ಪ್ರಕಟನೆ 22:10 - ಕೊಡವ ಬೈಬಲ್

¹⁰ ಇದ್‍ಲ್ಲತೆ, ಅಂವೊ ನನ್ನ ನೋಟಿತ್: ಈ ಪುಸ್ತಕತ್‍ಲ್ ಒಳ್‍ದ್‍ನ ಪ್ರವಾದನೆರ ವಾಕ್ಯತ್‍ನ ಮುದ್ರೆ ಮಾಡಂಡ, ಎನ್ನಂಗೆಣ್ಣ್‌ಚೇಂಗಿ ಸಮಯ ಬೆರಿಯ ಬಂದ್‌ರ್‌ತ್.

ಪ್ರಕಟನೆ 22:10 ပူးပေါင်းရင်းမြစ်များ

ಮತ್ತಾಯ 10:27

ನಾನ್ ನಿಂಗಕ್ ಇರ್‌ಟ್‌ಲ್ ಪಡಿಪ್‍ಚಿಡ್‍ವಾನ, ನಿಂಗ ಬೊಳಿಲ್ ಎಣ್ಣಿ ಕೊಡಿ. ನಿಂಗಕ್ ಗುಟ್ಟಾಯಿತ್ ಕೆಮಿಲ್ ಎಣ್ಣ್‌ವಾನ ಮನೆರ ಕೊಡಿಲ್ ಪೋಯಿತ್ ಕೂತ್ ಕೊಡ್‌ತಿತ್ ಎಣ್ಣಿ ಕೊಡಿ.

ರೋಮ್ 13:11

ವರ್‌ಕ್‌ಯಿಂಜ ಏವ ಸಮಯ ಆಚೀಂದ್, ನಂಗ ಇಕ್ಕತ್‍ರ ಕಾಲತ್‍ನ ಅರ್ಥಮಾಡ್‍ನಯಿಂಗಳಾಯಿತ್, ಇನ್ನನೆ ಮಾಡಂಡು; ನಂಗ ಯೇಸುನ ನಂಬ್‍ನ ಆದ್ಯ ಕಾಲತ್‍ಲ್ ನಂಗಡ ಆಕೀರ್ ರಕ್ಷಣೆ ಪಕ್ಕತ್‍ಲ್ ಇಂಜಕಿಂಜ, ಇಕ್ಕ ಇಂಞು ಜಾಸ್ತಿ ನಂಗಡ ಪಕ್ಕತ್‍ಲ್ ಉಂಡ್.

ರೋಮ್ 13:12

ಬೈಟ್ ದುಂಬ ಕಳೆಂದ್ ಪೋಚಿ, ಪೋಲ್ ಪಕ್ಕ ಬಾತ್; ಆನಗುಂಡ್ ಇರ್‌ಟ್‌ರ ಕ್ರಿಯೇನ ಬುಟ್ಟಿತ್, ಬೊಳಿರ ಆಯುದತ್‍ನ ಇಡೋನ.

2 ಥೆಸಲೊನೀಕ 2:3

ಈ ವಿಷಯತ್‍ಲ್ ನಿಂಗಳ ದಾರೂ ವಂಚನೆ ಮಾಡತನೆಕೆ ಎಚ್ಚರತ್‍ಲ್ ಇರಂಡು; ಎನ್ನಂಗೆಣ್ಣ್‌ಚೇಂಗಿ, ದೇವಕ್ ವಿರೋದ ಮಾಡಿತ್ ಜನ ದಂಗೆ ಮಾಡಿತ್, ಪಾಳಾಯಿ ಪೋಪಕಾಯಿತ್ ಪುಟ್ಟ್‌ನ ಬಲ್ಯ ದುಷ್ಟ ಮನುಷ್ಯ ಪೊರಮೆ ಬಪ್ಪಕತ್ತನೆ, ಆ ದಿವಸ ಬಪ್ಪುಲೆ.

1 ಪೇತ್ರ 4:7

ಎಲ್ಲಾಂಗ್ ಆಕೀರ್ ಕಾಲ ಪಕ್ಕ ಬಾತ್. ಆನಗುಂಡ್, ಚಾಯಿ ಮನಸ್ಸ್ ಉಳ್ಳಯಿಂಗಳಾಯಿತ್, ತನ್ನಡಕ್ಕ ಉಳ್ಳಯಿಂಗಳಾಯಿತ್ ಇರಿ. ಅಕ್ಕ ನಿಂಗ ಚಾಯಿ ಪ್ರಾರ್ಥನೆ ಮಾಡ್‌ವಕ್ ಆಪ.

ಪ್ರಕಟನೆ 1:11

ಆ ವಾಣಿ: ನಾನ್ ಅಲ್ಫಾವು ಓಮೆಗಾವು ಆದ್ಯವು ಆಕೀರ್‍ವಾಯುತುಳ್ಳ. ನೀನ್ ಕಂಡಂಡುಳ್ಳದ್‍ನ ಒರ್ ಪುಸ್ತಕತ್‍ಲ್ ಒಳ್‍ದಿತ್ ಆಸ್ಯ ಪ್ರಾಂತ್ಯತ್‍ಲ್ ಉಳ್ಳ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲದೆಲ್ಫಿಯ, ಲವೊದಿಕೀಯ ಎಣ್ಣುವ ಪಟ್ಟಣತ್‍ಲ್ ಉಳ್ಳ ಏಳ್ ಸಬೇಕ್ ಅಯಿಕಂಡೂಂದ್ ಎಣ್ಣ್‌ಚಿ.

ಪ್ರಕಟನೆ 1:3

ಈ ಪ್ರವಾದನೆರ ವಾಕ್ಯತ್‍ನ ಓದ್‍ವಯಿಂಗ, ಕ್‍ೕಪಯಿಂಗ ಪಿಂಞ ಇದ್‍ಲ್ ಎಣ್ಣ್‌ನನೆಕೆ ಮಾಡ್‌ವಯಿಂಗ ಎಲ್ಲಾರು ಆಶೀರ್ವಾದ ಪಡ್ಂದಯಿಂಗ, ಎನ್ನಂಗೆಣ್ಣ್‌ಚೇಂಗಿ, ಕಾಲ ಪಕ್ಕ ಬಾತ್.

ಪ್ರಕಟನೆ 10:4

ಆ ಏಳ್ ಗುಡ್‍ಗ್ ಸದ್ದ್ ಮಾಡ್‌ವಕ, ನಾನ್ ಒಳ್‍ದ್‍ವಕ್ ಇಂಜ್. ಆಚೇಂಗಿ ಆ ಏಳ್ ಗುಡ್‍ಗ್: ನೀನ್ ಒಳ್‍ದತೆ ಮುದ್ರೆ ಇಡ್‍ೕಂದ್ ಪರಲೋಕತ್ಂಜ ಒರ್ ವಾಣಿ ನಾಕ್ ಕ್‍ೕಟತ್.

ಪ್ರಕಟನೆ 22:16

ಯೇಸುವಾನ ನಾನ್, ಸಬೇಕಾಯಿತ್, ನಿಂಗಡ ಕೂಡೆ ಇದ್‍ನೆಲ್ಲಾ ಸಾಕ್ಷಿಯಾಯಿತ್ ಎಣ್ಣುವಕ್, ನಾಡ ದೂತನ ಅಯಿಚಿಯೆ. ನಾನ್ ದಾವೀದಂಡ ಬೇರಾಯಿತು, ಅಂವೊಂಡ ಸಂತಾಕಾರನಾಯಿತು, ಪೊಲಾಕ ಕಾಂಬ ಪ್ರಕಾಶವಾನ ಬಾನತ್‍ರ ಮೀನಾಯಿ‍ತು ಉಳ್ಳ್‌ಂದ್ ಎಣ್ಣ್‌ಚಿ.

ಪ್ರಕಟನೆ 22:18

ಈ ಪುಸ್ತಕತ್‍ಲ್ ಉಳ್ಳ ಪ್ರವಾದನೆರ ತಕ್ಕ್‌ನ ಕ್‍ೕಟಂಡುಳ್ಳ ಪ್ರತಿ ಒಬ್ಬಂಗು ನಾನ್ ಎಚ್ಚರವಾಯಿತ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ದಾರೇಂಗಿ ಈ ಪುಸ್ತಕತ್‍ಲ್ ಒಳ್‍ದ್‍ನ ವಿಷಯಕಿಂಜ ಬೋರೆ ಎಂತೇಂಗಿ ಕೂಟ್‍ನಕ, ದೇವ ಅಂವೊಂಗ್ ಈ ಪುಸ್ತಕತ್‍ಲ್ ಒಳ್‍ದಿತ್ ಬೆಚ್ಚಿತುಳ್ಳ ಬಾದೇನ ಅಂವೊಂಡ ಮೇಲೆ ಕೂಟ್‌ವ.

ಪ್ರಕಟನೆ 22:20

ಈ ವಿಷಯತ್‍ನ ಸಾಕ್ಷಿಯಾಯಿತ್ ಎಣ್ಣ್‌ವಂವೊ: ನೇರಾಯಿತ್ ನಾನ್ ಬೆರಿಯ ಬಂದಂಡುಳ್ಳ್‌ಂದ್ ಎಣ್ಣಿಯಂಡುಂಡ್. ಆಮೆನ್, ಒಡೆಯನಾನ ಯೇಸುವೇ ಬಾರಿ.

ಪ್ರಕಟನೆ 22:7

ನೋಟಿ! ನಾನ್ ಬೆರಿಯ ಬಂದಂಡುಂಡ್; ಈ ಪುಸ್ತಕತ್‍ಲ್ ಉಳ್ಳ ಪ್ರವಾದನೆರ ತಕ್ಕ್‌ಕ್ ತಗ್ಗಿತ್ ನಡ್‍ಪಯಿಂಗ ಆಶೀರ್ವಾದ ಪಡ್ಂದಯಿಂಗ.

ಪ್ರಕಟನೆ 22:9

ಅಕ್ಕ ಆ ದೇವದೂತ: ನಾಕ್ ನೀನ್ ಇನ್ನನೆ ಮಾಡತೆ, ನೀಡ ಕೂಡೆ, ನೀಡ ಅಣ್ಣತಮ್ಮಣಂಗಡ ಕೂಡೆ, ಪ್ರವಾದಿಯಂಗಡ ಕೂಡೆ, ಈ ಪುಸ್ತಕತ್‍ರ ತಕ್ಕ್‌ಕ್ ತಗ್ಗಿತ್ ನಡ್‍ಪಯಿಂಗಡ ಕೂಡೆ ನಾನ್ ಸಹ ಒರ್ ಸೇವಕ ಅಚ್ಚಕೆ. ದೇವನ ಆರಾದನೆ ಮಾಡ್‍ೕಂದ್ ಎಣ್ಣ್‌ಚಿ.

ಪ್ರಕಟನೆ 5:1

ಪಿಂಞ ಸಿಂಹಾಸನತ್‍ಲ್ ಅಳ್‍ತಂಡುಳ್ಳಂವೊಂಡ ಬಲ್‌ತೆ ಕೈಯಿಲ್ ಒರ್ ಪುಸ್ತಕತ್‍ನ ನಾನ್ ಕಂಡಿಯೆ. ಅದ್ಂಡ ಒಳ್‍ಕ್ ಪಿಂಞ ಪೊರಮೆ ಒಳ್‍ದಿತ್ಂಜತ್. ಅದ್‍ನ ಏಳ್ ಮುದ್ರೆನಗುಂಡ್ ಮುದ್ರೆ ಇಟ್ಟಿತ್ಂಜತ್.