ರೋಮ್ 2:8 - ಕೊಡವ ಬೈಬಲ್

⁸ ಆಚೇಂಗಿ, ಅಯಿಂಗಕಾಯಿತೇ ಬದ್‍ಕಿಯಂಡ್, ಸತ್ಯತ್‍ರನೆಕೆ ಮಾಡತೆ, ಅನ್ಯಾಯ ಮಾಡಿಯಂಡುಳ್ಳಯಿಂಗಡ ಮೇಲೆ ದೇವಡ ಚೆಡಿಯು, ಬಲ್ಯ ಚೆಡಿಯು ಬಪ್ಪ.

ರೋಮ್ 2:8 ပူးပေါင်းရင်းမြစ်များ

ಜ್ಞಾನತ್‌ರ ಪಡಿಮ 11:23

ನೀತಿವಂತಯಿಂಗಡ ಆಸೆಯೆಲ್ಲ ನಲ್ಲದೇ ಆಯಿತಿಪ್ಪ, ಆಚೇಂಗಿ ದುಷ್ಟಂಗಡ ನಿರೀಕ್ಷೆ ಬಲ್ಯ ಚೆಡಿರ ದಂಡನೆಕ್‌ ಕೊಂಡಪೋಪ.

ಜ್ಞಾನತ್‌ರ ಪಡಿಮ 13:10

ಆಂಗಾರ ಮಾತ್‌ರ ಜಗಳಕ್‌ ಕಾರಣ ಆಪ. ಆಲೋಚನೆಕ್‌ ಕೆಮಿ ಕೊಡ್‌ಪಂವೊಂಡ ಪಕ್ಕ ಜ್ಞಾನ ಇಪ್ಪ.

ರೋಮ್ 1:18

ಸತ್ಯತ್‍ನ ಅನ್ಯಾತ್‌ಲ್‌ ಪುಡ್‌ಚಿತ್ ಬೆಪ್ಪ ಮನುಷ್ಯಂಡ ಎಲ್ಲಾ ತರ ಬಕ್ತಿಯಿಲ್ಲತ ಕಾರ್ಯಕು ಪಿಂಞ ಅನ್ಯಾಯಕು ವಿರೋದವಾಯಿತ್, ದೇವಡ ಚೆಡಿನ ಪರಲೋಕತ್ಂಜ ದೇವ ಕಾಂಬ್‍ಚಿಟ್ಟಂಡುಂಡ್.

ರೋಮ್ 10:16

ಆಚೇಂಗಿಯು ಎಲ್ಲಾರು ದೇವಡ ನಲ್ಲ ಸುದ್ದಿಕ್ ಬಗ್ಗಿಚಿಟ್ಟಿತ್‌ಲ್ಲೆ. ಅದ್ಂಡ ವಿಷಯತ್ ಯೆಶಾಯ ಪ್ರವಾದಿ: ಒಡೆಯನೇ, ನಂಗಡ ಮೂಲಕ ಕ್‍ೕಟದ್‍ನ ನಂಬ್‍ನಯಿಂಗ ದಾರ್‍ೕಂದ್ ಎಣ್ಣಿಯಂಡುಂಡ್.

ರೋಮ್ 15:18

ಯೆಹೂದ್ಯಂಗ ಅಲ್ಲತಯಿಂಗಳ ನಾಡ ತಕ್ಕ್ ಪಿಂಞ ನಾಡಗುಂಡ್ ದೇವ ಮಾಡ್‍ನ ಕ್ರಿಯೆರ ಶಕ್ತಿರ ಮೂಲಕ ಅಂವೊಂಗ್ ತಗ್ಗಿತ್ ನಡ್‍ಪನೆಕೆ ಮಾಡಿತ್, ದೇವಡ ಆತ್ಮತ್‍ರ ಶಕ್ತಿರಗುಂಡ್ ಮಾಡ್‍ನ ಗುರ್‌ತ್ ಪಿಂಞ ಆಶ್ಚರ್ಯ ಕಾರ್ಯ ಅಲ್ಲತೆ ಬೋರೆ ಒರ್ ವಿಷಯತ್‍ನ ಎಣ್ಣ್‌ವಕ್ ನಾಕ್ ದೈರ್ಯ ಇಲ್ಲೆ.

ರೋಮ್ 6:17

ಮಿಂಞ ನಿಂಗ ಪಾಪತ್‍ರ ಅಡಿಯಾಳಾಯಿತ್ಂಜಿರ, ಇಕ್ಕ ನಿಂಗ, ನಿಂಗಕ್ ಒಪ್ಪ್‌ಚಿಟ್ಟ ಬೋದನೆನ ಪೂರ್ತಿ ಮನಸ್ಸ್‌ಲ್ ಸ್ವೀಕಾರ ಮಾಡ್‍ನಗುಂಡ್ ದೇವಕ್ ವಂದನೆ ಎಣ್ಣಿಯಂಡುಂಡ್.

ರೋಮ್ 9:22

ಆಚೇಂಗಿ, ದೇವ ಅಂವೊಂಡ ಚೆಡಿನ ಕಾಂಬಿಚಿಡುವಕ್, ತಾಂಡ ಶಕ್ತಿನ ಕಾಟ್‌ವಕಾಯಿತ್ ಯೆಹೂದ್ಯಂಗಡಲ್ಲಿ ಮಾತ್ರ ಅಲ್ಲತೆ, ಯೆಹೂದ್ಯ ಅಲ್ಲತಯಿಂಗಡ ಮದ್ಯತ್ಂಜ ಸಹ ನಂಗಳ ಕಾಕ್‍ಚಿ.

1 ಕೊರಿಂಥ 11:16

ಆಚೇಂಗಿ, ಒಬ್ಬಂಗ್ ಈ ವಿಷಯತ್‍ಲ್ ತರ್ಕ ಮಾಡ್‌ವಕ್ ಮನಸ್ಸ್ ಇಂಜತೇಂಗಿ, ನಂಗಕ್ ಪಿಂಞ ದೇವಡ ಸಬೇಕ್, ಈ ತರ ಅಬ್ಯಾಸ ಇಲ್ಲೇಂದ್ ಅಯಿಂಗಕ್ ಗೊತ್ತಿರಡ್.

2 ಕೊರಿಂಥ 12:20

ನಾನ್ ಬಪ್ಪಕ, ನಿಂಗ ಎನ್ನನೆ ಇಕ್ಕಂಡೂಂದ್ ನಾನ್ ಗೇನ ಮಾಡಿಯಂಡ್ ಉಂಡೋ ಅನ್ನನೆ ನಿಂಗ ಇಪ್ಪುಲೇಂದು ಪಿಂಞ ನಿಂಗ ಗೇನ ಮಾಡಿಯಂಡುಳ್ಳನೆಕೆ ನಾನ್ ಇಪ್ಪುಲೆಯೋಂದು ನಾಕ್ ಪೋಡಿ ಉಂಡ್. ನಿಂಗಡ ಮದ್ಯತ್‍ಲ್ ಪಗೆ, ವೈರಾಗ್ಯ, ಚೆಡಿ, ತರ್ಕ, ಒಟ್ಟೆಕಿಚ್ಚ್, ಒಬ್ಬಂಡ ಮೇಲೆ ಒಬ್ಬ ಕುತ್ತ ಪರಿವದ್, ಬೋಂಡತ ವೈರಾಗ್ಯ, ಕಲಹ ಇನ್ನತಾನೆಲ್ಲ ಇಪ್ಪಾಂದ್ ನಾಕ್ ಪೋಡಿ ಆಯಂಡುಂಡ್.

ಗಲಾತ್ಯ 5:20

ವಿಗ್ರಹ ಆರಾದನೆ, ಮಾಟ, ವಿರೋದ, ಪಗೆ, ವೈರಾಗ್ಯ, ಚೆಡಿ, ಬಡಾಯಿ, ವಿಂಗಡ, ಗುಂಪ್ ಮಾಡ್‍ವದ್, ಬೋರೆ ಬೋರೆ ಮಾಡ್‍ವದ್,

ಫಿಲಿಪ್ಪಿ 1:17

ಆಚೇಂಗಿ ಚೆನ್ನ ಜನ ನಾಕ್ ಇಂಞು ಕಷ್ಟ ಆಡ್‍ೕಂದ್ ನಲ್ಲ ಮನಸ್ಸ್‌ಲ್ ಕ್ರಿಸ್ತನ ಬೋದನೆ ಮಾಡತೆ, ಅಯಿಂಗಕ್ ಲಾಬ ಆಪನೆಕೆ ಕೆಟ್ಟ ಮನಸ್ಸ್‌ಲ್ ಬೋದನೆ ಮಾಡಿಯಂಡುಂಡ್.

ಫಿಲಿಪ್ಪಿ 2:3

ನಿಂಗ ಮಾತ್ರ ಬಲ್ಯಯಿಂಗಾಂದ್ ಗೇನ ಮಾಡತಿ, ನಿಂಗಳ ತಗ್ಗ್‌ಚಿಟ್ಟಂಡ್ ಬೋರೆಯಿಂಗ ನಿಂಗಕಿಂಜ ಬಲ್ಯಯಿಂಗಾಂದ್ ಗೇನ ಮಾಡಿ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:9

ಬುದ್ದಿಯಿಲ್ಲತ ತರ್ಕ, ವಂಶಾವಳಿರ ವಿಷಯತ್‍ರ ತರ್ಕ, ಜಗಳ ಮಾಡ್‍ವದ್ ಪಿಂಞ ನ್ಯಾಯಪ್ರಮಾಣಕ್ ಒಳಪಡಂಡೂಂದ್ ಎಣ್ಣುವ ವಿಷಯತ್‍ರ ಚರ್ಚೆನೆಲ್ಲ ನಿಪ್ಪ್‌ಚಿಡ್. ಇನ್ನನೆ ಮಾಡ್‌ವಗುಂಡ್ ಒರ್ ಪ್ರಯೋಜನ ಇಲ್ಲತದು ಒರ್ ನಲ್ಲದ್ ಮಾಡ್‌ವಕ್ ಕಯ್ಯತದು ಆಯಿತುಂಡ್.

ಇಬ್ರಿಯ 10:27

ಆನಗುಂಡ್, ದೇವಡ ನ್ಯಾಯತೀರ್ಪ್ ಬಪ್ಪಾಂದ್ ಪೋಡಿಲ್ ನೋಟಿಯಂಡ್ ಮಾತ್ರ ಬದ್‍ಕಂಡು. ಅಯಿಂಗಕ್, ವಿರೋದಿಯಳ ಕತ್ತ್‌ಚಿಡುವ ದೇವಡ ಚೆಡಿರ ತಿತ್ತ್ ಉಂಡ್‍ೕಂದ್ ಗೊತ್ತಿರಡ್.

ಇಬ್ರಿಯ 11:8

ನಂಬಿಕೇರ ಮೂಲಕ, ಅಬ್ರಹಾಮ ತಾಂಗ್ ಬಾದ್ಯತೆಯಾಯಿತ್ ಕ್‍ಟ್ಟ್‌ವಕುಳ್ಳ ಜಾಗಕ್ ಪೋಪಕ್ ದೇವ ಕಾಕ್‍ವಕ, ತಗ್ಗಿತ್, ತಾನ್ ಎಲ್ಲಿ ಪೋಯಂಡುಳ್ಳ್‌ಂದ್ ಗೊತ್ತಿಲ್ಲತೆ ಪೊರಟಿತ್ ಪೋಚಿ.

ಇಬ್ರಿಯ 5:9

ಅಂವೊನ ದೇವ ಪರಿಪೂರ್ಣ ಮಾಡ್‍ನ ಪಿಂಞ, ಒರ್ ಮಾಹಾ ಯಾಜಕನಾಯಿತ್, ಅಂವೊಂಗ್ ತಗ್ಗಿತ್ ನಡ್‍ಪಯಿಂಗ ಎಲ್ಲಾರ್‌ಕು ನಿತ್ಯ ರಕ್ಷಣೆನ ತಪ್ಪಕುಳ್ಳಂವೊನಾಯಿತ್ ಆಚಿ.

ಯಾಕೋಬ 3:14

ಆಚೇಂಗಿ ನಿಂಗಡ ಹೃದಯತ್‍ಲ್ ನಿಂಗ ಕೆಟ್ಟದ್ ಮಾಡಂಡೂಂದ್ ಗೇನ ಮಾಡಿಯಂಡ್ ಒಟ್ಟೆಕಿಚ್ಚ್‌ಪಟ್ಟಂಡ್, ನಿಂಗ ಬುದ್ದಿವಂತಂಗಾಂದ್ ಕಳಿಕತಿ, ಅದ್ ಎಲ್ಲಾಕಿಂಜಿ ಬಲ್ಯ ಪೊಟ್ಟ್.

ಯಾಕೋಬ 3:16

ಎಕ್ಕ ಜನಕ್ ಒಟ್ಟೆಕಿಚ್ಚ್ ಪಿಂಞ ಸ್ವಾರ್ತತೆ ಇಪ್ಪ, ಅಕ್ಕ ಅಯಿಂಗ ಮೋಸ ಪಿಂಞ ಕಲಹ ಮಾಡ್‌ವ.

1 ಪೇತ್ರ 3:1

ಅನ್ನನೆ, ಪೊಣ್ಣಾಳುವಳೇ, ನಿಂಗ ನಿಂಗಡ ಸ್ವಂತ ವಡಿಯಂಗಡ ಪಕ್ಕ ಅಡಕತ್‍ಲ್ ಇರಂಡು. ಅಕ್ಕ, ಅಯಿಂಗಡಲ್ಲಿ, ದಾರೇಂಗಿಯು ದೇವಡ ವಾಕ್ಯತ್‍ನ ನಂಬತಯಿಂಗಳಾಯಿತ್ ಇಂಜತೇಂಗಿ, ನಿಂಗಡ ತಕ್ಕ್‌ರಗುಂಡ್ ಅಲ್ಲ, ನಿಂಗಡ ಗುಣತ್‍ರಗುಂಡ್,

1 ಪೇತ್ರ 4:17

ದೇವಡ ನ್ಯಾಯತೀರ್ಪ್ ಅಂವೊಂಡ ಮಕ್ಕಡಲ್ಲಿಯೇ ಸುರು ಆಪಕುಳ್ಳ ಸಮಯವಾಯಿತುಂಡ್; ಅದ್ ನಂಗಡಲ್ಲಿಯೇ ಸುರು ಆಚೇಂಗಿ, ದೇವಡ ನಲ್ಲ ಸುದ್ದಿಕ್ ಕೆಮಿ ಕೊಡ್‌ಕತಯಿಂಗಡ ಸ್ತಿತಿ ಎನ್ನನೆ ಆಯಿತ್‌ಪ್ಪ?

ಪ್ರಕಟನೆ 14:10

ದೇವಡ ಬಲ್ಯ ಚೆಡಿರ ಪಾತ್ರತ್‍ಲ್ ಏದು ಕಲ್‍ಕ್‍ತ ದೇವಡ ಗಟ್ಟಿಯಾನ ಬಲ್ಯ ಚೆಡಿರ ಕಳ್ಳ್‌ನ ಕುಡಿಚಿತ್, ಪವಿತ್ರವಾನ ದೂತಂಗಡ ಮಿಂಞತ್, ಕೊರಿಕುಟ್ಟಿಯಾನವೊಂಡ ಮಿಂಞತ್ ತಿತ್ತ್‌ರ ಜ್ವಾಲತ್‌ರಗುಂಡ್ ಗಂಧಕತ್‍ರಗುಂಡ್ ಕಷ್ಟಪಟ್ಟಂಡ್ ಇಪ್ಪ.

ಪ್ರಕಟನೆ 16:19

ಅಕ್ಕ, ಮಹಾ ಪಟ್ಟಣ ಮೂಂದ್ ಬಾಗವಾಯಿತ್ ಒಡಂದತ್, ದೇವಡ ಮಕ್ಕ ಅಲ್ಲತಯಿಂಗಡ ಪಟ್ಟಣವೆಲ್ಲ ಬುದ್ದತ್. ದೇವಡ ಬಲ್ಯ ಚೆಡಿರ ಕಳ್ಳ್ ದುಂಬ್‍ನ ಪಾತ್ರತ್‍ನ, ಮಹಾ ಬಾಬೆಲಂಗ್ ಕೊಡ್‍ಪಕ್ ದೇವಡ ಗೇನಕ್ ಕೊಂಡ್ ಬಾತ್.