ಬೈಬಲ್

² ಇಕ್ಕ ನಂಗ ಸ್ತಿರವಾಯಿತ್ ನಿಂದಂಡುಳ್ಳ ಈ ಕೃಪೇರ ಒಳ್‍ಕ್ ಪೋಪಕುಳ್ಳ ಬಟ್ಟೇನ ನಂಬಿಕೇರ ಮೂಲ ಪಡ್ಂದಿತ್, ದೇವಡ ಮಹಿಮೆಲ್ ನಂಗ ಪಾಲ್‍ದಾರಂಗಳಾಪಾಂದ್ ಉಳ್ಳ ನಿರಿಕ್ಷೇಲ್ ಹೊಗಳಿಯಂಡುಂಡ್.

ರೋಮ್ 5:2 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 14:32

ದುಷ್ಟ ತಾನ್‌ ಮಾಡುವ ಕ್‍ೕಡ್‌ಯಿಂಜಲೇ ನಾಶ ಆಯಿ ಪೋಪ. ಆಚೇಂಗಿ ನೀತಿವಂತಂವೊಂಗ್‌ ಚಾವ್‌ರ ನೇರತು ನಂಬಿಕೇಲ್‌ ಇಪ್ಪ.

ಮತ್ತಾಯ 25:21

ಅಂವೊಂಡ ಎಜಮಾನ ಅಂವೊನ ನೋಟಿತ್: ನಲ್ಲದ್ ಆಚಿ, ನೀನ್ ನಲ್ಲ ಪಿಂಞ ನಂಬಿಕಸ್ತನಾನ ಆಳ್. ಚೆರಿಯ ವಿಷಯತ್‍ಲು ನೀನ್ ನಂಬಿಕೆ ಕಾಟಿತುಳ್ಳಿಯ, ನಿನ್ನ ನಾನ್ ಬಲ್ಯ ಕೆಲಸಕ್ ಅದಿಕಾರಿಯಾಯಿತ್ ಮಾಡ್‌ವಿ, ಇಕ್ಕ ಬಾ, ನೀಡ ಎಜಮಾನಂಡ ಕುಶೀಲ್ ಪ್ರವೇಶ ಮಾಡ್‍ೕಂದ್ ಎಣ್ಣ್‌ಚಿ.

ಯೋಹಾನ 10:7

ಆನಗುಂಡ್, ಯೇಸು ಪುನಃ ಅಯಿಂಗಳ ನೋಟಿತ್: ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ, ನಾನೇ ಕೊರಿಯಂಗಕ್ ಪಡಿಯಾಯಿತುಂಡ್.

ಯೋಹಾನ 10:9

ನಾನೇ ಪಡಿ. ಒಬ್ಬ ನಾಡ ಮೂಲಕ ಬಾತೇಂಗಿ ಬಚಾವಾಪ. ಅಂವೊ ಒಳ್‍ಕ್ ಬಂದಿತ್ ಪೊರಮೆ ಪೋಯಿತ್ ಪಚ್ಚೆ ಪಿಲ್ಲ್ ಜಾಗತ್‍ನ ಕಂಡ್‍ಪುಡಿಪ.

ಯೋಹಾನ 14:6

ಅಂವೊಂಗ್ ಯೇಸು: ನಾನೇ ಬಟ್ಟೇಯು, ಸತ್ಯವು, ಜೀವವುವಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ. ನಾಡ ಮೂಲಕ ಅಲ್ಲತೆ ದಾರೂ ನಾಡ ಅಪ್ಪಂಡ ಪಕ್ಕ ಬಪ್ಪಕ್ ಕಯ್ಯುಲೆ.

ಯೋಹಾನ 5:24

ದಾರ್ ನಾಡ ತಕ್ಕ್‌ನ ಕ್‍ೕಟಿತ್, ನನ್ನ ಅಯಿಚಂವೊನ ನಂಬುವ, ಅಯಿಂಗಕ್ ನಿತ್ಯ ಜೀವ ಉಂಡ್, ಅಯಿಂಗಕ್ ಕ್‍ಟ್ಟುವ ಶಿಕ್ಷೇರ ತೀರ್ಪ್‌ಯಿಂಜ ಅಯಿಂಗ ಬಚಾವ್ ಆಪ. ಅನ್ನನೆ ಅಯಿಂಗಕ್ ಬಪ್ಪ ಚಾವ್‍ಯಿಂಜಲು, ಬದ್‌ಕಿತ್ ಜೀವವಾಯಿತ್ ಬಪ್ಪಾಂದ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ.

ಅಪೊಸ್ತಲ 14:27

ಅಯಿಂಗ ಅಲ್ಲಿ ಎತ್ತ್‌ನ ಪಿಂಞ, ಅಲ್ಲಿಯತ್‍ರ ಸಬೇನ ಕೂಟಿತ್, ದೇವ ಅಯಿಂಗಡ ಮೂಲಕ ಮಾಡ್‍ನ ಎಲ್ಲಾನ ಪಿಂಞ ಯೆಹೂದ್ಯಂಗ ಅಲ್ಲತ ಬೋರೆ ಜನಡ ನಂಬಿಕೇರ ಪಡಿನ ಅಂವೊ ಎನ್ನನೆ ತೊರಂದತ್‍ೕಂದ್ ವಿವರವಾಯಿತ್ ಅಯಿಂಗಕ್ ಎಣ್ಣ್‌ಚಿ.

ರೋಮ್ 11:20

ಅಕ್ಕು, ಅಯಿಂಗಡ ಅಪನಂಬಿಕೇರಗುಂಡ್ ಅಯಿಂಗಳ ಮುರಿಚಿರ್‌ತ್. ನಿಂಗ ನಂಬಿಕೇರ ಮೂಲಕ ನಿಂದಂಡುಂಡ್; ಬಡಾಯಿ ಮಾಡತಿ, ಆಚೇಂಗಿ ಬೊತ್ತಿಯಂಡಿರಿ.

ರೋಮ್ 12:12

ನಿರಿಕ್ಷೇಲ್ ಕುಶಿಯಾಯಿತಿರಿ, ಕಷ್ಟತ್‍ಲ್ ಪೊರುಮೆಯಾಯಿತಿರಿ, ಪ್ರಾರ್ಥನೆ ಮಾಡ್‌ವದ್‍ಲ್ ಸ್ತಿರವಾಯಿತ್ ಮಾಡಿಯಂಡಿರಿ.

ರೋಮ್ 14:4

ಬೋರೆ ಒಬ್ಬಂಡ ಆಳ್‌ನ ತೀರ್ಪ್ ಮಾಡ್‌ವಕ್ ನೀನ್ ದಾರ್? ಅಂವೊ ನಿಂದತೇಂಗಿಯು, ಬುದ್ದತೇಂಗಿಯು ಅಂವೊ ಅಂವೊಂಡ ಎಜಮಾನಂಗ್ ಕೂಡ್‍ನಂವೊನಾಪ. ಅಂವೊ ನಿಪ್ಪಕ್ ದೇವ ಶಕ್ತಿ ಕೊಡ್‍ಪಂವೊನಾಯಿತುಂಡಲ್ಲ.

ರೋಮ್ 15:13

ಪವಿತ್ರಾತ್ಮತ್‍ರ ಶಕ್ತಿರಗುಂಡ್ ನಿಂಗಡ ನಿರೀಕ್ಷೆ ಬಲ್ಯದಾಪಕಾಯಿತ್, ನಿರಿಕ್ಷೇರ ದೇವ, ನಂಬಿಕೇರ ಮೂಲಕ ಕ್‍ಟ್ಟುವ ಎಲ್ಲಾ ಕುಶೀರಗುಂಡ್ ಸಮಾದಾನತ್‍ರಗುಂಡ್ ನಿಂಗಳ ದುಂಬ್‌ಚಿಡಡ್.

ರೋಮ್ 2:7

ಎಲ್ಲಾನ ತಾಳ್ಮೆಲ್ ಸಹಿಸಿಯಂಡ್, ನಲ್ಲ ಕೆಲಸ ಮಾಡಿಯಂಡ್ ಮಹಿಮೆನ, ಗನತ್‍ನ ಪಿಂಞ ಪಾಳಾಯಿ ಪೋಕತದ್‍ನ ತ್‍ೕಡಿಯಂಡುಳ್ಳಯಿಂಗಕ್ ದೇವ ನಿತ್ಯ ಜೀವ ತಪ್ಪ.

ರೋಮ್ 3:23

ಎಲ್ಲಾರು ಪಾಪ ಮಾಡಿತ್, ದೇವಡ ಮಹಿಮೆನ ಕಳೆಂದಯಿಂಗಳಾಯಿತುಂಡ್.

ರೋಮ್ 5:5

ಈ ನಿರೀಕ್ಷೆ ನಂಗಳ ನಿರಾಶೆ ಮಾಡುಲೆ, ಎನ್ನಂಗೆಣ್ಣ್‌ಚೇಂಗಿ, ನಂಗಕ್ ತಂದಿತುಳ್ಳ ಪವಿತ್ರಾತ್ಮತ್‍ರಗುಂಡ್ ದೇವಡ ಪ್ರೀತಿ ನಂಗಡ ಹೃದಯತ್‍ಲ್ ಬೂಕಿತುಂಡ್.

ರೋಮ್ 8:1

ಆನಗುಂಡ್, ದೇವ ಅಂವೊನ ನಂಬತಯಿಂಗಕ್ ತಪ್ಪ ಶಿಕ್ಷೆ, ಕ್ರಿಸ್ತ ಯೇಸುರ ಕೂಡೆ ಐಕ್ಯತ್‍ಲ್ ಉಳ್ಳಯಿಂಗಕ್ ತಪ್ಪುಲೆ.

ರೋಮ್ 8:24

ಆ ನಿರೀಕ್ಷೆಯಿಂಜ ನಂಗಕ್ ರಕ್ಷಣೆ ಕ್‍ಟ್ಟ್‌ಚಿ. ಕಾಂಬಕ್ ಕಯ್ಯುವ ವಿಷಯತ್‍ಲ್ ನಿರಿಕ್ಷೇಲ್ ಇಪ್ಪದ್ ನಿರೀಕ್ಷೆ ಅಲ್ಲ; ಒಬ್ಬ ಕಾಂಬಕ್ ಕಯ್ಯುವ ವಿಷಯತ್‍ಲ್ ನಿರೀಕ್ಷೆ ಮಾಡಂಡೂಂದ್ ಎಂತ ಉಂಡ್?

1 ಕೊರಿಂಥ 15:1

ಅಕ್ಕ, ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಕ್ ಮಿಂಞಲೇ ಪ್ರಚಾರ ಮಾಡ್‍ನ ದೇವಡ ನಲ್ಲ ಸುದ್ದಿನ ಪುನಃ ನಿಂಗಡ ನೆನಪ್‌ಕ್ ಕೊಂಡ್ ಬಪ್ಪಿ. ಅಕ್ಕ ನಿಂಗಕ್ ಕ್‍ಟ್ಟ್‌ನ ಈ ಬೋದನೆಲ್ ಬೊಳ್ಂದಂಡ್, ನಂಬಿಕೇಲ್ ದೃಡವಾಯಿತುಳ್ಳಿರ.

2 ಕೊರಿಂಥ 3:18

ನಂಗ ಎಲ್ಲಾರು, ಮೂಡ್‌ರ ಮೇಲೆ ಬಟ್ಟೆ ಇಲ್ಲತಯಿಂಗಳಾಯಿತ್, ಒಡೆಯಂಡ ಮಹಿಮೆನ ಒರ್ ಕನ್ನಡಿಲ್ ಕಾಂಬನೆಕೆ ಕಂಡಂಡುಂಡ್. ಆತ್ಮವಾಯಿತುಳ್ಳ ಒಡೆಯನಗುಂಡ್, ಅಂವೊಂಡನೆಕೆ ಮಹಿಮೇರ ಮೇಲೆ ಮಹಿಮೆ ಪಡ್ಂದಿತ್, ಅಂವೊಂಡ ಮಹಿಮೇರ ರೂಪತ್‍ರನೆಕೆ ಬದ್‍ಲಾಯಂಡುಂಡ್.

2 ಕೊರಿಂಥ 4:17

ಇಂಞು, ಒರ್ ಗಳಿಗೆಲ್ ಕಾಂಗತ ಆಪ ತೂವೆಯಾಯಿತುಳ್ಳ ನಂಗಡ ಈ ಕಷ್ಟ, ನಂಗಕ್ ದುಂಬ ಬಲ್ಯ ನಿತ್ಯ ಗನಪಟ್ಟ ಮಹಿಮೆನ ಉಂಟ್ ಮಾಡ್‌ವ.

ಎಫೆಸ 2:18

ಅನ್ನನೆ ನಂಗ ದಂಡ್ ಜನವು, ಒರೇ ಪವಿತ್ರಾತ್ಮತ್‍ರ ಮೂಲಕ, ಅಪ್ಪನಾನ ದೇವಡ ಪಕ್ಕ ಕೂಡುವಕುಳ್ಳ ಬಾಗ್ಯ ಅಂವೊಂಡ ಮೂಲಕ ಕ್‍ಟ್ಟ್‌ಚಿ.

ಎಫೆಸ 3:12

ಅಂವೊಂಡಲ್ಲಿ ಪಿಂಞ ಅಂವೊಂಡ ಮೇಲೆ ಉಳ್ಳ ನಂಬಿಕೇರ ಮೂಲಕ, ನಂಗಕ್ ದೈರ್ಯವು, ಏದ್ ಪೋಡಿಯು ಇಲ್ಲತ ದೇವಡ ಪ್ರಸನ್ನಕ್ ಬಪ್ಪಕುಳ್ಳ ಬಾಗ್ಯವು ಕ್‍ಟ್ಟ್‌ಚಿ.

ಎಫೆಸ 6:13

ಆನಗುಂಡ್ ಕೆಟ್ಟ ದಿವಸತ್‍ಲ್ ನಿಂಗ ಅಯಿಂಗಕ್ ಎದ್‍ರ್ ನಿಪ್ಪಕ, ಎಲ್ಲಾನ ಪೂರ್ತಿ ಮಾಡ್‍ನಯಿಂಗಳಾಯಿತ್ ನಿಪ್ಪಕ್ ಶಕ್ತಿ ಉಳ್ಳಯಿಂಗಳಾಯಿತ್ ಇಪ್ಪನೆಕೆ ದೇವಡ ಸರ್ವ ಆಯುದತ್‍ನ ಇಟ್ಟೊಳಿ.

2 ಥೆಸಲೊನೀಕ 2:16

ನಂಗಡ ಒಡೆಯನಾನ ಯೇಸು ಕ್ರಿಸ್ತನು, ನಂಗಡ ಮೇಲೆ ಪ್ರೀತಿ ಬೆಚ್ಚಿತ್ ನಂಗಡ ಹೃದಯತ್‍ಲ್ ನಿತ್ಯ ಒತ್ತಾಸೆನೆ, ಕುಶೀರ ನಿರಿಕ್ಷೇನ, ನಂಗಕ್ ಕೃಪೆಯಾಯಿತ್ ದಾನಮಾಡ್‍ನ ಅಪ್ಪನಾನ ದೇವನು,

ಇಬ್ರಿಯ 3:6

ಆಚೇಂಗಿ ಕ್ರಿಸ್ತ, ದೇವಡ ಮನೇಕಿಂಜ ಬಲ್ಯಂವೊನಾಯಿತ್ ಒರ್ ಮೋಂವೊಂಡನೆಕೆ ಸತ್ಯವಂತಂವೊನಾಯಿತುಂಡ್; ನಂಗಡ ನಿರೀಕ್ಷೇರಗುಂಡ್ ಕ್‍ಟ್ಟುವ ದೈರ್ಯ ಪಿಂಞ ಹೆಮ್ಮೆನ ಕಡೇಕತ್ತನೆ ಗಟ್ಟಿಯಾಯಿತ್ ಪುಡ್‍ಚಂಡ್ ಇಂಜತೇಂಗಿ ನಂಗಳೇ ಅಂವೊಂಡ ಮನೇಯಾಯಿತ್‌ಪ್ಪ.

ಇಬ್ರಿಯ 6:18

ಆನಗುಂಡ್ ದೇವ ತಾಂಡ ವಾಗ್ದಾನತ್‍ನ ಪಿಂಞ ಆಣೆನ ನಂಗಕ್ ತಂದಿತುಂಡ್. ಈ ದಂಡ್ ವಿಷಯವು ಎಕ್ಕಾಲು ಬದ್‍ಲ್ ಆಪುಲೆ. ಅಂವೊ ಇನ್ನನೆ ಎನ್ನಂಗ್ ಮಾಡ್‍ಚೇಂಗಿ, ದೇವ ಪೊಟ್ಟ್ ಪರಿವಕ್ ಸಾದ್ಯತೆ ಇಲ್ಲೆ. ಆನಗುಂಡ್ ನಂಗಡ ಮಿಂಞಕ್ ಬೆಚ್ಚಿತುಳ್ಳ ನಿರಿಕ್ಷೇನ ಗಟ್ಟಿಯಾಯಿತ್ ಪುಡ್‌ಚಿತ್, ಬಚಾವಾಪಕ್ ಅಂವೊಂಡ ಪಕ್ಕ ಓಡಿ ಬಂದ ನಂಗಕ್ ದುಂಬ ನಿಶ್ಚಯ ಉಂಡ್.

1 ಪೇತ್ರ 3:18

ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತ ಸಹ ನಂಗಳ ದೇವಡ ಪಕ್ಕ ಕೊಂಡ್ ಬಪ್ಪಕಾಯಿತ್, ಅನೀತಿ ಉಳ್ಳಯಿಂಗಕ್ ಬದ್‍ಲಾಯಿತ್ ನೀತಿಯುಳ್ಳಂವೊನಾಯಿತ್ ಒರೇ ಕುರಿ ಪಾಪತ್‍ರಗುಂಡ್ ಕಷ್ಟಪಟ್ಟತ್; ಅಂವೊ ತಡೀಲ್ ಚತ್ತತ್, ಆತ್ಮತ್‍ಲ್ ಜೀವವಾಯಿತ್ ಬಾತ್.

ಪ್ರಕಟನೆ 21:11

ಅದ್‍ಲ್ ದೇವಡ ಮಹಿಮೆ ಇಂಜತ್. ಆ ಪಟ್ಟಣತ್‍ರ ಬೊಳಿ, ಬಲ್ಯ ಬೆಲೆಯುಳ್ಳ ರತ್ನತ್‍ರ ಬೊಳಿ‍ರನೆಕೆಯು, ಪಳಪಳಾಂದ್ ಉಳ್ಳ ವಜ್ರತ್‍ರನೆಕೆಯು ಇಂಜತ್.

ಪ್ರಕಟನೆ 21:23

ಆ ಪಟ್ಟಣಕ್ ಬೊಳಿ ಕೊಡ್‍ಪಕ್ ಸೂರ್ಯನಾಡ್ ಚಂದ್ರನಾಡ್ ಬೋಂಡ್‍ವಕಿಂಜ್‍ಲೆ; ದೇವಡ ಮಹಿಮೆಯೇ ಅದ್ಂಗ್ ಬೊಳಿಯಾಯಿತ್ಂಜತ್. ಕೊರಿಕುಟ್ಟಿಯಾನಂವೊನೇ ಅದ್ಂಗ್ ಬೊಳಕಾಯಿತ್ಂಜತ್

ಪ್ರಕಟನೆ 21:3

ಸಿಂಹಾಸನತ್ಂಜ ಒರ್ ಬಲ್ಯ ಸದ್ದ್ ನಾಕ್ ಕ್‍ೕಟತ್: ನೋಟಿ, ಮನುಷ್ಯಂಡ ಮದ್ಯತ್‍ಲ್ ದೇವ ವಾಸ ಮಾಡ್‌ವ ಜಾಗ ಉಂಡ್, ಅಯಿಂಗಡಲ್ಲಿ ಅಂವೊ ವಾಸ ಮಾಡಿಯಂಡಿಪ್ಪ; ಅಯಿಂಗ ಅಂವೊಂಡ ಜನವಾಯಿತ್‌ಪ್ಪ, ದೇವ ತಾನೆ ಅಯಿಂಗಡ ಕೂಡೆ ಇಂಜಿತ್ ಅಯಿಂಗಡ ದೇವನಾಯಿತ್‌ಪ್ಪ.

ಪ್ರಕಟನೆ 3:21

ನಾನ್ ಗೆದ್ದಿತ್ ನಾಡ ಅಪ್ಪಂಡ ಸಿಂಹಾಸನತ್‍ಲ್ ಅಳ್‍ತಂಡುಳ್ಳನೆಕೆ, ದಾರ್ ಗೆಲ್ಲುವ ಅಂವೊನು ಸಹ ನಾಡ ಸಿಂಹಾಸನತ್‍ಲ್ ಅಳ್‌ಪಕ್ ನಾನ್ ಅದಿಕಾರ ತಪ್ಪಿ.