ಪ್ರಕಟನೆ 14:14 - ಕೊಡವ ಬೈಬಲ್

¹⁴ ಪಿಂಞ ನಾನ್ ನೋಟ್‍ವಕ, ಇದಾ, ಬೊಳ್‍ತ ಮೋಡತ್‍ನ, ಆ ಮೋಡತ್‍ರ ಮೇಲೆ ಮನುಷ್ಯಕುಮಾರಂಡನೆಕೆ ತಾಂಡ ಮಂಡೆಲ್ ಪೊನ್ನ್‌ರ ಕಿರೀಟತ್‍ನ ಇಟ್ಟಂಡ್, ತಾಂಡ ಕೈಯಿಲ್ ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‍ಚಂಡ್ ಅಳ್‍ತಂಡಿಂಜ ಒಬ್ಬನ ಕಂಡಿಯೆ.

ಪ್ರಕಟನೆ 14:14 ပူးပေါင်းရင်းမြစ်များ

ಮತ್ತಾಯ 13:30

ಕೊಯಿಪಣಿ ಸುರು ಆಪಕ, ನಾನ್ ನಾಡ ಆಳ್‍ವಕ್ ಕಚಡ ಗಿಡತ್‍ನ ಮಿಂಞ ಬಲ್‍ಚಿತ್, ಅದ್‍ನ ಚುಡ್‌ವಕ್ ಕೆಟ್ಟಿತ್ ಬೆಪ್ಪಕ್ ಎಣ್ಣಿತ್, ಬಯ್ಯ ಗೋದಿನ ಪತ್ತಾಯತ್‍ಲ್ ಇಟ್ಟಿತ್ ಕೂಟ್‍ವಕ್ ಎಣ್ಣುವೀಂದ್ ಎಜಮಾನ ಎಣ್ಣ್‌ಚಿ.

ಮತ್ತಾಯ 17:5

ಪೇತ್ರ ಅನ್ನನೆ ತಕ್ಕ್ ಪರ್ಂದಂಡ್ ಇಪ್ಪಕಲೆ, ಒರ್ ಮಿನ್ನುವ ಮೋಡ ಅಯಿಂಗಳ ಆವರಿಚಿಟ್ಟತ್. ಇಂವೊ ನಾಡ ಕೊದಿರ ಮೋಂವೊ, ಇಂವೊಂಡ ಮೇಲೆ ನಾಕ್ ದುಂಬ ಕುಶಿ ಉಂಡ್, ಇಂವೊ ಎಣ್ಣುವಾನ ನಿಂಗ ಕ್‍ೕಳೀಂದ್, ಆ ಮೋಡತ್ಂಜ ಒರ್ ವಾಣಿ ಬಾತ್.

ಮಾರ್ಕ 4:29

ಪಣ್ಣ್ ಆನ ಪಿಂಞ ಆ ಮನುಷ್ಯ ಕೊಯಿ ಕತ್ತಿಲ್ ಕೊಯಿಪಣಿ ಸುರು ಮಾಡ್‌ವ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 21:27

ಅಕ್ಕ ಮನುಷ್ಯಕುಮಾರ ಮೋಡತ್‍ರ ಮದ್ಯತ್‍ಲ್ ಬಲ್ಯ ಶಕ್ತಿಕೂಡಿಯಂಡ್ ಮಹಿಮೆಲ್ ಬಪ್ಪದ್‍ನ ಅಯಿಂಗೆಲ್ಲಾ ಕಾಂಬ.

ಇಬ್ರಿಯ 2:9

ಆಚೇಂಗಿಯು, ದೇವಡ ಕೃಪೇರಗುಂಡ್ ಯೇಸು ಎಲ್ಲಾರ್‍ಕಾಯಿತ್ ಚಾವ್‍ನ ತಾಂಡ ತಡೀಲ್ ಎಡ್‌ಪಕಾಯಿತ್, ಚೆನ್ನ ಸಮಯಕ್ ದೇವದೂತಂಗಕಿಂಜ ಅಂವೊನ ಕಮ್ಮಿ ಮಾಡ್‍ಚೀಂದ್ ನಂಗ ನೋಟಿಯಂಡುಂಡ್. ಅಂವೊ ಚಾವ್‍ನ ಸ್ವೀಕಾರ ಮಾಡ್‍ನಗುಂಡ್ ದೇವ ಅಂವೊನ ಮಿಹಿಮೇರಗುಂಡ್, ಗನತ್‍ರಗುಂಡ್ ರಾಜನಾಯಿತ್ ಮಾಡ್‍ಚಿ.

ಪ್ರಕಟನೆ 1:13

ಆ ಏಳ್ ಕುತ್ತ್ ಬೊಳ್‍ಚತ್‍ರ ಮದ್ಯತ್‍ಲ್ ಮನುಷ್ಯಕುಮಾರಂಡನೆಕೆ ಒಬ್ಬನ ಕಂಡಿಯೆ. ಅಂವೊ ಕಾಲ್‍ಕತ್ತನೆ ಉಳ್ಳ ಬಟ್ಟೇನ ಇಟ್ಟಿತ್, ತಾಂಡ ಎದೇಲ್ ಪೊನ್ನ್‌ರ ಪಟ್ಟಿನ ಕೆಟ್ಟಿತ್ಂಜತ್.

ಪ್ರಕಟನೆ 1:7

ಇದಾ, ಅಂವೊ ಮೋಡತ್‍ರ ಕೂಡೆ ಬಂದಂಡುಂಡ್! ಎಲ್ಲಾರು ಅಂವೊನ ಕಾಂಬ. ಅಂವೊನ ಕುತ್ತ್‌ನಯಿಂಗ ಸಹ ಅಂವೊನ ಕಾಂಬ. ಈ ಲೋಕತ್‍ರ ಎಲ್ಲಾ ಕುಲತ್‍ರ ಜನವು ಅಂವೊನ ಕಾಂಬಕ ಗೋಳಾಡುವ. ಅದ್ ಅನ್ನನೆ ಆಪ, ಆಮೆನ್.

ಪ್ರಕಟನೆ 10:1

ಪಿಂಞ, ಇಂಞೊರ್ ಶಕ್ತಿವಂತ ದೇವದೂತ ಬಾನತ್ಂಜ ಇಳ್ಂಜಿ ಬಪ್ಪಾನ ನಾನ್ ಕಂಡಿಯೆ; ಮೋಡ ಅಂವೊನ ಮುಚ್ಚಿತ್ಂಜತ್. ಅಂವೊಂಡ ಮಂಡೆರ ಮೇಲೆ ಮಳೆಬಿಲ್ಲ್ ಇಂಜತ್. ಅಂವೊಂಡ ಮೂಡ್ ಸೂರ್ಯಂಡನೆಕೆ ಇಂಜತ್, ಅಂವೊಂಡ ಕಾಲ್ ತಿತ್ತ್‌ರ ಕಂಬತ್‍ರನೆಕೆ ಇಂಜತ್.

ಪ್ರಕಟನೆ 11:17

ಇಕ್ಕ ಇಪ್ಪಂವೊನೂ, ಮಿಂಞ ಇಂಜಂವೊನು ಸರ್ವ ಶಕ್ತಿವಂತಂವೊನು ಆಯಿತುಳ್ಳ, ಒಡೆಯನಾನ ದೇವನೇ, ನಿನ್ನ ನಂಗ ಆರಾದನೆ ಮಾಡ್‌ವ. ನೀನ್ ಬಲ್ಯ ಶಕ್ತಿರಗುಂಡ್ ರಾಜ್ಯಬಾರ ಮಾಡ್‌ವ ರಾಜನಾಯಿತುಳ್ಳಿಯ.

ಪ್ರಕಟನೆ 19:12

ಅಂವೊಂಡ ಕಣ್ಣ್ ಚುಟ್ಟ್ ಪೋಪ ತಿತ್ತ್‌ರ ಜ್ವಾಲತ್‌ರನೆಕೆ ಇಂಜತ್, ಅಂವೊಂಡ ಮಂಡೆರ ಮೇಲೆ ದುಂಬ ಕಿರೀಟ ಇಂಜತ್; ಅಂವೊನ ಬುಟ್ಟಿತ್ ಬೋರೆ ದಾರ್‌ಕು ಗೊತ್ತಿಲ್ಲತ ಒರ್ ಪೆದ ಅಂವೊಂಡ ಮೇಲೆ ಒಳ್‍ದಿತ್ಂಜತ್.

ಪ್ರಕಟನೆ 20:11

ಅಲ್ಲಿಂಜ, ನಾನ್ ಬೊಳ್‍ತ ಸಿಂಹಾಸನತ್‍ನ, ಅದ್ಂಡಮೇಲೆ ಅಳ್‌ತಿತ್ ಉಳ್ಳಂವೊನ ಕಂಡಿಯೆ; ಅಂವೊಂಡ ಸನ್ನಿದಾನತ್ಂಜ ಬೂಮಿಯು ಬಾನವು ಕಾಂಗತೆ ಆಯಿಪೋಚಿ. ಅದ್ ಇಂಜ ಜಾಗ ಸಹ ಇಲ್ಲತೆ ಆಚಿ.

ಪ್ರಕಟನೆ 6:2

ನಾನ್ ನೋಟ್‍ವಕ, ಇದಾ, ಒರ್ ಬೊಳ್‍ತ ಕುದ್‍ರೆನ ಕಂಡಿಯೆ, ಅದ್ಂಡಮೇಲೆ ಇಂಜಂವೊ ಒರ್ ಬಿಲ್ಲ್‌ನ ಪುಡ್‌ಚಂಡಿಂಜತ್, ಅಂವೊಂಗ್ ಒರ್ ಕಿರೀಟ ಕೊಡ್‌ತಿತ್ಂಜತ್, ಅಂವೊ ಗೆಲ್ಲ್‌ವಂವೊನಾಯಿತ್, ಗೆಲ್ಲ್‌ವಕಾಯಿತ್ ಪೊರಟಿತ್ ಪೋಚಿ.