ರೋಮ್ 16:17 - ಕೊಡವ ಬೈಬಲ್

¹⁷ ಅದಲ್ಲತೆ, ನಾಡ ಅಣ್ಣತಮ್ಮಣಂಗಳೇ, ನಿಂಗ ಪಡಿಚಿತುಳ್ಳ ಬೋದನೆಕ್ ವಿರೋದವಾಯಿತ್ ವಿಂಗಡ ಮಾಡ್‌ವಯಿಂಗಡ ಕೂಡೆಯು ಪಿಂಞ ಬೊಳ್‍ತ್‍ವಕ್ ತಡೆ ಮಾಡ್‌ವಯಿಂಗಡ ಕೂಡೆಯು ಎಚ್ಚರತ್‍ಲ್ ಇರೀಂದ್ ನಿಂಗಳ ಬೋಡುವಿ. ಅಯಿಂಗಳ ದೂರ ಮಾಡಂಡೂಂದ್ ನಿಂಗಳ ಬೋಡುವಿ.

ರೋಮ್ 16:17 ပူးပေါင်းရင်းမြစ်များ

ಮತ್ತಾಯ 18:17

ಅಯಿಂಗಕ್ ಸಹ ಅಂವೊ ಒತ್ತತೆ ಪೋನಕ, ಅಂವೊಂಡ ವಿಷಯತ್‍ನ ಸಬೇಕ್ ಎಣ್ಣ್. ಆ ಸಬೇಕ್ ಒತ್ತತೆ ಪೋನಕ, ಅಂವೊನ ದೇವನ ನಂಬತಂವೊಂಡನೆಕೆ ಕಾಂಗಂಡು, ಅಥವ ಒರ್ ಪಾಪಿರನೆಕೆ ನೋಟಂಡು.

ಮತ್ತಾಯ 18:7

ನಾಡ ಮೇಲೆ ನಂಬಿಕೆ ಬೆಕ್ಕತನೆಕೆ ಮಾಡ್‌ವಯಿಂಗಕ್ ಅಯ್ಯೋ! ಅನ್ನನೆ ಬಪ್ಪ ಸೋದನೆನ ದಾರೂ ತಡ್‍ಪಕ್ ಕಯ್ಯುಲೆ. ಆಚೇಂಗಿ ಅನ್ನನೆ ಮಾಡ್‌ವಯಿಂಗಕ್ ಅಯ್ಯೋ!

ಮತ್ತಾಯ 7:15

ಕಳ್ಳ ಪ್ರವಾದಿಯಂಗಡ ವಿಷಯತ್ ಎಚ್ಚರತ್‍ಲ್ ಇರಿ. ಅಯಿಂಗ ಪೊರಮೆ ಸಾದು ಕೊರಿರನೆಕೆ ವೇಷ ಇಟ್ಟಂಡ್ ಬಪ್ಪ. ಆಚೇಂಗಿ, ಹೃದಯತ್‍ಲ್ ಅಯಿಂಗ, ಕೀತ್‍ವ ತೋಳರನೆಕೆ ಇಪ್ಪ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 17:1

ಪಿಂಞ ಯೇಸು ಅಂವೊಂಡ ಶಿಷ್ಯಂಗಳ ನೋಟಿತ್, ಈ ಲೋಕತ್‍ಲ್ ಪಾಪ ಮಾಡ್‌ವಕ್ ಸೋದನೆ ಎಕ್ಕಾಲು ಬಪ್ಪ. ಆಚೇಂಗಿ ಬೋರೆಯಿಂಗಳ ಪಾಪ ಮಾಡ್‌ವನೆಕೆ ನಡ್‍ತ್‍ವ ಜನಕ್ ಅಯ್ಯೋ.

ಅಪೊಸ್ತಲ 15:24

ನಂಗ ಅಪ್ಪಣೆ ಕೊಡ್‌ತಿತ್ ಅಯಿಕತ ಚೆನ್ನ ಜನ ನಂಗಡ ಕಡೇಯಿಂಜ ನಿಂಗಡ ಪಕ್ಕ ಬಂದಿತ್, ನಿಂಗಡ ಮನಸ್ಸ್‌ನ ಗಲಿಬಿಲಿ ಮಾಡ್‌ಚೀಂದ್ ನಂಗಕ್ ಗೊತ್ತಾಚಿ.

1 ಕೊರಿಂಥ 11:18

ಮುಕ್ಯವಾಯಿತ್, ದೇವಡ ಸಬೇಲ್ ನಿಂಗ ಕೂಡಿ ಬಪ್ಪಕ, ನಿಂಗಡಡೆಲ್ ಬೋರೆ ಬೋರೆ ಗುಂಪ್ ಉಂಡ್‍ೕಂದ್ ನಾಕ್ ಸುದ್ದಿ ಬಾತ್; ಅದ್‍ಲ್ ನಾನ್ ಚೆನ್ನ ವಿಷಯತ್‍ನ ನಂಬುವಿ.

1 ಕೊರಿಂಥ 3:3

ನಿಂಗಡ ಪಕ್ಕ ಒಟ್ಟೆಕಿಚ್ಚ್ ಉಂಡ್, ಬೋರೆಯಿಂಗಡ ಕೂಡೆ ಜಗಳ ಮಾಡ್‌ವಿರ. ಇದೆಲ್ಲಾನ ನಿಂಗಡ ಪಾಪತ್‍ರ ಗುಣತ್‍ನಗುಂಡ್ ಈ ಲೋಕತ್‍ರ ಜನತ್‍ರನೆಕೆ ಮಾಡಿಯಂಡುಳ್ಳಿರಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ?

ಗಲಾತ್ಯ 2:4

ಆಚೇಂಗಿ, ಈ ವಿಷಯತ್‍ಲ್ ಯೇಸುನ ನಂಬ್‍ನಯಿಂಗಾಂದ್ ಎಣ್ಣುವ ಚೆನ್ನ ಕಳ್ಳಂಗ ತರ್ಕ ಮಾಡ್‍ಚಿ. ಅಯಿಂಗ ದಾರ್ ಎಣ್ಣ್‌ಚೇಂಗಿ; ದಾರ್‌ಕು ಗೊತ್ತಿಲ್ಲತೆ ನಂಗಡ ಒಳ್‍ಕ್ ಕೂಡ್‍ನ ಅಣ್ಣತಮ್ಮಣಂಗಳೇ. ಯೇಸು ಕ್ರಿಸ್ತನಗುಂಡ್ ನಂಗಕುಳ್ಳ ಸ್ವಾತಂತ್ರತ್‍ನ, ನಂಗಡಿಂಜ ಎಡ್‍ಪಕ್ ನೋಟಿತ್, ಯೆಹೂದ್ಯಂಗಡ ನ್ಯಾಯಪ್ರಮಾಣಕ್ ಅಡಿಯಾಳ್‌ರನೆಕೆ ನಂಗ ಇರಂಡೂಂದ್ ಅಯಿಂಗ ಒತ್ತಾಯ ಮಾಡ್‍ಚಿ.

ಫಿಲಿಪ್ಪಿ 3:17

ನಾಡ ಅಣ್ಣತಮ್ಮಣಂಗಳೇ, ನಾನ್ ಎನ್ನನೆ ಬದ್‍ಕಿಯಂಡುಂಡೋ ಅನ್ನನೆ ನಿಂಗಳು ಬದ್‍ಕ್‍ವಿರ. ನಾನ್ ನಿಂಗಕ್ ಎಣ್ಣಿತಂದನೆಕೆ ಬದ್‍ಕಿಯಂಡುಳ್ಳಯಿಂಗಡ ಬದ್‍ಕ್‍ನ ಚಾಯಿ ನೋಟಿತ್, ನಿಂಗ ಬದ್‍ಕ್‍ವಿರ.

ಕೊಲೊಸ್ಸೆ 2:8

ಈ ಒಂದು ಇಲ್ಲತ ವಂಚನೆ ಮಾಡ್‌ವ ಶಾಸ್ತ್ರತ್‍ರ ಮೂಲಕ ಪಿಂಞ ಈ ಲೋಕತ್‍ರ ಆತ್ಮೀಯ ಅದಿಕಾರತ್ಂಜ ದಾರೂ ನಿಂಗಳ ಚಿಕ್ಕಿಚಿಡತೆ ಇಪ್ಪಕ್, ಎಚ್ಚರತ್‍ಲ್ ಇರಿ. ಅದೆಲ್ಲಾ, ಪ್ರಯೋಜನ ಇಲ್ಲತ ವಂಚನೆ ಮಾಡ್‌ವ ಮನುಷ್ಯಂಗಡ ಪದ್ದತಿಯು, ಈ ಲೋಕತ್‍ರ ಪದ್ದತಿರ ಜ್ಞಾನವು ಅಲ್ಲತೆ ಕ್ರಿಸ್ತಂಡಿಂಜ ಬಪ್ಪ ಜ್ಞಾನ ಅಲ್ಲ.

2 ಥೆಸಲೊನೀಕ 3:6

ನಂಗಡ ಅಣ್ಣತಮ್ಮಣಂಗಳೇ, ಸೋಮಾರಿಯಾಯಿತ್ ಬದ್‍ಕಿಯಂಡ್, ನಂಗ ನಿಂಗಕ್ ಎಣ್ಣ್‌ನ ಪದ್ದತಿರ ಪ್ರಕಾರ ನಡ್‌ಂದಂಡಿಲ್ಲತ ಯೇಸುನ ನಂಬ್‍ನಯಿಂಗಳ ದೂರಮಾಡಿತ್ ಬೆಕ್ಕಂಡೂಂದ್ ಒಡೆಯನಾನ ಯೇಸು ಕ್ರಿಸ್ತ ನಂಗಕ್ ತಂದಿತುಳ್ಳ ಅದಿಕಾರತ್‍ಲ್ ನಂಗ ನಿಂಗಕ್ ಆಜ್ಞೆ ಮಾಡ್‌ವ.

1 ತಿಮೊಥೆಯ 1:3

ನಾನ್ ಮಕೆದೋನ್ಯಕ್ ಪೋಯಂಡಿಪ್ಪಕ, ನೀನ್ ಎಫೆಸತ್‍ಲ್ ಇಪ್ಪಂಜಿ, ಕಳ್ಳ ಬೋದನೆ ಮಾಡ್‌ವಯಿಂಗ ಇಂಞು ಮಿಂಞಕ್ ಅದ್‍ನ ಮಾಡತನೆಕೆ ನೀನ್ ಅಯಿಂಗಳ ಎಚ್ಚರ ಮಾಡಂಡೂಂದ್ ನಾನ್ ನೀಕ್ ಒತ್ತಾಯ ಮಾಡ್‍ನ.

2 ತಿಮೊಥೆಯ 3:5

ದೇವಡ ಮೇಲೆ ಬಕ್ತಿ ಉಳ್ಳಯಿಂಗಡನೆಕೆ ವೇಷ ಇಡ್‌ವ, ಆಚೇಂಗಿ, ದೇವಡ ಶಕ್ತಿನ ಅಯಿಂಗಡ ಒಳ್‍ಲ್ ಕ್ರಿಯೆ ಮಾಡ್‌ವಕ್ ಬುಡುಲೆ. ಈಂಗಳ ಬುಟ್ಟಿತ್ ನೀನ್ ದೂರ ಇರ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:10

ಕಳ್ಳ ಬೋದನೆ ಮಾಡಿತ್, ದೇವಡ ಮಕ್ಕಳ ಬೋರೆ ಬೋರೆ ಮಾಡ್‌ವಯಿಂಗಕ್, ಒರು ಕುರಿ ಅಥವ ದಂಡ್ ಕುರಿ ಎಚ್ಚರ ಮಾಡ್. ಅದ್ಂಗ್ ಅಯಿಂಗ ಕೆಮಿ ಕೊಡ್‍ಕತೆ ಪೋನಕ, ಅಯಿಂಗಳ ತಿರಸ್ಕಾರ ಮಾಡ್.

1 ಯೋಹಾನ 2:19

ಈ ಜನ ನಂಗಡ ಕೂಡೆ ಐಕ್ಯ ಉಳ್ಳಯಿಂಗಳಾಯಿತ್ ಇಂಜಿತಿಲ್ಲೆ, ಅದ್ಂಗೇ ಅಯಿಂಗ ನಂಗಳ ಬುಟ್ಟಿತ್ ಪೋಚಿ. ಅಯಿಂಗ ನಂಗಡ ಜನಾಂಗಾಯಿತ್ ಇಂಜಿತೇಂಗಿ ಅಯಿಂಗ ನಂಗಡ ಕೂಡೆ ಇಪ್ಪಕಿಂಜತ್. ಆಚೇಂಗಿ ಅಯಿಂಗ ನಂಗಳ ಬುಟ್ಟಿತ್ ಪೋನಗುಂಡ್, ಒಬ್ಬ ಕೂಡೆ ನಂಗಡ ಜನ ಇಲ್ಲೇಂದ್ ಗೊತ್ತಾಚಿ.

ಯೂದ ಒಳ್‍ದ್‍ನ ಕಾಗದ 1:19

ಈಂಗ ನಿಂಗಡಡೆಲ್ ಉಳ್ಳ ಜನಳ ಬೋರೆ ಬೋರೆ ಮಾಡಿತ್, ಅಯಿಂಗ ಅಯಿಂಗಡ ಸ್ವಂತ ಬುದ್ದಿರನೆಕೆ ಅಯಿಂಗಳ ನಡ್‍ತಿಯಂಡ್ ಪೋಯಂಡ್ ಪಿಂಞ ಪವಿತ್ರಾತ್ಮ ಇಲ್ಲತಯಿಂಗಳಾಯಿತ್ ಇಪ್ಪ.