ಪ್ರಕಟನೆ 7:17 - ಕೊಡವ ಬೈಬಲ್

¹⁷ ಸಿಂಹಾಸನತ್‍ರ ಮದ್ಯತ್‍ಲ್ ಉಳ್ಳ ಕೊರಿಕುಟ್ಟಯಾನಂವೊನೇ ಈಂಗಳ ಚಾಕಿತ್, ಅಯಿಂಗಳ ಜೀವತ್‍ರ ಜಲ ಉಕ್ಕಿ ಬಪ್ಪ ಜಾಗಕ್ ಕಾಕಿಯಂಡ್ ಪೋಪ; ದೇವ ತಾನೆ ಅಯಿಂಗಡ ಕಣ್ಣ್‌ಂಜ ಕಣ್ಣೀರ್‌ನೆಲ್ಲಾ ತ್‍ೕಟ್‍ವಾಂದ್ ಎಣ್ಣ್‌ಚಿ.

ಪ್ರಕಟನೆ 7:17 ပူးပေါင်းရင်းမြစ်များ

ಮತ್ತಾಯ 2:6

ಯೂದಾಯ ಪ್ರಾಂತ್ಯತ್‍ರ ಬೇತ್ಲೆಹೇಮೇ, ಯೆಹೂದ್ಯಂಡ ಅದಿಕಾರತ್ ನೀ ಚೆರಿಯದಲ್ಲ; ನಾಡ ಇಸ್ರಾಯೇಲ್ ಜನಳ ಆಳುವ ಅದಿಪತಿ ನೀಡಗುಂಡ್ ಪುಟ್ಟ್‌ವಾಂದ್ ಪ್ರಾವಾದಿಯ ಒಳ್‍ದಿತುಂಡ್‍ೕಂದ್ ಎಣ್ಣ್‌ಚಿ.

ಮತ್ತಾಯ 5:4

ದುಃಖ ಪಟ್ಟಂಡುಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ದೇವ ಅಯಿಂಗಳ ಸಮಾದಾನ ಮಾಡ್‌ವ.

ಯೋಹಾನ 10:11

ನಾನೇ ನಲ್ಲ ಕೊರಿ ಕಾಪಂವೊ; ನಲ್ಲ ಕೊರಿ ಕಾಪಂವೊ, ತಾಂಡ ಕೊರಿನ ಕಾಪಾಡ್‌ವಕಾಯಿತ್ ತಾಂಡ ಜೀವತ್‍ನ ಸಹ ತಪ್ಪ.

ಯೋಹಾನ 10:14

ನಾನೇ ನಲ್ಲ ಕೊರಿ ಕಾಪಂವೊ; ನಾಡ ಅಪ್ಪಂಗ್ ನನ್ನ ಚಾಯಿತೆ ಗೊತ್ತುಳ್ಳನೆಕೆ ಪಿಂಞ ನಾಕ್ ನಾಡ ಅಪ್ಪನ ಚಾಯಿತೆ ಗೊತ್ತುಳ್ಳನೆಕೆ, ನಾಕ್ ನಾಡ ಕೊರಿಯಳ ಚಾಯಿ ಗೊತ್ತುಂಡ್, ನಾಡ ಕೊರಿಯಕೂ ನನ್ನ ಚಾಯಿತೆ ಗೊತ್ತುಂಡ್.

ಯೋಹಾನ 4:10

ಅಕ್ಕ ಯೇಸು ಅವಕ್: ದೇವಡ ದಾನ ನೀಕ್ ಗೊತ್ತಾಯಿತ್, ನಾಕ್ ಕುಡಿಪಕ್ ನೀರ್ ತಾಂದ್ ಕ್‍ೕಟಂವೊ ದಾರ್‍ೕಂದ್ ನೀಕ್ ಗೊತ್ತ್‌ಂಜತೇಂಗಿ, ನೀನೇ ಅಂವೊಂಡ ಪಕ್ಕ ಕ್‍ೕಟಿತ್‌ಪ್ಪಿಯ, ಅಂವೊ ನೀಕ್ ಜೀವತ್‍ರ ನೀರ್‌ನ ಕೊಡ್‍ತಿತ್‌ಪ್ಪಾಂದ್ ಎಣ್ಣ್‌ಚಿ.

ಯೋಹಾನ 4:11

ಅದ್ಂಗ್ ಆ ಪೊಣ್ಣಾಳ್: ಒಡೆಯನೇ, ನೀರ್ ಬಲಿಪಕ್ ನೀಡ ಪಕ್ಕ ಒಂದು ಇಲ್ಲೆ, ಕಣತೆರೆಯು ದುಂಬ ಆಳವಾಯಿತ್ ಉಂಡಲ್ಲ, ಪಿಂಞ ಎಲ್ಲಿಂಜ, ನೀಕ್ ಜೀವತ್‍ರ ನೀರ್ ಕ್‍ಟ್ಟುವ?

ಯೋಹಾನ 4:14

ಆಚೇಂಗಿ, ನಾನ್ ತಪ್ಪ ನೀರ್‌ನ ಕುಡಿಪಯಿಂಗಕ್ ಒರ್‌ಕಾಲು ಬಾಯಾರಿಕೆ ಆಪುಲೆ; ನಾನ್ ಅಯಿಂಗಕ್ ಕೊಡ್‍ಪ ನೀರ್ ಅಯಿಂಗಡ ಹೃದಯತ್‍ಲ್ ನಿತ್ಯ ಜೀವಕಾಯಿತ್ ಉಕ್ಕಿ ಬಂದಂಡಿಪ್ಪ ಜಲವಾಯಿತ್‌ಪ್ಪಾಂದ್ ಎಣ್ಣ್‌ಚಿ.

ಅಪೊಸ್ತಲ 20:28

ಆನಗುಂಡ್, ನಿಂಗಡ ವಿಷಯತ್‍ಲ್ ಪಿಂಞ ದೇವ ತಾಂಡ ಸ್ವಂತ ಚೋರೆಯಿಂಜ ಸಂಪಾದನೆ ಮಾಡ್‍ನ, ಸಬೇನ ನಡ್‍ತುವ ವಿಷಯತ್‍ಲು ಎಚ್ಚರತ್‍ಲ್ ಇರಿ. ಪವಿತ್ರಾತ್ಮ, ಅಂವೊಂಡ ಕೊರಿರ ಗುಂಪ್‍ರನೆಕೆ ಉಳ್ಳ ಸಬೆರ ಜನಕ್ ಸಬೆರ ಪೆರಿಯಯಿಂಗಳಾಯಿತ್ ನಿಂಗಳ ನೇಮಿಚಿಟ್ಟತ್.

1 ಪೇತ್ರ 5:2

ನಿಂಗಡಲ್ಲಿ ಉಳ್ಳ ದೇವಡ ಮಕ್ಕಳ ನಿಂಗ ಚಾಯಿತೆ ಒರ್ ಕೊರಿ ಗುಂಪ್‍ನ ನೋಟ್‍ವನೆಕೆ ಪೆರಿಯಯಿಂಗಡ ಸೇವೇನ ಮಾಡಂಡು. ಒತ್ತಾಯತ್‌ಲ್ ಅಲ್ಲ, ದೇವ ಕುಶಿಪಡ್‌ವನೆಕೆ ಮನಪೂರ್ವವಾಯಿತ್ ಪಿಂಞ ಕೆಟ್ಟ ಆದಾಯಕಾಯಿತ್ ಅಲ್ಲ, ಪುರ್‌ಡುಳ್ಳ ಮನಸ್ಸ್‌ಲ್ ಮಾಡಂಡು.

ಪ್ರಕಟನೆ 14:4

ಈಂಗಳೇ ಪೊಣ್ಣಾಳ್‍ರಗುಂಡ್ ಅಶುದ್ದ ಆಕತ, ಕನ್ನಿ ಮೂಡಿಯರನೆಕೆ ಶುದ್ದವಾಯಿತ್ ಇಂಜಯಿಂಗ. ಕೊರಿಕುಟ್ಟಿಯಾನಂವೊ ಎಲ್ಲಿಯೆಲ್ಲಾ ಪೋಪ, ಅಂವೊಂಡ ಬಯ್ಯಕ್ ಪೋಪಯಿಂಗ ಈಂಗಳೇ. ಅಯಿಂಗ ಜನಡ ಮದ್ಯತ್ಂಜ ದೇವಕಾಯಿತ್ ಪಿಂಞ ಕೊರಿಕುಟ್ಟಿಯಾನವೊಂಗಾಯಿತ್ ಆದ್ಯ ಪಣ್ಣಾಯಿತ್ ವಿಮೋಚನ ಆನಯಿಂಗ.

ಪ್ರಕಟನೆ 21:22

ಆ ಪಟ್ಟಣತ್‍ಲ್ ನಾನ್ ದೇವಾಲಯತ್‍ನ ಕಂಡಿತ್‌ಲ್ಲೆ, ಎನ್ನಂಗೆಣ್ಣ್‌ಚೇಂಗಿ, ಸರ್ವ ಶಕ್ತಿವಂತಂವೊನಾಯಿತುಳ್ಳ ದೇವ ಪಿಂಞ ಕೊರಿಕುಟ್ಟಿಯಾಯಿತುಳ್ಳಂವೊನೇ ಅದ್ಂಗ್ ದೇವಾಲಯವಾಯಿತ್ಂಜತ್.

ಪ್ರಕಟನೆ 21:23

ಆ ಪಟ್ಟಣಕ್ ಬೊಳಿ ಕೊಡ್‍ಪಕ್ ಸೂರ್ಯನಾಡ್ ಚಂದ್ರನಾಡ್ ಬೋಂಡ್‍ವಕಿಂಜ್‍ಲೆ; ದೇವಡ ಮಹಿಮೆಯೇ ಅದ್ಂಗ್ ಬೊಳಿಯಾಯಿತ್ಂಜತ್. ಕೊರಿಕುಟ್ಟಿಯಾನಂವೊನೇ ಅದ್ಂಗ್ ಬೊಳಕಾಯಿತ್ಂಜತ್

ಪ್ರಕಟನೆ 21:4

ದೇವ ಅಯಿಂಗಡ ಕಣ್ಣೀರ್‌ನೆಲ್ಲಾ ತ್‍ೕ‍ಟ್‍ವ. ಇಂಞು ಮಿಂಞಕ್ ಚಾವ್ ಎಣ್ಣುವದ್ ಇಪ್ಪುಲೆ. ಇಂಞು ದುಃಖ, ಗೋಳಾಟ, ಕಷ್ಟ ಎಣ್ಣುವದ್ ಇಪ್ಪುಲೆ; ಮಿಂಞ ಇಂಜದೆಲ್ಲಾ ಇಲ್ಲತೆ ಆಯಿಪೋಚೀಂದ್ ಎಣ್ಣ್‌ಚಿ.

ಪ್ರಕಟನೆ 21:6

ಇದ್‍ಲ್ಲತೆ, ಅಂವೊ ನನ್ನ ನೋಟಿತ್: ಎಲ್ಲಾ ತ್‍ೕಂದತ್, ನಾನ್ ಅಲ್ಫಾವಾಯಿತು ಓಮೆಗವಾಯಿತು, ಆದ್ಯವಾಯಿತು ಆಕೀರಾಯಿತು ಉಳ್ಳ. ಬಾಯರಿಕೆಲ್ ಉಳ್ಳಂವೊಂಗ್, ಜೀವತ್‍ರ ಜಲ ನೀರ್‍ಯಿಂಜ ನಾನ್ ಇನಾಮಾಯಿತ್ ನೀರ್‌ನ ಕುಡಿಪಕ್ ತಪ್ಪಿ.

ಪ್ರಕಟನೆ 22:1

ಪಿಂಞ, ಶುದ್ದವಾನ ತೆಳ್ಂಗ್‍ನ ಜೀವತ್‍ರ ನೀರ್ ಕ್‍ಟ್ಟ್‌ವ ಪೊಳೆನ ನಾಕ್ ಕಾಟ್‍ಚಿ. ಆ ಪೊಳೆ ದೇವಡ ಪಿಂಞ ಕೊರಿಕುಟ್ಟಿಯಾನವೊಂಡ ಸಿಂಹಾಸನತ್ಂಜ ಪೊರಟಿತ್ ಬಾತ್.

ಪ್ರಕಟನೆ 4:11

ನಂಗಡ ಒಡೆಯನಾನ ದೇವನೇ, ಮಹಿಮೆನ, ಗನತ್‍ನ, ಶಕ್ತಿನ ಪಡೆಯುವಕ್ ಯೋಗ್ಯನಾಯಿತುಳ್ಳಿಯ. ನೀನೇ ಎಲ್ಲಾನ ಸೃಷ್ಟಿ ಮಾಡಿಯ, ನೀಡ ಚಿತ್ತತ್‍ರನೆಕೆ ಎಲ್ಲಾ ಸೃಷ್ಟಿ ಆಯಿತ್ ನಿಂದಂಡುಂಡ್‍ೕಂದ್ ಎಣ್ಣ್‌ಚಿ.

ಪ್ರಕಟನೆ 5:6

ಸಿಂಹಾಸನತ್‍ರ, ನಾಲ್ ಜೀವ ಪ್ರಾಣಿಯಡ ಪಿಂಞ ಪೆರಿಯಯಿಂಗಡ ಮದ್ಯತ್‍ಲ್, ಮಿಂಞಲೇ ಬಲಿಯಾಯಿತ್ಂಜ ಕೊರಿ ಕುಟ್ಟಿರನೆಕೆ ಉಳ್ಳ ಒಬ್ಬನ ನಾನ್ ಕಂಡಿಯೆ; ಅದ್ಂಗ್ ಏಳ್ ಕೊಂಬ್ ಪಿಂಞ ಏಳ್ ಕಣ್ಣ್ ಇಂಜತ್. ಈ ಲೋಕತ್‍ರ ಎಲ್ಲಾ ಜಾಗಕು ಅಯಿಪಕಾಯಿತ್ ಉಳ್ಳ ದೇವಡ ಏಳ್ ಆತ್ಮವೇ ಈ ಏಳ್ ಕಣ್ಣ್.